پرەزيدەنت الەۋمەتتىك تولەمدى تەك شىن مانىندە كومەككە ءزارۋ جانە توتەنشە جاعدايدا قارجىلاي قيىنداققا تاپ بولعان ازاماتتارعا عانا بەرۋ كەرەكتىگىن قاداپ ايتتى
پرەزيدەنت قاسىم-جومارت توقاەۆ حالىققا 42 500 تەڭگەنى تاراتۋ جۇمىسىنا كوڭىلى تولمايتىنىن ايتتى، دەپ حابارلايدى Sputnik قازاقستان.
وسى ۋاقىتقا دەيىن الەۋمەتتىك تولەمگە ءوتىنىش بەرگەن ازاماتتاردىڭ سانى 1,7 ميلليون ادامعا جەتتى. ولاردىڭ باسىم بولىگى ەلەكتروندى تۇردە ءوتىنىم جولداعان.
"الايدا الەۋمىتتىك تولەمدى تاراتۋ مەحانيزمىنىڭ تولىعىمەن دايىن بولماعانىن اشىق ايتۋىمىز كەرەك. ۆەدومستۆونىڭ شۇعىل شەشىمدەرى "جول-جونەكەي" قابىلداندى. ورتالىق جانە جەرگىلىكتى مەملەكەتتىك ورگانداردىڭ ءتۇسىندىرۋ جۇمىستارى دا كوڭىل كونشىتەرلىك ەمەس", - دەدى توقاەۆ توتەنشە جاعداي جونىندەگى مەملەكەتتى كوميسسيانىڭ بۇگىنگى وتىرىسىندا.
مەملەكەت باسشىسىنىڭ ايتۋىنشا، ءتۇسىندىرۋ شارالارى دۇرىس جۇرگىزىلمەگەننەن كەيىن اركىم ارقالاي قابىلدادى، حالىق اراسىندا تۇسىنپەۋشىلىك پايدا بولدى.
"ادامدار ءوز دەنساۋلىعىنا قاۋىپ ءتوندىرىپ، بانكتەردە ەسەپشوت اشامىز نەمەسە بىرىڭعاي جيىنتىق تولەمدى جاسايمىز دەپ ۇزىن-سونار كەزەكتە تۇرۋعا ءماجبۇر بولدى. وسىعان بايلانىستى ۇكىمەت شۇعىل تۇردە 42 500 تەڭگەنى الۋدىڭ ناقتى مەحانيزمىن ازىرلەپ، بارلىق بۇقارالىق اقپارات قۇرالى مەن الەۋمەتتىك جەلىدە شىعارۋى ءتيىس. ءاربىر ادام ۇيدەن شىقپاي، مەملەكەتتىڭ كومەگىن الۋى كەرەك", - دەپ اتاپ كورسەتتى توقاەۆ.
وسى ورايدا پرەزيدەنت الەۋمەتتىك تولەمدى تەك شىن مانىندە كومەككە ءزارۋ جانە توتەنشە جاعدايدا قارجىلاي قيىنداققا تاپ بولعان ازاماتتارعا عانا بەرۋ كەرەكتىگىن جەتكىزدى. ال وسى جاعدايدى پايدالانىپ، الاياقتىق جاسايتىنداردى كوپشىلىكتىڭ الدىندا ايىپتاۋ قاجەت.
