Koronavırýs qaljyńdasatyn indet emes. Beıqam Italııanyń taǵdyry bizdi oılandyrsa kerek edi. Saltqa júırik, dástúrge berik Qazaq aldymen saqtyq sharalaryn shıratýy tıis edi. «Saqtansań saqtaıdy»,- dep aıtyp edi ǵoı, atalarymyz.
Qazir tótenshe jaǵdaı. Sanaǵa jetetindeı aq aıtylyp jatyr. Saltyń da bar. Tas túsken jerge aýyr. Taǵdyryń tasty tastaǵan eken, kez kelgen qıyndyqqa tas túıin daıyn bolýymyz kerek edi. Memleket erikkennen karantın jarııalamaǵan shyǵar. Nege bosyp júrmiz, áli? Anaý beketterden ebin taýyp, ótip ketip elge baryp, kelip júrgender bar deıdi. «Olardyń aıaǵyn syndyr», - deýshi edi, baıaǵynyń aqsaqaldary. Qazir aınalasy álgilerdiń tapqyrlyǵy men til tabysýshylyq qasıetine rıza. «Oıynyń osylar», - degendi de qazaq aıtty. Kúıingennen soń. Anaý qýlardyń tastap ketetin tórt-bes myń teńgesi qaı jyrtyǵyńa jamaý, beketti ashyp berýshi baýyr? Kamera kórmeı qalǵan shyǵar, tekserýshi baıqamaı qalǵan shyǵar, biraq siz myrzalyq tanytqan sol adam vırýs tasymaldaýshy bolsa she? Qaı aýylyńda jibi túzý aýrýhana bar edi? Qaı aýrýhanasynda tolyp turǵan dári-dármek qoımasyn kórip edińder? Bireýi torqaly toı dep ótedi-mis, ekinshisi topyraqty ólimge asyqqan. Qýanyshy qutty bolsyn, ólgenine ıman tiledik. Qazir qutty bolsyn nemese kóńil aıtatyn kez emes qoı.
Ustazym Nes-aǵa «Aýyldy saqtaý» kerek dep aıqaı saldy. Daýysy qaı jerge deıin jetkenin bilmedik. Tym bolmasa sol aýylǵa ózimiz saq bolaıyqshy. Barmaıyqshy, aýylǵa. Aýylǵa dál qazir bizdiń túk paıdamyz tımeıdi. Qydyrǵanyńdy da kóterer, alaıda qaýip aparǵanymyzdan qapersiz ǵoı. Aqedil adamdar olar, baýyr keldi dep baryn salady. Asyn beredi. Janyn salyp, kútedi. Sol kóńilin vırýspen bylǵap ketsek she?
Aýylda bári bar. Nıettes adamdar, baýyrmal halyq. Biraq, aýylda qazir anaý aıtqandaı maman dáriger tapshy. Bar da shyǵar, biraq shtat az ǵoı. Tym az. Olar álgi bále beleń alyp ketse qalaı alysady? Nesimen alysady? Qapersiz bolmaıyqshy, aǵaıyn, qanypezer emespiz ǵoı. Barmaıyqshy aýylǵa. Beketti aınalyp ótýge bolady. Ol úshin keremet aqyl da qajet emes. Ebin bilesiz de, eptep kete beresiz. Sanaǵa sáýle túsireıikshi.
Barmaıyqshy, aýylǵa! Barmańyzdarshy, bir-eki aı...
Aman SEIITQANOV
