Mynaý koronovırýs kimniń kim ekenin taǵy sý betine shyǵaryp berdi. Irgedegi ózbekterdiń qazaq jerin emip baıyǵan Patoh Shodıev atty baıy 200 mln dollardy óz ózbeginiń bolashaq taǵdary úshin qurbandyqqa baılaı saldy (muny joqqa shyǵaryp jatyr, dese de "jel turmasa, shóptiń basy qımyldamaıdy). Patohtyń atymtaı jomarttyǵyna tańdaı qaǵyp úlgermeı jatyp, qyrǵyzdyń Ómirbek Babanov atty bıznesmen-saıasatkeri (osy Ómirbek baıke prezıdenttikke kandıdat bolǵanda Elbasy qabyldap, Almazbek Atambaev shamdanyp, bizdikiler shekarany jaýyp tastap, qyzyq bolǵany esterińizde me? Bul sol - Babanov) 50 mln dollaryn qaltasynan qyrǵyzdyń qamy úshin shyǵara qoıdy (azattyq solaı dedi).
Al, bizdiń Shodıev pen Babanovty myń orap alatyn baı-baǵlandarymyzdyń ysqyryǵyn jer jaryp jınaǵan bar aqshasy 50 mln dollarǵa áli jetpepti.
Qazaqstan Ortalyq Azııadaǵy eń baı memleket. Sol baqýatty memlekettiń búkil baılyǵynyń 55 paıyzy bar bolǵany 162 adamnyń ǵana ıeliginde. Iaǵnı, meniń, seniń, onyń ata-babasy qorǵaǵan jerdiń baılyǵyn 162 adam ýysynan shyǵarǵysy kelmeı otyr.
Basqany qoıshy, eldiń, memlekettiń taǵdyry tarazyǵa tartylyp turǵanda bar baılyqty baýyryna basqan shyq bermes Shyǵaıbaılar Shodıev pen Babanovtardy kórmeı otyr ma?
Sońǵy on shaqty kúnde shetten indetti juqtyryp kep jatqandar negizinen sol 162 adamnyń aınalasynda júrip qondanǵandar ekeni taǵy belgili. Iaǵnı, bılikte áke-kókesi bar erketotaılar Qazaqstan degen elderi bar ekeni esine túsip aǵylyp jatyr (árıne, bilim qýyp, kásip istep júrgenderdi kinalaı almaımyz). Zararsyz jetse jaqsy ǵoı, indetti ózderimen ala kelip, eldiń odan ármen ábigerge salýda.
Bul ábiger kúndelik nanyn áreń taýyp júrgen qara halyqtyń basyna aýyr soqqy bolyp tıip jatqanyn oılaıtyn adam bar ma?
Eldiń Shodıev pen Babanovtaryna qyzǵana qarap otyrmaı, qazaqtyń nanyn jep qomdanǵandardy qarǵaı otyraıyq! Qudaı daýsymyzdy estir!
Qanat Ábilqaıyr
