اقوردا توقاەۆتىڭ ارنايى جارلىعىن جاريالادى

3528
Adyrna.kz Telegram

نۇر-سۇلتان، 16 ناۋرىز – Sputnik. قازاقستان پرەزيدەنتى قاسىم-جومارت توقاەۆ داعدارىس جاعدايى كەزىندە زاڭنامالىق اكتىلەرگە وزگەرىستەر مەن تولىقتىرۋلار ەنگىزۋگە قاتىستى ۇكىمەتكە بىرقاتار تاپسىرما بەردى، دەپ حابارلايدى Sputnik قازاقستان.

رەسمي مالىمەتكە سايكەس، وسى قۇجات كونستيتۋتسيانىڭ 44-بابى مەن "قازاقستان رەسپۋبليكاسىنىڭ پرەزيدەنتى تۋرالى" كونستيتۋتسيالىق زاڭ نەگىزىندە قابىلداندى.

نەگىزگى ماقسات - حالىقتىڭ ءومىرى مەن دەنساۋلىعىنا، كونستيتۋتسيالىق قۇرىلىسقا، قوعامدىق ءتارتىپتى ساقتاۋعا، مەملەكەتتىك اپپاراتتىڭ تۇراقتى جۇمىس ىستەۋىنە قاۋىپ توندىرەتىن نەمەسە ءتوندىرۋى مۇمكىن داعدارىستى جاعدايلار كەزىندە مەملەكەتتىك باسقارۋ دەڭگەيلەرى اراسىنداعى وكىلەتتىكتەردى اجىراتۋ.

وسىلايشا، قازاقستان پرەزيدەنتى مەملەكەتتىڭ ىشكى جانە سىرتقى ساياساتىنىڭ نەگىزگى باعىتتارىن ايقىندايتىن، ەل ىشىندە جانە حالىقارالىق قاتىناستاردا قازاقستان اتىنان وكىلدىك ەتەتىن جوعارى لاۋازىمدى تۇلعا رەتىندە الەۋمەتتىك-ەكونوميكالىق سالادا كەلەسى ماسەلەلەر بويىنشا وزگەشە تارتىپپەن مەملەكەتتىك ورگاندارعا تاپسىرما بەرۋگە نەمەسە ءتيىستى اكتىلەردى قابىلداۋعا قۇقىلى:

  • قازاقستان رەسپۋبليكاسىنىڭ كونستيتۋتسياسىندا رەتتەلگەن ماسەلەلەردى قوسپاعاندا، مەملەكەتتىك ورگاندار مەن كۆازيمەملەكەتتىك سەكتور سۋبەكتىلەرىننىڭ قىزمەتى جانە ولاردى ۇيىمداستىرۋ جۇمىسى;
  • سالىق سالۋ، مەملەكەتتىك بيۋدجەتتى قالىپتاستىرۋ، ناقتىلاۋ جانە پايدالانۋ;
  • حالىقتىڭ جانە ەكونوميكانىڭ ۇزدىكسىز تىنىس-تىرشىلىگىن قامتاماسىز ەتۋ ءۇشىن قاجەتتى تاۋارلاردى اكەلۋ جانە اكەتۋ;
  • مەملەكەتتىك مەنشىكتى باسقارۋدى ۇيىمداستىرۋ;
  • ەڭبەكاقى تولەۋ، ازاماتتاردىڭ الەۋمەتتىك قورعالۋى، مەملەكەتتىك الەۋمەتتىك جانە مەديتسينالىق قامتاماسىز ەتۋ، مەديتسينالىق جانە الەۋمەتتىك ساقتاندىرۋ جۇيەسى مەن شارتتارىن قالىپتاستىرۋ;
  • شەكتى تاريفتەردى جانە حالىقتىڭ جانە ەكونوميكانىڭ ۇزدىكسىز تىنىس-تىرشىلىگىن قامتاماسىز ەتۋ ءۇشىن قاجەتتى ازىق-تۇلىك پەن باسقا دا تاۋارلارعا باعالاردى بەلگىلەۋ;
  • باقىلاۋدى جانە قاداعالاۋدى جۇزەگە اسىرۋ;
  • ليتسەنزيالاۋ، رۇقساتتار جانە حابارلامالار;
  • مەملەكەتتىك ساتىپ الۋدى جۇزەگە اسىرۋ;
  • قۇقىق  ءتارتىبىن قامتاماسىز ەتۋ;
  • قارجى نارىقتارى مەن قارجى ۇيىمدارى;
  • ەلدىڭ حالىقارالىق مىندەتتەمەلەرىن ىسكە اسىرۋ;
  • مونوپولياعا قارسى زاڭناما جانە باسەكەلەستىكتى قورعاۋ;
  • قر كونستيتۋتسياسى، قازاقستان پرەزيدەنتى مەن ۇكىمەتىنىڭ اكتىلەرى جانە زاڭدارىندا قاراستىرىلعان وزگە دە فۋنكتسيالار مەن باعىتتاردى جۇزەگە اسىرۋ.

مەملەكەت باسشىسى ۇكىمەتكە ءبىر ايدىڭ ىشىندە زاڭنامالىق اكتىلەرگە وسى جارلىقتى ىسكە اسىرۋعا، سونىڭ ىشىندە قاجەت بولعان كەزدە وزگە دە فۋنكتسيالاردى قايتا بولۋگە باعىتتالعان وزگەرىستەر مەن تولىقتىرۋلاردى ەنگىزۋدى كوزدەيتىن زاڭ جوباسىن ءماجىلىستىڭ قاراۋىنا ەنگىزۋدى تاپسىردى.

 

پىكىرلەر