كوروناۆيرۋس پاندەمياسىنا بايلانىستى ەلىمىزدە ءدىني مەكەرەلەردى تويلاۋعا تىيىم سالىنادى. بۇل تۋرالى اقپارات جانە قوعامدىق دامۋ ءمينيسترى داۋرەن اباەۆ ايتتى، دەپ حابارلايدى Tengrinews.kz.
ءمينيستردىڭ ايتۋىنشا، ءساۋىر ايىندا قازاقستاندىقتار ءۇشىن ماڭىزدى بىرقاتار ماڭىزدى ءدىني مەيرام بار.
"ولار - ورازا، پراۆوسلاۆ، كاتوليكتەردىڭ پاسحاسى، ياھۋدەيلىك پەساح جانە تاعى باسقا. ءسوزسىز ولاردىڭ بارلىعى كوپتەگەن ازاماتقا ۇلكەن ماڭىزى بار. ءبىز ءدىن ۇستانۋشى ازاماتتارىمىزدىڭ ءدىني سەنىمە زور قۇرمەتپەن قارايمىز. الايدا كوروناۆيرۋس ىندەتى بارلىق ادامنىڭ دەنساۋلىعىنا، ومىرىنە قاۋىپ ءتوندىرىپ وتىر. سوندىقتان كوپتەگەن ەل ەپيدەمياعا قارسى بۇرىن-سوڭدى بولماعان شەكتەۋلەر ەنگىزىپ جاتىر. ۆيرۋس تارالماۋى ءۇشىن ادامدار جينالاتىن بارلىق شاراعا، ونىڭ ىشىندە ءدىني شارالارعا دا ۋاقىتشا تىيىم سالىنادى. سەبەبى، بۇل ءدىني شارالار كەزىندە عيبادات ورىندارىندا تۋىستارى جانە جاقىندارىمەن جينالادى. بىرگە مازار باسىنا بارادى", - دەدى ول ونلاين-بريفينگتە.
وسى ورايدا داۋرەن اباەۆ ءدىني مەيرامدار كەزىندە كارانتين رەجيمىن بۇزباۋ قاجەتىن اتاپ ءوتتى.
"قازىرگىدەي كۇردەلى ۋاقىتتا ەڭ باستى ماسەلە – ادامنىڭ دەنساۋلىعى مەن امانداعى. ەشقانداي ءدىن ادام ءومىرى مەن دەنساۋلىعىنا قاۋىپ توندىرگەندى ماقۇلدامايدى. وسى رەتتە بارلىق ءدىني جانە ەتنومادەني ۇيىمداردىڭ باسشىلارى مەن ازاماتتارىن تۇسىنىستىك تانىتۋعا شاقىرامىز. ءدىني مەيرام كەزىندە كارانتين رەجيمىن ساقتاۋدى سۇرايمىز. ءدىني بىرلەستىكتە مەرەكەلىك ءدىني راسىمدەردى ونلاين رەجيمدە وتكىزۋگە ۇسىنامىز", - دەدى مينيستر.
وسىعان دەيىن قورعانىس ءمينيسترى قازاقستاندىقتاردىڭ نەگە اسكەرگە شاقىرىلعانىن ءتۇسىندىرىپ, ولاردىڭ نەمەن اينالاسىتىنىن ايتىپ بەرگەن. 2 ساۋىردە قازاقستان پرەزيدەنتىنىڭ اسكەري مىندەتتىلەردى ارنايى جيىندارعا شاقىرۋ تۋرالى قاۋلىسى جاريالاندى.
ايتا كەتەيىك، ەلىمىزدە كوروناۆيرۋس جۇقتىرعانداردىڭ سانى 453-كە جەتتى. 29 ناۋقاس ايىقتى، 3 ادام قايتىس بولدى.
سونداي-اق، بۇگىن نۇر-سۇلتان مەن الماتىدا دەمالىس اپتاسى ۇزاردى.
ەسكە سالايىق، 16 ناۋرىزدان باستاپ ەلىمىزدە توتەنشە جاعداي جاريالاندى. ال 19 ناۋرىزدا نۇر-سۇلتان مەن الماتى قالالارى كارانتينگە جابىلدى.
