بۇگىن اقپاراتتىق-كوممۋنيكاتسيالىق ورتالىعىندا توتەنشە جاعداي كەزىندە كوممۋنالدىق قىزمەتتەردى جەتكىزۋشىلەردىڭ شىعىندارىن وتەۋ، كارانتين ۋاقىتىندا تۇرعىن ۇيگە ونلاين قۇجات راسىمدەۋ، سونداي-اق اتاۋلى الەۋمەتتىك كومەك پەن 42 500 تەڭگە الەۋمەتتىك كومەك الۋ بويىنشا ونلاين-بريفينگ ءوتتى.
بريفينگ بارىسىندا شىمكەنت قالاسى اكىمىنىڭ ورىنباسارى نۇرسادىق ەرگەشبەك كارانتينگە بايلانىستى حالىقتىڭ جەكەلەگەن ساناتتارىنىڭ كوممۋنالدىق شىعىنى ءۇشىن بەرىلەتىن 15 مىڭ تەڭگەگە قاتىستى قالا تۇرعىندارىنىڭ سۇراقتارىنا جاۋاپ بەردى.
- پرەزيدەنت توتەنشە جاعداي مەن كارانتين ۋاقىتىندا تۇرعىنداردىڭ كوممۋنالدىق قىزمەتكە تولەيتىن اقىسىنىڭ مولشەرىن ازايتۋ بويىنشا جۇيەلى شارالاردى ازىرلەۋدى تاپسىردى. وتەماقىنى الاتىنداردىڭ قاتارىندا مۇگەدەكتەر، مۇگەدەك بالالاردى تاربيەلەپ وتىرعان وتباسىلار، كوپبالالى جانۇيالار، سوعىس ارداگەرلەرى، جالعىزباستى زەينەتكەرلەر ت.ب ساناتتاعى ازاماتتار بار. ول ساناتتار بويىنشا قالادا جالپى 100 308 ادام ۇمىتكەر. ناقتى ابونەنتتىك شوتى بار ادامداردىڭ سانى قازىر انىقتالۋدا. وتىنىمدەردى قابىلداۋ بويىنشا communal-komek.kz ەلەكتروندىق پورتالى قۇرىلدى، وندا كومەك الۋ شارتتارى كورسەتىلگەن. كومەك كورسەتۋ ءساۋىر جانە مامىر ايلارىن قامتيدى، - دەدى قالا اكىمىنىڭ ورىنباسارى.
سونداي-اق بريفينگتە قالالىق تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باسشىسى عالىمجان تولەپوۆ ەلىمىزدەگى توتەنشە جاعدايعا بايلانىستى ازاماتتاردىڭ تۇرعىن ءۇي كەزەگىنە egov.kz پورتالى ارقىلى تىركەلۋ مۇمىندىگى بار ەكەنىن، قوسىمشا اقپارات الۋ ءۇشىن 56-62-89 نومىرىنە حابارلاسۋ كەرەكتىگىن ايتتى.
ال جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ م.ا. جانات وتەباەۆا قازىرگى دەيىن قالا بويىنشا 228 223 ازاماتقا 42 500 تەڭگە كولەمىندە الەۋمەتتىك كومەك تاعايىندالعانىن اتاپ ءوتتى. سونداي-اق ول اتاۋلى الەۋمەتتىك كومەك بويىنشا اتقارىلىپ جاتقان جۇمىستاردى بايانداپ، قۇجاتتاردى ونلاين تۇرىندە راسىمدەۋ ءتارتىبىن ءتۇسىندىردى.
ءباسپاسوز ءماسليحاتى Facebook الەۋمەتتىك جەلىسىندە (شىمكەنت اقپاراتتىق كوممۋنيكاتسيالىق ورتالىق پاراقشاسىندا) تىكەلەي ەفيردە كورسەتىلىپ، بىرقاتار ماڭىزدى ساۋالدارعا جاۋاپ بەرىلدى. بارلىق كەلىپ تۇسكەن ساۋالدارعا جازباشا تۇردە جاۋاپ جىبەرىلەتىن بولادى.
شىمكەنت
