AQSh-tyń memlekettik departamenti 4 naýryz kúni Qytaıdan qashyp ótip, ol jaqtaǵy az sandy musylman ulttary kórip jatqan qysymdy jaıyp salǵan Saıragúl Saýytbaıǵa «Batyl áıelder» halyqaralyq syılyǵyn bergen bolatyn. Osy oqıǵaǵa baılanysty Qytaıdyń Qazaqstandaǵy elshisi Chjan Sıao Feısbýktegi paraqshasynda bylaı dep jazba qaldyrǵan:
«4 naýryzda Vashıngtonda Saıragúl Saýytbaı Memlekettik departamenttiń rejısserlyǵymen áldebir erligi úshin belgisiz bir syılyqty alypty. Bul – Qytaıdyń ishki isine aralasýǵa baǵyttalǵan kópe-kórneý arandatý. Sharanyń ózi bastan aıaq qyzyqsyz ırk bolǵanymen, Vashıngtonnyń túpki aram oıyn áshkerelep berdi.
Shyńjańdaǵy terrorızmmen jáne ekstremızmmen kúreste úlken jetistikke jetkenimizdi kózge ilmeıtin Vashıngton sońǵy jyldary Shyńjań máselesin asyra siltep jiberdi. Túrli jalalardy taratyp, Shyńjańda turaqsyzdyq ornatý arqyly Qytaıdyń túbine jetpek.
Alaıda olardyń aram oıy árdaıym iske aspaı qala beredi. Shyńjań burynǵydan da turaqty aımaqqa aınalyp, halqy beıbit ári baqýatty turyp jatyr.
Tájirıbemiz kórsetkendeı, Qytaı oılap tapqan ekstremızmmen kúres tásili jemisin berdi. Bul – Qytaıdyń terrorızm jáne ekstremızmmen kúreske qosqan zor úlesi.
Vashıngton óz ótirigine ózi senip júr. Bul olardyń nadandyǵynyń belgisi. Ótirikti júz ret qaıtalasań da, shyndyqqa aınalmaıdy. Marapattaýmen baılanysty myna ırk AQSh-tyń ıdeologııalyq vırýstyń eń úlken kózi ekenin kórsetti.
«Batyrǵa» baılanysty aıtarymyz, ol Qytaıda da, Qazaqstanda da qylmysker dep tanylǵan. Onyń erligi – otanyn satý, ózin, otbasyn asyraǵan elge qara kúıe jaǵý. Eger erlik jasaǵysh bolsa, Shyńjańdaǵy nesıesin jappaı ma? Ol óziniń geosaıası ırkte qandaı ról atqaryp júrgenin túsinbeıtini ókinishti».
Chjan Sıao bul ret qana emes, Qazaq elinde bolyp jatqan jaǵdaılarǵa únemi pikir bildirip, qazaqstandyqtardyń a-shý-yzasyn týdyrýmen keledi. Ol osydan eki apta buryn Twitter akkaýntynda koronavırýsqa qoǵamnyń áreketine renishti pikirleri jarııalap, "Qytaımen shekarany jabý durys emes" degen bolatyn.
