ASSYLTAS قوعامدىق قورى ەلىمىزدەگى جاريالانعان توتەنشە جاعدايعا بايلانىستى قيىندىققا تاپ بولعان 200 وتباسىنى ىرىكتەپ الىپ، 25 000 تەڭگەدەن قارجىلاي كومەك ۇلەستىرمەك. ولار كوپبالالى وتباسىلار مەن جالعىزباستى انالار جانە اكەلەر.
3 كۇن بۇرىن قوردىڭ باستاماسىمەن قايىرىمدىلىق اكتسياسى باستالىپ، حالىقتىڭ كومەگى ارقىلى 1 236 768 تەڭگە جينالعان. قارجى جيناۋعا 351 ادام جاردەمدەسكەن. باستاپقىدا ۋادە ەتىلگەندەي، ASSYLTAS قوعامدىق قورى جينالعان قارجىنى ەكى ەسەلەپ، تاعى 100 وتباسىعا كومەك قولىن سوزاتىن بولدى.
«ءۇش كۇن بۇرىن ءبىز بۇل اكتسيانى باستاعان كەزدە قانشا اقشا جينالسا، ۇستىنە سونشا قارجى بولەتىنىمىزدى ايتقانبىز. حالىقتىڭ ىقىلاسى كەڭ ەكەن، قايىرىمدى جانداردىڭ ارقاسىندا ءبىز ەندى مىنە 100 وتباسىعا كومەكتەسە الامىز، وتىنىشتەردىڭ كوپتىگىنە بايلانىستى قور قۇرىلتايشىسى دۋلات تاستەكەەۆپەن كەڭەسە كەلە، ءبىزدىڭ قور تاعى 100 وتباسىعا قارجىلاي كومەكتەسپەك. ياعني، 200 وتباسىعا 25 000 تەڭگەدەن ۇلەستىرەمىز»،- دەدى ASSYLTAS قوعامدىق قورىنىڭ جەتەكشىسى ر.وقاس.
كومەك الۋ ءۇشىن قوعامدىق قوردىڭ ەلەكتروندى پوشتاسىنا 1000-نان استام حات كەلىپ تۇسكەن. قور قىزمەتكەرلەرى الداعى 3 كۇندە وتىنىشتەردى قاراستىرىپ، مۇقتاج 200 ادامنىڭ ءتىزىمىن جاسايدى.
ايتا كەتەيىك، ASSYLTAS قوعامدىق قورى 2018 جىلى قۇرىلعان. قور مادەنيەت، ونەر، سپورت سالالارىن قولداۋمەن، كوپبالالى انالارعا جاردەم كورسەتۋمەن اينالىسادى.
اتالمىش قور، قانات يسلام، جانىبەك ءالىمحانۇلى، ەراسىل قاجىباەۆ سىندى تانىمال سپورتشىلاردىڭ دەمەۋشىسى بولعان. جىل سايىن قوردىڭ ۇيىتقى بولۋىمەن رەسپۋبليكالىق اقىندار ايتىسى وتكىزىلىپ ءجۇر.
ەكى جىلدان بەرى ASSYLTAS ستيپەندياسى سپورت، عىلىم، جۋرناليستيكا جانە ادەبيەت سالاسىندا جۇرگەن ازاماتتارعا تاعايىندالۋدا.
قازىرگى تاڭدا، قوردىڭ قارجىلاندىرۋىمەن سەمەي قالاسىنداعى ورتالىق مەشىتتىڭ قۇرىلىسى ءجۇرىپ جاتىر.
