شىمكەنتتە ەكى كۇن قاتارىنان تولاسسىز جاۋعان جاۋىن سۋى بىرقاتار اۋلالارعا كىرگەن. ءساۋىردىڭ 12-13 كۇندەرى توتەنشە جاعدايلار قىزمەتىنە قاراتاۋ جانە اباي اۋداندارىنىڭ اۋماعىنان ءورت ءسوندىرۋ جانە قۇتقارۋ بولىمشەلەرىنا ەكى رەت شاقىرتۋ كەلىپ تۇسكەن. قۇتقارۋشىلار مەكەنجاي بويىنشا بارىپ، كوشە بويىنداعى بىرقاتار ۇيلەردىڭ اۋلالارىن جاۋىن سۋىنان تازالاۋ جۇمىستارىن اتقاردى.
جالپى بۇل جۇمىستارعا دەپارتامەنتتىڭ 20-عا جۋىق جەكە قۇرامى جانە 4 تەحنيكاسى جۇمىلدىرىلدى، 200-دەن اسا تەكشە مەتر سۋ شىعارىلدى.
شىمكەنت قالاسى تج دەپارتامەنتىنىڭ باستىعى ازاماتتىق قورعاۋ پولكوۆنيگى نۇربولات دەربىسوۆ سۋ باسۋ جاعدايلارىن الدىن الۋ ماقساتىندا اقپان-ناۋرىز ايلارىندا جەكە قۇرامنىڭ جانە ەرىكتىلەردىڭ قاتىسۋىمەن قوشقار اتا، قاراسۋ وزەندىرى بويىندا، ارىق-اتىزداردى قوقىستان تازالاۋ جۇمىستارى بويىنشا سەنبىلىك وتكىزىلگەنىن اتاپ ءوتتى.
سونىمەن قاتار، سۋ تاسقىنى ماۋسىمىندا شىمكەنت قالاسى تج دەپارتامەنتىنىڭ 297 ادام جەكە قۇرامى، 49 تەحنيكاسى جانە 28 ءجۇزۋ قۇرالدارى، 41 موتوپومپا، قالالىق كوممۋنالدىق قىزمەتتەرىنىڭ قۇرامىندا 224 ادام، 14 بىرلىك تەحنيكا (ۆاكۋمدى اۆتوتسيستەرنالار) جانە 19 بىرلىك موتوپومپاسى بار كۇشتەرى مەن قۇرالدارى توتەنشە جاعدايلارعا ارەكەت ەتۋگە دايىندىققا كەلتىرىلگەندىگى دە ايتىلدى.
دەپارتامەنت باستىعى قالا تۇرعىندارىن كوكتەم مەزگىلىندە جاۋىن-شاشىن جانە ەرىگەن قار سۋلارى سالدارىنان سۋ باسۋ قاۋپىنىڭ الدىن الۋ ماقساتىندا اۋماقتاعى يرريگاتسيالىق جانە ۇيىشىلىك ارىقتاردى قوقىستان تازالاۋ جۇمىستارىنا اتسالىسۋعا شاقىردى.
شىمكەنت قالاسى توتەنشە جاعدايلار جونىندەگى شتابى
