الماتىدا كارانتين ۋاقىتىندا ەكى مىڭ عانا تاكسي كولىگى قىزمەت كورسەتەدى. بۇل تۋرالى الماتى قالاسى وڭىرلىك كوممۋنيكاتسيالار قىزمەتىندە قالا اكىمىنىڭ ءبىرىنشى ورىنباسارى ەرلان قوجاعاپانوۆ ايتتى، دەپ حابارلايدى "ادىرنا"ۇلتتىق پورتالىنىڭ ءتىلشىسى.
ەرلان قوجاعاپانوۆ 1 ساۋىردە 900 قالا تۇرعىنى تاكسي قىزمەتىنە جۇگىنگەنىن، سول سەبەپتى ليتسەنزيا العان تاكسي كومپانيالارىنىڭ 2 مىڭ كولىگى قالا تۇرعىندارىنىڭ سۇرانىسىنا جاۋاپ بەرە الاتىندىعىن ايتتى.
"وزدەرىڭىز بىلەسىزدەر، كارانتينگە بايلانىستى كوپتەگەن باسقا ايماقتىڭ تۇرعىندارى ءوز ايماعىنا كەتتى. ولاردىڭ كوبى تاكسي جۇرگىزۋمەن اينالىستى. كەيبىرى قالدى. ءبىز تاكسي ماسەلەسىن بىلاي شەشتىك: بىرىنشىدەن، قالامىزدا 200-دەن استام رەسمي تاكسي بار. سوسىن Uber, ياندەكس، يندرايۆەر كومپانيالارىندا 80 مىڭنان استام كليەنت بار. سوڭعى 20 كۇننىڭ ىشىندە بەلسەندى جۇرگەن تاكسوموتورلاردى، سوسىن كليەنت بەرگەن ەڭ ۇلكەن رەيتينگىنى قاراپ، كارانتين ۋاقىتىندا 2 مىڭ عانا تاكسيدى قالدىرامىز. كەشە (1 ءساۋىر) وسى كومپانيالارعا 900 عانا شاقىرۋ ءتۇستى. سوندىقتان وسى 2 مىڭ كولىك جەتىپ جاتىر".
"سوڭعى ەكى جۇمانىڭ ىشىندە ياندەكس پەن Uber كومپانيالارىنا كوپتەگەن سۇراق تۇسۋدە. ءبىزدىڭ وتانداستارىمىز ليتسەنزيا سۇرايتىن كورىنەدى، وعان اقشا تولەيمىز دەيتىن كورىنەدى. وسى 2 000 كولىكتەن باسقا تاكسيمەن اينالىسامىن دەگەن كولىكتەرگە تىيىم سالىندى. سوندىقتان ەشقانداي ليتسەنزيا بەرىلمەيدى. ول - قاتە", - دەپ قوستى ەرلان قوجاعاپانوۆ.
قازىرگى كەزەدە الماتى قالاسىندا كوروناۆيرۋس ىندەتىن جۇقتىرعان 90 ادام بار. ەلىمىز بويىنشا انىقتالعاندار سانى - 402. كوروناۆيرۋستان 27 ادام ادام جازىلىپ، 3 ادام قايتىس بولدى.
