Meshitte arnaıy duǵa jazylǵan paraqtar taratylǵan
Qaýipti vırýstan qoryqqan almatylyqtar jappaı ımamdarǵa aǵylyp jatyr. Olar «Quran súrelerin oqyp, dem salǵyzsa, álemge jaılaǵan dert ózderine juqpaıdy, jolamaıdy» degen senimmen keledi. Al meshit qyzmetkerleri jamaǵat azaısa da, saqtaný maqsatynda shıpa duǵalaryn oqytý úshin keletin adamdar kúrt kóbeıgenin aıtty, dep habarlaıdy Azattyq Rýhy .
«Imamdar saqtyq sharalaryn túsindirip jatyr. Sońynda prınterden shyǵaryp qoıǵan mynandaı duǵa jazylǵan qaǵazdardy ózimizben birge áketip, oqyp júrýge keńes berdi. Senimge de baılanysty. Senimmen oqyǵan soń, «maǵan aýrý juqpaıdy» dep senesiń de, shapqylap júre beresiń», - deıdi kók qaǵazdaǵy duǵanyń birin janynan tastamaı oqyp júrgen jazýshy Jádı Sháken.
«Vırýstan, aýrýdan, báleden saqtaıtyn duǵa» dep kórsetilgen jarty bettik kók qaǵazda Quran súresiniń arabsha, kırılshe oqylýy men qazaqsha maǵynasy qosa jazylǵan. Almatydaǵy Ortalyq meshittiń naıb ımamy ıslamda aýrýdan qorǵaıtyn jáne keselden jazatyn súre men duǵalardyń kóp ekenin aıtady.
«Shıpa duǵalary, shıpa aıattary óte kóp. Sonyń ishinde myna duǵa da erekshe qasıetti duǵa bolyp esepteledi. Qaǵazǵa shyǵaryp qoıǵanbyz, taratyp jatyrmyz. Suraǵandarǵa berip jatyrmyz. Aýrýdy jolatpaıtyn, qorǵaıtyn, ıaǵnı brondalǵan aıat-duǵalar. Quran Kárimde jáne Paıǵambarymyzdyń hadısterinde túrli dertke qarsy oqylatyn kóptegen duǵalar bar. Aldyn ala keletin dertten saqtaný jáne boıyndaǵy aýrýdan saýyǵý úshin Alla elshisi kúnde túnniń kezinde, uıqyǵa jatardan buryn Yqylas, Falaq jáne Nas súrelerin oqyp, ózine dem salǵan, ıaǵnı Quran oqyp, alaqanyna úrlegen, sosyn onymen betin jáne denesiniń qoly jetken jerin súrtken», - dep túsindirdi Almatydaǵy ortalyq meshittiń naıb ımamy Ermek Kókirekbaev.
Meshit qyzmetkerleriniń sózinshe, tek duǵamen shektelýge bolmaıdy. Tazalyqty saqtaı otyryp, aýrý taraǵan jerden alshaq júrý kerek.
«Bul týraly Haq Taǵala Qurandaǵy «Baqara» súresiniń 155-aıatynda «Shúbásiz, Biz senderdi qorqynyshpen, ashtyqpen jáne mal-múlikterińdi, jaqyndaryńdy ári ónimderińdi (tabystaryńdy) kemitý arqyly synaımyz», - dep eskertken. Sondaı-aq, Alla Taǵala adamzat balasyna: «Óz bastaryńdy qaýip-qaterge tikpeńder», – dep eskertý jasaǵan («Baqara» súresi, 195-aıat). Alla bergen amanat – óz ómirimiz ben densaýlyǵymyzǵa durys kútim jasamaı, qaýip-qaterge kózsiz urynar bolsaq, túbinde opyq jeıtinimiz sózsiz», - dep túsindirdi meshit qyzmetkerleri.
Qazirgi ýaqytta Almatydaǵy 51 meshittiń bári dezınfekııalanyp jatyr. Imamdar jamaǵatty burynǵydaı jappaı meshitke kelmeı-aq, úıde minájat ete berýge shaqyrdy. Juma namazynda ýaǵyz aıtylmaıdy, jamaǵatpen táspıh tartylyp, duǵa jasalmaıdy.
Ámirbolat Qusaıynuly, Almaty
