جازىقسىز جاس اكتەر 9 اي بويى تۇرمەدە وتىر

16833
Adyrna.kz Telegram

اقتوبە وبلىسىنىڭ 23 جاستاعى ءالىبي وتەپبەرگەن اتتى جاس اكتەرى 9 اي بويى تۇرمەدە جازىقسىز وتىرعان كورىنەدى. اتا-اناسىنىڭ مەيىرىمىنەن جاستاي ايرىلعان ازاماتتىڭ ءىسى تۋرالى ماتەريالدى ءتيىستى ورگان باسشىلارى نازارىنا الادى دەپ سەنەمىز.

 

قر جوعارى سوتىنىڭ نازارىنا!

جاناشىر قوعام نازارىنا!

وتەپبەرگەن ءالىبي 23 جاستاعى جاس اكتەر. 2019 جىلدىڭ شىلدە ايىندا اقتوبە قالالىق "اقبوبەك-ۆوستوك" بالالار لاگەرىنە جۇمىسقا تۇرعان. 21 شىلدە كۇنى ونى 7-ءشى وتريادتىڭ جەتەكشىسى ەتىپ تاعايىندايدى. جاس جىگىت جۇمىس بارىسىندا بىرنەشە جەتكىنشەكتى ءتارتىپ بۇزعاندىعى ءۇشىن جازالايدى. جازا رەتىندە لاگەردە ۇيىمداستىرىلعان بي كەشىنە جىبەرمەي قويادى. ونىڭ بۇل ىسىنە كەك الماق بولعان 7 سىنىپ وقۋشىلارى (ۇل بالالار) اتا-انالارىنا ءالىبيدى قارالاپ، كومەك سۇرايدى. ولاردىڭ سوزەرىنشە، جەتەكشىلەرى كۇن بەرمەي تيىسە بەرگەن، ءوز جىنىس مۇشەسىن كورسەتىپ، بالالارمەن جۋىنۋ بولمەسىنە بىرگە كىرگەن، جىنىس مۇشەلەرىنە قول تيگىزگەن. 25 شىلدە كۇنى وتريادتاعى 7 بالانىڭ اتا-انالارىنىڭ ارىزى بويىنشا ءالىبي قاماۋعا الىنىپ، تەرگەۋ جۇمىستارى جۇرگىزىلگەن. تەكسەرۋ ناتيجەسىندە ءبىلىم ءبولىمى ماماندارى: "ەر بالا بالالارمەن ورتاق ءتىل تابىسا المادى",- دەگەن قورىتىندى شىعاردى. سوت زالىندا ءالىبيدىڭ ادۆوكاتى قورعاۋشىسىنىڭ كىناسىز ەكەندىگىن 100 پايىز دالەلدەگەن. ءتىپتى، لاگەر توڭىرەگىندەگى ۆيدەوكامەرالاردىڭ جازبالارىن دا ايعاق رەتىندە كورسەتىپ، لاگەر باسشىسىنىڭ ءوزى جەتەكشىگە اراشا تۇسكەن. بارلىق بۇلتارتپاس ايعاقتارعا قاراماستان، سوت كامەلەتتىك جاسقا تولماعان جاسوسپىرىمدەرگە قاتىستى ءىس بولعاندىقتان ءبىر جاقتى عانا قارالىپ، الىبيگە 10 جىلعا باس بوستاندىعىنان ايىرىلۋ جازاسىن تاعايىنداعان. وعان قر قىلمىستىق كودەكسىنىڭ 124 بابىنىڭ 3-ءشى تارماعى بويىنشا ايىپتى دەپ تاپقان.

ءىس تولىقتاي جابىلدى. ونىڭ تۇرمەدە وتىرعانىنا 9 اي بولدى. الايدا، باۋىرىنىڭ كىناسىز ەكەندىگىن ايتىپ، شىرىلداپ جۇرگەن جالعىز جاناشىرى اپكەسىنىڭ وتىنىشىمەن ونىڭ دوستارى مەن ارىپتەستەرىنەن قۇرالعان @alibige_adildik توبى ءىستى قايتا اشىپ، جاس جىگىتتىڭ اقيقاتقا جەتۋىنە كومەك كورسەتۋدە. ەلگە تانىمال تۇلعالاردىڭ بارلىعىنا جەكەلەي جازىپ، اراشا سۇراۋدا. ءتىپتى، تانىمال ادۆوكاتتاردان ءىستى قولعا الۋىن سۇراپ كورگەن. بۇگىندە، بيبىگۇل داۋلەتبەك، گۇلناز اۋدانباەۆا، نۇرلان ناۋرىزاليەۆ، اراي جۇماشقىزى سەكىلدى بىرنەشە جۋرناليست تۇلعالار كومەكتەسىپ جاتىر. الايدا، كوپشىلىگى ءالى ءۇنسىز. ولار وزدەرىن كۇندەلىكتى بەلگىلەپ، جەكە جازىپ، پاراقشالارىن حاتقا تولتىرعان جالعىز ءىس جايىندا بىلمەيدى دەيسىزدەرمە؟ جوق! ءبارى بىلەدى. ءالىبيدىڭ ىسىنەن ءبىرى قالماي حاباردار! ايتسە دە، قانداي قۇدىرەتتى كۇشتىڭ اسەرىنەن ەكەنى بەيمالىم، ايتەۋىر، ءبىراۋىزدان ۇنسىزدىك ساقتاپ وتىر!

ءالىبيدىڭ جاناشىر دوستارى: ء"الىبيدىڭ ءوزىنىڭ تازا ەكەندىگىن دالەلدەپ شىعۋىنا مۇمكىندىك بەرەيىكشى. ءتىپتى، قارعا دا قارعانىڭ كوزىن شۇقىمايدى دەگەن بار عوي. ولاي بولسا، قارعادان ميلليون ەسە سانالى بولا تۇرا، باۋىرىمىزدى قالاي قاپاسقا قيامىز؟ قازاق  - جەتىمىن جىلاتپاعان حالىق قوي. سوندا، اتا-اناسىنىڭ مەيىرىمىنەن جاستاي ايىرىلعان ءبىر جەتىمىمىزدى كەڭ قۇلاشىمىزعا سىيعىزا الماعانىمىز با؟ ءبىز نار تۇلعالى اباي مەن شاكارىمنىڭ ۇرپاعى ەمەسپىز بە؟ وسى قارا تۇنەكتى ماڭگىلىك جاستانعان حح عاسىردىڭ باسىنداعى ۇرپاعىم دەپ اجال قۇشقان   الىپتارىمىز از با ەدى؟ ءبىز وسوناۋ ۇلى دالادا ادىلدىكتى ۇستەم ەتىپ، قارا قىلدى قاق جارعان ءۇش ءبيدىڭ ۇرپاعى ەمەسپىز بە؟ جاۋىمىزدى ءبىر اۋىز سوزبەن تىزە بۇكتىرگەن ادىلدىگىمىز قايدا؟  عاسىرلار بويى بابالارىمىز ارمانداعان تاۋەلسىزدىك پەن بىرلىگىمىز قايدا؟ قانداسىمىزدىڭ باسىنا ءىس ءتۇسىپ، قوس قاناتى قايىرىلعاندا باسىمىز بىرىكپەسە، قاي كەزدە بىرىگەدى؟ ونسىز دا كورشىلەس قىتاي ەلىندە جازىقسىز ازاپ تارتىپ وتىرعان اقجارقىننىڭ تاعدىرىنا جاۋاپتىمىز! ەڭ بولماسا ءوز جەرىندە ادىلدىككە جەتە الماي وتىرعان الىبيگە جولداس بولايىقشى. جاس عۇمىردىڭ وبالىن مويىنىمىزعا اسىپ الساق، ەرتەڭگى كۇنى قايتىپ جەر باسىپ جۇرەمىز؟! تۋ كوتەرەر جاستارىمىزدىڭ ءبارىن اركىمنىڭ جالاسىنا قيىپ، تۇرمەگە توعىتا بەرسەك، ەرتەڭگى كۇنى ەل تىزگىنىن كىم ۇستايدى؟", - دەپ زار يلەۋدە.  ويلانايىق.

قر جوعارى سوتىنىڭ وسى ماسەلەگە نازار اۋدارۋىن سۇرايمىز.

 

مايرا  ابدۋللاحاتوۆا،

قاينار اكادەمياسى جۋرناليستيكا فاكۋلتەتىنىڭ 1 كۋرس ستۋدەنتى

https://www.instagram.com/p/B-6Zr4KFJRJ/?igshid=7sajos2t0tv8 

پىكىرلەر