مۇنداي بولجامدى ەلىمىزدىڭ باس سانيتار دارىگەرى جانداربەك بەكشين ايتتى، دەپ حابارلايدى azattyq-ruhy.kz.
«ءبىزدىڭ بولجامىمىز بويىنشا، 11-16 ناۋرىز ارالىعىندا قازاقستانعا كوروناۆيرۋس جەتۋى مۇمكىن. ءبىر اپتا كەش، ءبىر اپتا ەرتە. كوروناۆيرۋس پايدا بولا قالعان جاعدايدا ارنايى شارالاردى قولعا الامىز»، - دەدى جانداربەك بەكشين.
باس سانيتار دارىگەر مۇنداي مالىمدەمەنى جۋرناليستەردىڭ «وقۋشىلار مەن ستۋدەنتتەر كوروناۆيرۋسقا قاۋپىنە بايلانىستى قاشىقتان وقۋ رەجيمىنە اۋىسۋى مۇمكىن بە؟» دەگەن سۇراعىنا جاۋاپ بەرگەندە جاسادى. جۋرناليستەردى الاڭداتقان ماسەلە - قازاقستاندا COVID-19 ينفەكتسيالىق اۋرۋ تىركەلمەسە دە ساقتىق شارالارى اياسىندا وقۋشىلار مەن ستۋدەنتتەر قاشىقتان وقۋعا دايىندىعى بولاتىن. بەكشيننىڭ ايتۋىنشا، كوروناۆيرۋس جۇقتىرعان ادام تىركەلگەن جاعدايدا، قازاقستان ارنايى شارالار قابىلداۋعا ساقاداي ساي.
سونداي-اق باس سانيتار دارىگەر ەۋروپانىڭ قامسىز جۇرگەن ەلدەرىندە كوروناۆيرۋس قاتتى ءورشىپ كەتكەنىن ايتىپ، قازاقستان ساقتىق شارالارىن 2020 جىلدىڭ 6 قاڭتارىنان باستاعاندىقتان، ەلدە بۇل ينفەكتسيانى جۇقتىرعان ادام ازىرگە تىركەلگەن جوق.
باس سانيتار ەلدى ەلەڭدەتكەن مالىمدەمەسىنىڭ سەبەبىن ءتۇسىندىردى.
«بۇل بولجام، ال بولجام دەگەنىمىز ءدال كەلە بەرمەيدى. قۇداي ونىڭ بەتىن ارى قىلسىن. بىراق بىزدە عىلىمي توپ بار، ولار ۆيرۋستىڭ كەلۋ قاۋپىن ماتەماتيكالىق مودەلدەۋ ارقىلى ەسەپتەيدى. ماتەماتيكالىق مودەلدەۋ بويىنشا ءبىز (قازاقستان – اۆت.) شەڭبەردىڭ ورتاسىندامىز، ال شەڭبەر تارىلىپ كەلەدى. الدىمەن ۆيرۋس قىتايدا بولدى، كەيىن يران مەن وڭتۇستىك كورەيا قوسىلدى. قازىر ءبىزدى ەۋرووداق ەلدەرى قاتتى الاڭداتىپ وتىر. ۆيرۋستىڭ كەلۋ قاۋپى بىرنەشە ەسەگە ءوستى»، - دەپ ءتۇسىندىردى بەكشين.
