اباەۆ: ايەلىڭمەن ۇرسىسىپ قالساڭ دا بيلىك كىنالى

4046
Adyrna.kz Telegram

اقپارات جانە قوعامدىق دامۋ ءمينيسترى داۋرەن اباەۆ ەلوردادا بۇگىن اشىلعان جۇقپالى اۋرۋلار اۋرۋحاناسى الماتى مەن  شىمكەنت قالاسىندا دا سالىناتىنىن ايتتى دەپ حابارلايدى "ادىرنا" قازاقپاراتقا سىلتەمە جاساپ.

«جۇقپالى اۋرۋلار اۋرۋحاناسى ەندى الماتى، شىمكەنت قالالارىندا سالىنادى. مۇنداي اۋرۋحانانىڭ قاجەتتىگىنە كۇمانمەن قارايتىندارعا قاتىستى ايتارىم: مەن مۇنداي اڭگىمەلەردى كوڭىلگە المايمىن. ەگەر اۋرۋحانا سالماعان جاعدايدا ءدال وسى كۇمانمەن قاراعان ادامدار بيلىكتى ۋاقىتىلى شەشىم قابىلداماعانى ءۇشىن كىنالار ەدى. بۇل «ايەلىڭمەن ۇرسىسىپ قالساڭ دا بيلىك كىنالى» دەگەن ەجەلدەن كەلە جاتقان مىسالعا ۇقسايدى»، – دەدى مينيستر داۋرەن اباەۆ.

مينيستر نۇر-سۇلتاندا سالىنعان جۇقپالى اۋرۋلار ورتالىعىنا قاتىستى پىكىر ءبىلدىردى.

«كوروناۆيرۋستىڭ ءورشۋى ءارتۇرلى سالادا جۇرگەن ادامداردىڭ ەڭبەگىنە جاڭاشا كوزقاراسپەن قاراۋعا ۇيرەتتى. قازىر مۇمكىندىكتى پايدالانىپ، قۇرىلىسشىلارعا ەڭبەگى ءۇشىن ۇلكەن العىس ايتۋ كەرەك. ولار دا – ءبىزدىڭ زاماننىڭ قاھارماندارى. بۇل اۋرۋحانا دۇنيەجۇزىلىك دەنساۋلىق ساقتاۋ ۇيىمىنىڭ بارلىق تالاپتارىنا ساي. ول 90% وتاندىق قۇرىلىس ماتەريالدارىنان سالىندى. ول ۋاقىتشا گوسپيتال نەمەسە كونتەينەر ەمەس. ول – بىزگە ۇزاق جىلدار بويى قىزمەت ەتەتىن اۋرۋحانا. ەستەرىڭىزدە بولسا، ءبىر-ەكى اي بۇرىن قىتايدا اۋرۋحانا كەشەنىن سالىپ جاتقان كەزدە كوبى ءبىزدىڭ ەلدە بۇلاي بولۋى مۇمكىن ەمەس ەكەنىن ايتىپ كۇلىپ، مىسقىلداعان ەدى. قۇجات جيناپ، تەندەر وتكىزۋ ءۇشىن جانە وسىنداي عيمارات سالۋ ءۇشىن جىلدار كەتەتىنىن ايتقاندار بولعان. وسىلاي كۇمانمەن قاراۋشىلارعا 13 كۇن ىشىندە جاۋاپ بەرىلدى. باسقا ءىس تۇسكەن كەزدە ءبىز جيناقتالىپ، كەز كەلگەن تاپسىرمانى شەشە الامىز»، – دەيدى ول.

مينيستر اتالعان اۋرۋحانانىڭ كەرەك ەكەنىنە كۇمانمەن قاراپ، ونىڭ ءبارىبىر قاڭىراپ تۇراتىنىن ايتقانداردىڭ پىكىرىنە جاۋاپ بەردى.

«مەن بۇل اۋرۋحانا عانا ەمەس، قازاقستانداعى بارلىق اۋرۋحانانىڭ ءىشى بوس بولعانىن قالايتىنىمدى اشىق تۇردە ايتامىن. قازاقستانداعى دەنساۋلىق ساقتاۋ جۇيەسى ەلىمىزدە اۋىرعاندار سانى از بولۋى ءۇشىن جۇمىس ىستەپ جاتىر. وكىنىشكە قاراي، شىنايى ومىردە ءبارى باسقاشا بولۋى مۇمكىن. ونى وزدەرىڭىز سەزىپ، بىلدىڭىزدەر. مەملەكەت ءبىر كۇندىك ومىرمەن جۇرە المايدى. ءبىز بارىنە دايىن بولۋىمىز كەرەك. سول سەبەپتى دە وسى اۋرۋحانانى سالدىق»، – دەيدى مينيستر.

پىكىرلەر