مەشىتتە ارنايى دۇعا جازىلعان پاراقتار تاراتىلعان
قاۋىپتى ۆيرۋستان قورىققان الماتىلىقتار جاپپاي يمامدارعا اعىلىپ جاتىر. ولار «قۇران سۇرەلەرىن وقىپ، دەم سالعىزسا، الەمگە جايلاعان دەرت وزدەرىنە جۇقپايدى، جولامايدى» دەگەن سەنىممەن كەلەدى. ال مەشىت قىزمەتكەرلەرى جاماعات ازايسا دا، ساقتانۋ ماقساتىندا شيپا دۇعالارىن وقىتۋ ءۇشىن كەلەتىن ادامدار كۇرت كوبەيگەنىن ايتتى، دەپ حابارلايدى Azattyq Rýhy .
«يمامدار ساقتىق شارالارىن ءتۇسىندىرىپ جاتىر. سوڭىندا پرينتەردەن شىعارىپ قويعان مىنانداي دۇعا جازىلعان قاعازداردى وزىمىزبەن بىرگە اكەتىپ، وقىپ جۇرۋگە كەڭەس بەردى. سەنىمگە دە بايلانىستى. سەنىممەن وقىعان سوڭ، «ماعان اۋرۋ جۇقپايدى» دەپ سەنەسىڭ دە، شاپقىلاپ جۇرە بەرەسىڭ»، - دەيدى كوك قاعازداعى دۇعانىڭ ءبىرىن جانىنان تاستاماي وقىپ جۇرگەن جازۋشى ءجادي شاكەن.
«ۆيرۋستان، اۋرۋدان، بالەدەن ساقتايتىن دۇعا» دەپ كورسەتىلگەن جارتى بەتتىك كوك قاعازدا قۇران سۇرەسىنىڭ ارابشا، كيريلشە وقىلۋى مەن قازاقشا ماعىناسى قوسا جازىلعان. الماتىداعى ورتالىق مەشىتتىڭ نايب يمامى يسلامدا اۋرۋدان قورعايتىن جانە كەسەلدەن جازاتىن سۇرە مەن دۇعالاردىڭ كوپ ەكەنىن ايتادى.
«شيپا دۇعالارى، شيپا اياتتارى وتە كوپ. سونىڭ ىشىندە مىنا دۇعا دا ەرەكشە قاسيەتتى دۇعا بولىپ ەسەپتەلەدى. قاعازعا شىعارىپ قويعانبىز، تاراتىپ جاتىرمىز. سۇراعاندارعا بەرىپ جاتىرمىز. اۋرۋدى جولاتپايتىن، قورعايتىن، ياعني بروندالعان ايات-دۇعالار. قۇران كارىمدە جانە پايعامبارىمىزدىڭ حاديستەرىندە ءتۇرلى دەرتكە قارسى وقىلاتىن كوپتەگەن دۇعالار بار. الدىن الا كەلەتىن دەرتتەن ساقتانۋ جانە بويىنداعى اۋرۋدان ساۋىعۋ ءۇشىن اللا ەلشىسى كۇندە ءتۇننىڭ كەزىندە، ۇيقىعا جاتاردان بۇرىن ىقىلاس، فالاق جانە ناس سۇرەلەرىن وقىپ، وزىنە دەم سالعان، ياعني قۇران وقىپ، الاقانىنا ۇرلەگەن، سوسىن ونىمەن بەتىن جانە دەنەسىنىڭ قولى جەتكەن جەرىن سۇرتكەن»، - دەپ ءتۇسىندىردى الماتىداعى ورتالىق مەشىتتىڭ نايب يمامى ەرمەك كوكىرەكباەۆ.
مەشىت قىزمەتكەرلەرىنىڭ سوزىنشە، تەك دۇعامەن شەكتەلۋگە بولمايدى. تازالىقتى ساقتاي وتىرىپ، اۋرۋ تاراعان جەردەن الشاق ءجۇرۋ كەرەك.
«بۇل تۋرالى حاق تاعالا قۇرانداعى «باقارا» سۇرەسىنىڭ 155-اياتىندا «ءشۇباسىز، ءبىز سەندەردى قورقىنىشپەن، اشتىقپەن جانە مال-مۇلىكتەرىڭدى، جاقىندارىڭدى ءارى ونىمدەرىڭدى (تابىستارىڭدى) كەمىتۋ ارقىلى سىنايمىز»، - دەپ ەسكەرتكەن. سونداي-اق، اللا تاعالا ادامزات بالاسىنا: «ءوز باستارىڭدى قاۋىپ-قاتەرگە تىكپەڭدەر»، – دەپ ەسكەرتۋ جاساعان («باقارا» سۇرەسى، 195-ايات). اللا بەرگەن امانات – ءوز ءومىرىمىز بەن دەنساۋلىعىمىزعا دۇرىس كۇتىم جاساماي، قاۋىپ-قاتەرگە كوزسىز ۇرىنار بولساق، تۇبىندە وپىق جەيتىنىمىز ءسوزسىز»، - دەپ ءتۇسىندىردى مەشىت قىزمەتكەرلەرى.
قازىرگى ۋاقىتتا الماتىداعى 51 مەشىتتىڭ ءبارى دەزينفەكتسيالانىپ جاتىر. يمامدار جاماعاتتى بۇرىنعىداي جاپپاي مەشىتكە كەلمەي-اق، ۇيدە ءمىناجات ەتە بەرۋگە شاقىردى. جۇما نامازىندا ۋاعىز ايتىلمايدى، جاماعاتپەن ءتاسپيح تارتىلىپ، دۇعا جاسالمايدى.
ءامىربولات قۇسايىنۇلى، الماتى
