توتەنشە جاعداي كەزىندە ازاماتتاردىڭ كىرىسسىز قالۋىنا بايلانىستى مەملەكەتتىك الەۋمەتتىك ساقتاندىرۋ قورىنان جىبەرىلەتىن 42 500 تەڭگە مولشەرىندەگى تولەمگە وتىنىمدەردى قاراۋ ۋاقىتى ولاردىڭ كوبىسىنىڭ بىرنەشە قايتالانۋىنا بايلانىستى كەشىكتىرىلۋى مۇمكىن. بۇل تۋرالى قوردىڭ ءباسپاسوز قىزمەتى حابارلايدى.
باستاپقىدا بۇل وتىنىمدەردى قاراپ، دەرەكتەردى تەكسەرۋ مەرزىمى 7 جۇمىس كۇنى دەپ بەلگىلەنگەن ەدى. وسى ورايدا، تولەمدەردى تەزىرەك جۇرگىزۋ ءۇشىن، وتىنىمدەردى قاراۋ بارىسى 3 جۇمىس كۇنىنە دەيىن قىسقارتىلدى.
دەگەنمەن، ەسكەرتەرلىگى، ءبىراز ازاماتتار اتالعان قىزمەتكە بىرنەشە رەت جۇگىنگەندى ءجون كورەتىنى بايقالدى. ماسەلەن 8 ءساۋىر تۇنگى 11-دەگى جاعداي بويىنشا 3,1 ملن حابارلامانىڭ 1,3-ءى قايتالاناتىن بولىپ شىقتى.
بارلىق ءوتىنىم سانالۋان دەرەكتەر قورىندا مۇقيات سۇزگىدەن وتەدى. ونىڭ ىشىندە ادامنىڭ اتى-ءجونى، جسن مەن بانك شوتىنىڭ ءنومىرى، جۇمىسىنا قاتىستى ماعلۇماتتار ايرىقشا ەكشەلەدى.
مالىمەتتەردى تەكسەرە كەلە، 42 500 تەڭگەلىك تولەمگە جۇمىس ىستەيتىن، تالاپقا ساي كەلمەيتىن ازاماتتاردىڭ دا يەك ارتىپ، دۇرىس ەمەس بانك شوتتارى نەمەسە بوگدە بىرەۋدىڭ، جارامسىز بانك شوتتارى جولداناتىنى انىقتالدى. سونىمەن قاتار، مارقۇم بولىپ كەتكەن نەمەسە شەتەلدە تۇراتىن تۇلعالاردىڭ اتىنان دا ءوتىنىم بەرىلەتىنى بەلگىلى بولىپ وتىر. الەۋمەتتىك ساقتاندىرۋ جۇيەسىنە ەشقاشان قاتىسپاعان، وعان قاراجات اۋدارماعان ازاماتتار دا ءوتىنىم جىبەرۋدى قۇپ كورگەن. ۇقساس دەرەكتەردىڭ 405 مىڭنان استامى ايقىندالدى، - دەلىنگەن حابارلامادا.
ولاردى تاۋىپ، قايتالاناتىندارىن الىپ تاستاۋ ءۇشىن 3,1 ملن ءوتىنىشتىڭ ارقايسىن جان-جاقتى قارالاۋ قاجەت ەكەنى تۇسىنىكتى.
وسىلايشا ءوتىنىمدى قاراۋ ارالىعى سوزىلىپ كەتۋى ىقتيمال. سوندىقتان، ازاماتتاردان، 3 جۇمىس كۇنىنەن سوڭ تولەمدى تاعايىنداۋ تۋرالى حابارلاما الماساڭىزدار دا الاڭداماۋلارىڭىزدى سۇرايمىز. ءار ءوتىنىش بويىنشا اقپارات تەكسەرىلگەننەن كەيىن مىندەتتى تۇردە ءوتىنىم جولداۋشىعا قابىلدانعان شەشىم جايى جەتكىزىلەدى.
تولەم جاساۋ تۋرالى شەشىم قابىلدانعاننان كەيىن ءوتىنىش بەرۋشىگە SMS-حابارلاما كەلەدى. كەيىننەن ءوتىنىش بەرۋشىنىڭ دەرەكتەرىن مەملەكەتىك الەۋمەتتىك ساقتاندىرۋ قورى "ازاماتتارعا ارنالعان ۇكىمەت" مەملەكەتتىك كورپوراتسياسىنا جىبەرەدى، ول ونى ەكىنشى دەڭگەيدەگى بانكتەرگە تولەم جۇرگىزۋ ءۇشىن باعىتتايدى.
بۇعان دەيىن دە حابارلاعانىمىزداي، الەۋمەتتىك تولەم الۋعا ءوتىنىمدى eGov پورتالى، 42500.enbek.kz ۆەب-سايتى جانە https://t.me/Help42500Bot مەكەنجايى بويىنشا Telegram-بوت ارقىلى بەرۋگە بولادى.
ازاماتتاردان تاعى دا ءوتىنىمدى ءبىر رەت جولداۋدى سۇرايمىز.
ەستەرىڭىزگە سالا كەتەيىك، قولدانىستاعى ەرەجەگە سايكەس، تج كەزەڭىندە قىزمەتتىڭ شەكتەلۋىنە بايلانىستى تابىسىنان ايىرىلعان جاعدايدا مەملەكەتتىك الەۋمەتتىك ساقتاندىرۋ قورىنان ءبىر ادامعا ايىنا 42 500 تەڭگە مولشەرىندە بەرىلەتىن الەۋمەتتىك تولەم كەلەسى ساناتتارعا بەرىلەدى:
– شاعىن جانە ورتا كاسىپكەرلىك سۋبەكتىلەرىنىڭ جالاقىسى ساقتالمايتىن دەمالىستاعى قىزمەتكەرلەرىنە;
– كارانتين ەنگىزىلگەن ەلدىمەكەندەردە قىزمەتىن جۇزەگە اسىراتىن ءىرى كاسىپكەرلىك سۋبەكتىلەرىنىڭ جالاقىسى ساقتالمايتىن دەمالىستاعى قىزمەتكەرلەرىنە;
– مەملەكەتتىك مەكەمەلەردى قوسپاعاندا، كوممەرتسيالىق ەمەس زاڭدى تۇلعالاردىڭ جالاقىسى ساقتالمايتىن دەمالىستاعى قىزمەتكەرلەرىنە;
– جەكە كاسىپكەرلەرگە;
– دارا تاجىريبەمەن اينالىساتىن ادامدارعا (نوتاريۋس، جەكە سوت ورىنداۋشىسى، ادۆوكات، كاسىبي مەدياتور);
– بىرىڭعاي جيىنتىق تولەمدى تولەۋشىلەر بولىپ تابىلاتىن جەكە تۇلعالارعا;
– نىساناسى جۇمىستاردى ورىنداۋ (قىزمەتتەر كورسەتۋ) بولىپ تابىلاتىن ازاماتتىق-قۇقىقتىق سيپاتتاعى شارتتار بويىنشا تابىس تاباتىن، سالىق اگەنتتەرى ولار ءۇشىن مىندەتتى زەينەتاقى جارنالارىن اۋدارعان ادامدارعا.
فوتو: اشىق دەرەككوزدەن
