كوروناۆيرۋس قالجىڭداساتىن ىندەت ەمەس. بەيقام يتاليانىڭ تاعدىرى ءبىزدى ويلاندىرسا كەرەك ەدى. سالتقا جۇيرىك، داستۇرگە بەرىك قازاق الدىمەن ساقتىق شارالارىن شيراتۋى ءتيىس ەدى. «ساقتانساڭ ساقتايدى»،- دەپ ايتىپ ەدى عوي، اتالارىمىز.
قازىر توتەنشە جاعداي. ساناعا جەتەتىندەي اق ايتىلىپ جاتىر. سالتىڭ دا بار. تاس تۇسكەن جەرگە اۋىر. تاعدىرىڭ تاستى تاستاعان ەكەن، كەز كەلگەن قيىندىققا تاس ءتۇيىن دايىن بولۋىمىز كەرەك ەدى. مەملەكەت ەرىككەننەن كارانتين جارييالاماعان شىعار. نەگە بوسىپ ءجۇرمىز، ءالى؟ اناۋ بەكەتتەردەن ەبىن تاۋىپ، ءوتىپ كەتىپ ەلگە بارىپ، كەلىپ جۇرگەندەر بار دەيدى. «ولاردىڭ اياعىن سىندىر»، - دەۋشى ەدى، باياعىنىڭ اقساقالدارى. قازىر اينالاسى الگىلەردىڭ تاپقىرلىعى مەن ءتىل تابىسۋشىلىق قاسيەتىنە ريزا. «ويىنىڭ وسىلار»، - دەگەندى دە قازاق ايتتى. كۇيىنگەننەن سوڭ. اناۋ قۋلاردىڭ تاستاپ كەتەتىن ءتورت-بەس مىڭ تەڭگەسى قاي جىرتىعىڭا جاماۋ، بەكەتتى اشىپ بەرۋشى باۋىر؟ كامەرا كورمەي قالعان شىعار، تەكسەرۋشى بايقاماي قالعان شىعار، بىراق ءسىز مىرزالىق تانىتقان سول ادام ۆيرۋس تاسىمالداۋشى بولسا شە؟ قاي اۋىلىڭدا ءجىبى ءتۇزۋ اۋرۋحانا بار ەدى؟ قاي اۋرۋحاناسىندا تولىپ تۇرعان ءدارى-دارمەك قويماسىن كورىپ ەدىڭدەر؟ بىرەۋى تورقالى توي دەپ وتەدى-ءمىس، ەكىنشىسى توپىراقتى ولىمگە اسىققان. قۋانىشى قۇتتى بولسىن، ولگەنىنە يمان تىلەدىك. قازىر قۇتتى بولسىن نەمەسە كوڭىل ايتاتىن كەز ەمەس قوي.
ۇستازىم نەس-اعا «اۋىلدى ساقتاۋ» كەرەك دەپ ايقاي سالدى. داۋىسى قاي جەرگە دەيىن جەتكەنىن بىلمەدىك. تىم بولماسا سول اۋىلعا ءوزىمىز ساق بولايىقشى. بارمايىقشى، اۋىلعا. اۋىلعا ءدال قازىر ءبىزدىڭ تۇك پايدامىز تيمەيدى. قىدىرعانىڭدى دا كوتەرەر، الايدا قاۋىپ اپارعانىمىزدان قاپەرسىز عوي. اقەدىل ادامدار ولار، باۋىر كەلدى دەپ بارىن سالادى. اسىن بەرەدى. جانىن سالىپ، كۇتەدى. سول كوڭىلىن ۆيرۋسپەن بىلعاپ كەتسەك شە؟
اۋىلدا ءبارى بار. نيەتتەس ادامدار، باۋىرمال حالىق. بىراق، اۋىلدا قازىر اناۋ ايتقانداي مامان دارىگەر تاپشى. بار دا شىعار، بىراق شتات از عوي. تىم از. ولار الگى بالە بەلەڭ الىپ كەتسە قالاي الىسادى؟ نەسىمەن الىسادى؟ قاپەرسىز بولمايىقشى، اعايىن، قانىپەزەر ەمەسپىز عوي. بارمايىقشى اۋىلعا. بەكەتتى اينالىپ وتۋگە بولادى. ول ءۇشىن كەرەمەت اقىل دا قاجەت ەمەس. ەبىن بىلەسىز دە، ەپتەپ كەتە بەرەسىز. ساناعا ساۋلە تۇسىرەيىكشى.
بارمايىقشى، اۋىلعا! بارماڭىزدارشى، ءبىر-ەكى اي...
امان سەيىتقانوۆ
