مىناۋ كورونوۆيرۋس كىمنىڭ كىم ەكەنىن تاعى سۋ بەتىنە شىعارىپ بەردى. ىرگەدەگى وزبەكتەردىڭ قازاق جەرىن ەمىپ بايىعان پاتوح شوديەۆ اتتى بايى 200 ملن دوللاردى ءوز وزبەگىنىڭ بولاشاق تاعدارى ءۇشىن قۇرباندىققا بايلاي سالدى (مۇنى جوققا شىعارىپ جاتىر، دەسە دە "جەل تۇرماسا، ءشوپتىڭ باسى قيمىلدامايدى). پاتوحتىڭ اتىمتاي جومارتتىعىنا تاڭداي قاعىپ ۇلگەرمەي جاتىپ، قىرعىزدىڭ ومىربەك بابانوۆ اتتى بيزنەسمەن-ساياساتكەرى (وسى ومىربەك بايكە پرەزيدەنتتىككە كانديدات بولعاندا ەلباسى قابىلداپ، المازبەك اتامباەۆ شامدانىپ، بىزدىكىلەر شەكارانى جاۋىپ تاستاپ، قىزىق بولعانى ەستەرىڭىزدە مە؟ بۇل سول - بابانوۆ) 50 ملن دوللارىن قالتاسىنان قىرعىزدىڭ قامى ءۇشىن شىعارا قويدى (ازاتتىق سولاي دەدى).
ال، ءبىزدىڭ شوديەۆ پەن بابانوۆتى مىڭ وراپ الاتىن باي-باعلاندارىمىزدىڭ ىسقىرىعىن جەر جارىپ جيناعان بار اقشاسى 50 ملن دوللارعا ءالى جەتپەپتى.
قازاقستان ورتالىق ازياداعى ەڭ باي مەملەكەت. سول باقۋاتتى مەملەكەتتىڭ بۇكىل بايلىعىنىڭ 55 پايىزى بار بولعانى 162 ادامنىڭ عانا يەلىگىندە. ياعني، مەنىڭ، سەنىڭ، ونىڭ اتا-باباسى قورعاعان جەردىڭ بايلىعىن 162 ادام ۋىسىنان شىعارعىسى كەلمەي وتىر.
باسقانى قويشى، ەلدىڭ، مەملەكەتتىڭ تاعدىرى تارازىعا تارتىلىپ تۇرعاندا بار بايلىقتى باۋىرىنا باسقان شىق بەرمەس شىعايبايلار شوديەۆ پەن بابانوۆتاردى كورمەي وتىر ما؟
سوڭعى ون شاقتى كۇندە شەتتەن ىندەتتى جۇقتىرىپ كەپ جاتقاندار نەگىزىنەن سول 162 ادامنىڭ اينالاسىندا ءجۇرىپ قوندانعاندار ەكەنى تاعى بەلگىلى. ياعني، بيلىكتە اكە-كوكەسى بار ەركەتوتايلار قازاقستان دەگەن ەلدەرى بار ەكەنى ەسىنە ءتۇسىپ اعىلىپ جاتىر (ارينە، ءبىلىم قۋىپ، كاسىپ ىستەپ جۇرگەندەردى كىنالاي المايمىز). زارارسىز جەتسە جاقسى عوي، ىندەتتى وزدەرىمەن الا كەلىپ، ەلدىڭ ودان ارمەن ابىگەرگە سالۋدا.
بۇل ابىگەر كۇندەلىك نانىن ارەڭ تاۋىپ جۇرگەن قارا حالىقتىڭ باسىنا اۋىر سوققى بولىپ ءتيىپ جاتقانىن ويلايتىن ادام بار ما؟
ەلدىڭ شوديەۆ پەن بابانوۆتارىنا قىزعانا قاراپ وتىرماي، قازاقتىڭ نانىن جەپ قومدانعانداردى قارعاي وتىرايىق! قۇداي داۋسىمىزدى ەستىر!
قانات ابىلقايىر
