"ماسكەۋ تورىندە ۇلكەن مەشىت سالىنادى" دەگەن حابارلاماعا قارسى شىققان پراۆاسلاۆيەلىك «تسارگراد» بەلسەندىلەرىنە شەشەنستاننىڭ پرەزيدەنتى رامزان قادىروۆ جاۋاپ بەردى. قادىروۆ بەلسەندىلەردى "سوندىق ورىس توپىراعىنا" ادالدىق تانىتسا، دونباسقا بارىپ، رەسەي مۇددەسى ءۇشىن قاسىق قانى قالعانشا ۇرىسقا ارالاسۋعا شاقىردى، دەپ حابارلايدى "ادىرنا" ۇلتتىق پورتالى "دوجد" تەلەارناسىنا سىلتەمە كورسەتە وتىرىپ.
ماسكەۋدەگى پراۆوسلاۆيە وكىلدەرى ءۇشىن كيەلى سانالاتىن "سۆياتوە وزەرو" اۋماعىندا ءىرى مەشىتتىڭ سالىناتىندىعى جايلى تاراعان حابار رەسەي تۇرعىندارىنىڭ "قۇتىن قاشىرعالى" ءبىراز ۋاقىت بولدى. ەل اراسىنداعى مۇنداي اقپاراتقا پراۆاسلاۆيەلىك «تسارگراد» بەلسەندىلەرى قارسى شىعىپ، تۇتاس قالالىق رەفەرەندۋم وتكىزۋدى ۇسىنعان ەدى.
بەلسەندىلەردىڭ "باس كوتەرۋىنە" قاتىستى شەشەنستان پرەزيدەنتى پىكىر ءبىلدىردى.
- ماسكەۋدەگى جاڭا مەشىتتەردىڭ سالىنۋىنا قاتىستى ماسەلەنى ديپلوماتيالىق جولمەن شەشۋ كەرەك، ال "ورىس جەرىنىڭ يدەياسىن" استانا تورىندە ەمەس، دونباسستا قورعاۋ كەرەك. ەگەر وسى ميتينگكە قاتىسۋشىلاردىڭ بارلىعى "ورىس توپىراعىن قورعاۋ" يدەياسىن شىن جۇرەكتەن قالاسا، وندا اۆتوماتپەن ترانشەيالارعا بارسىن! <...> مىقتىسىڭ با، قولىڭا اۆتومات ال! سەنىڭ ورنىڭا بۇگىن دونباسستا سوعىسىپ جاتقان مۇسىلمانعا دەمەۋ بول، ولاردىڭ يىعىنداعى اۆتوماتتى سەن قولدان. وسىلايشا ءوز وتانىڭدى قالاي جاقسى كورەتىنىڭدى سوزبەن نە ارانداتۋشىلىقپەن ەمەس، ءىس جۇزىندە كورسەت! - دەدى شەشەن رەسپۋبليكاسىنىڭ باسشىسى رامزان قادىروۆ ءوزىنىڭ Telegram-ارناسىندا.
شەشەنستان باسشىسى ميتينگشىلەردىڭ ارەكەتىن ارانداتۋشىلىق دەپ باعالادى. ولاردى موبيليزاتسيالاپ نە ساتانيستەردىڭ مۇددەسىنە جۇمىس ىستەگەنى ءۇشىن سوتقا تارتۋ كەرەك ەكەندىگىن ايتتى.
وقىرمان ءۇشىن ايشىقتاي كەتەيىك، مەشىت قۇرىلىسىنا قارسى ميتينگ 2 ناۋرىز كۇنى ماسكەۋدىڭ كوسينو-ۋحتومسكي اۋدانى، "سۆياتوە وزەرو" ماڭىندا ءوتتى. نارازىلىق جايلى "Readovka" ارناسى حابارلادى. ارنانىڭ اقپارىنا سەنسەك، جۇزدەگەن ادام جەرگىلىكتى شىركەۋ ماڭىنا قاسيەتتى مەكەندى قورعاۋ جانە مەشىت قۇرىلىسىن جۇرگىزبەۋ ءۇشىن جينالعان.
رەسەي بيلىگى ءىرى مەشىت قۇرىلىسى تۋرالى حابارلاماعا قاتىستى ءالى رەسمي تۇسىنىكتەمە بەرگەن جوق.
"ادىرنا" ۇلتتىق پورتالى
