Aqparat jáne qoǵamdyq damý mınıstri Dáýren Abaev elordada búgin ashylǵan juqpaly aýrýlar aýrýhanasy Almaty men Shymkent qalasynda da salynatynyn aıtty dep habarlaıdy "Adyrna" QazAqparatqa silteme jasap.
«Juqpaly aýrýlar aýrýhanasy endi Almaty, Shymkent qalalarynda salynady. Mundaı aýrýhananyń qajettigine kúmánmen qaraıtyndarǵa qatysty aıtarym: men mundaı áńgimelerdi kóńilge almaımyn. Eger aýrýhana salmaǵan jaǵdaıda dál osy kúmánmen qaraǵan adamdar bılikti ýaqytyly sheshim qabyldamaǵany úshin kinálar edi. Bul «áıelińmen ursysyp qalsań da bılik kináli» degen ejelden kele jatqan mysalǵa uqsaıdy», – dedi mınıstr Dáýren Abaev.
Mınıstr Nur-Sultanda salynǵan juqpaly aýrýlar ortalyǵyna qatysty pikir bildirdi.
«Koronavırýstyń órshýi ártúrli salada júrgen adamdardyń eńbegine jańasha kózqaraspen qaraýǵa úıretti. Qazir múmkindikti paıdalanyp, qurylysshylarǵa eńbegi úshin úlken alǵys aıtý kerek. Olar da – bizdiń zamannyń qaharmandary. Bul aýrýhana Dúnıejúzilik densaýlyq saqtaý uıymynyń barlyq talaptaryna saı. Ol 90% otandyq qurylys materıaldarynan salyndy. Ol ýaqytsha gospıtal nemese konteıner emes. Ol – bizge uzaq jyldar boıy qyzmet etetin aýrýhana. Esterińizde bolsa, bir-eki aı buryn Qytaıda aýrýhana keshenin salyp jatqan kezde kóbi bizdiń elde bulaı bolýy múmkin emes ekenin aıtyp kúlip, mysqyldaǵan edi. Qujat jınap, tender ótkizý úshin jáne osyndaı ǵımarat salý úshin jyldar ketetinin aıtqandar bolǵan. Osylaı kúmánmen qaraýshylarǵa 13 kún ishinde jaýap berildi. Basqa is túsken kezde biz jınaqtalyp, kez kelgen tapsyrmany sheshe alamyz», – deıdi ol.
Mınıstr atalǵan aýrýhananyń kerek ekenine kúmánmen qarap, onyń báribir qańyrap turatynyn aıtqandardyń pikirine jaýap berdi.
«Men bul aýrýhana ǵana emes, Qazaqstandaǵy barlyq aýrýhananyń ishi bos bolǵanyn qalaıtynymdy ashyq túrde aıtamyn. Qazaqstandaǵy densaýlyq saqtaý júıesi elimizde aýyrǵandar sany az bolýy úshin jumys istep jatyr. Ókinishke qaraı, shynaıy ómirde bári basqasha bolýy múmkin. Ony ózderińiz sezip, bildińizder. Memleket bir kúndik ómirmen júre almaıdy. Biz bárine daıyn bolýymyz kerek. Sol sebepti de osy aýrýhanany saldyq», – deıdi mınıstr.
