بايدىڭ مالىن بايقۇس قىزعانادى نەمەسە الماتىداعى جۇقپالى اۋرۋلار اۋرۋحاناسىنان تاعى دا شۋ شىقتى
قر پرەزيدەنتى ق. توقاەۆتىڭ توتەنشە جاعداي كەزەڭىن قامتاماسىز ەتۋ مەملەكەتتىك كوميسسياسىنا كوروناۆيرۋسپەن كۇرەس جۇرگىزىپ جاتقان مەديتسينا قىزمەتكەرلەرىنىڭ جالاقىسىنا ۇستەمە اقى تولەۋ تۋرالى بەرگەن تاپسىرماسىن ەستىگەندە قۋانىپ قالعانبىز. سەبەبى، ءبىزدىڭ ءبارىمىز ۇيدە تىعىلىپ وتىرعاندا اتى جامان ىندەتپەن العى شەپتە الىسىپ جاتقان سولار بولعاندىقتان، ەڭبەكتەرى ەسكەرىلسە دەيسىڭ عوي.
سول ماقساتپەن، بۇعان دەيىن ي.جەكەنوۆا اتىنداعى الماتى قالالىق جۇقپالى اۋرۋلار اۋرۋحاناسى قىزمەتكەرلەرىنىڭ «وتىرار» قوناقۇيىنە ورنالاسقانىمەن، ولاردىڭ تاماقپەن، ارنايى كولىكپەن قامتىلماعانى جابىلا كوتەرگەننىڭ ارقاسىندا عانا ونداعى 60 استام قىزمەتكەر ءۇش مەزگىل تاماقپەن جانە اۆتوبۋسپەن قامتىلعان بولاتىن.
ەندى بۇگىن تاعى شۋ شىعىپ وتىر. اتالعان اۋرۋحانانىڭ اۋرۋلارمەن تىكەلەي جۇمىس جاساپ، تەست الاتىن لابوروتورياسى مەن ۆيرۋستارمەن تىكەلەي جۇمىس جاسايتىن باكتەريالىق لابوروتورياسىنىڭ قىزمەتكەرلەرى مەملەكەتتىك كوميسسيا بەكىتكەن ۇستەماقىدان قاعىلىپ وتىر ەكەن! ءتىپتى، قالانى كارانتينگە جاپقانعا دەيىن، اۋرۋلاردىڭ ءبارىن قالا سىرتىنداعى تۋبەركۋلەز ديسپانسەرلەرى سەكىلدى وقشاۋلاۋ ورتالىقتارىندا ۇستاعان كەزدەن باستاپ، تىنباستان ءوز اياقتارىمەن بارىپ سىناما العان بۇل قىزمەتكەرلەر ءالى كۇنگە دەيىن تىنباستان ناۋقاستارمەن جانە ۆيرۋسپەن تىكەلەي كونتاكتىدە بولىپ كەلەدى.
بۇل دەگەنىڭىز – نونسەنس قوي! سوندا، ۆيرۋس جۇقتىردى دەگەن كۇدىكپەن اۋرۋحانا اكەلىنەتىن ءاربىر ادامنىڭ دياگنوزىن انىقتاۋمەن تىكەلەي اينالىساتىن دارىگەرلەرگە بەرمەگەندە، كىمگە بەرەيىن دەپ وتىر ول ۇستەماقىنى؟!! الدە جۇمىستارىنىڭ قاۋىپتىلىگىن ءبىلدىرۋ ءۇشىن دە ءبىر-ەكى قىزمەتكەر الگى ىندەتتى جۇقتىرۋى قاجەت پە (بەتى اۋلاق)? جالپى وسى الا قويدى بولەك قىرقۋ كىمگە كەرەك بولىپ وتىر؟!!
ءتىپتى، قاجەت بولسا، ءاربىر قالاداعى قازىرگى تاڭدا كوروناۆيرۋسپەن تىكەلەي كۇرەسىپ جاتقان جۇقپالى اۋرۋحانالاردىڭ (ينفەكتسيوننىە بولنيتسى) ءاربىر قىزمەتكەرى بۇل وتەماقىدان قۇر قالماۋ كەرەك دەپ ەسەپتەيمىن. سەبەبى، اللا ساقتاسىن، ەگەر ەلدەگى جاعداي كۇرت ناشارلاسا، ءسىز بەن ءبىزدىڭ، جاقىندارىمىزدىڭ جانىمىزعا اراشا بولاتىن سولار جانە ولار ەلىمىز بويىنشا سونشالىقتى كوپ تە ەمەس. بۇل ماسەلەنى جان-جاقتى كوتەرىپ، بارىنشا تاراتايىق، دوستار!
نۇراددين سادىقوۆ
