كەشە امماندا ازيا جانە مۇحيت جاعالاۋلارى ەلدەرىنىڭ ليتسەنزيالىق ءتۋرنيرى باستالىپ، ەڭ اۋەلى جەرەبەسى تارتىلدى. ءبىزدىڭ جىگىتتەردىڭ جەرەبەلەرى جەڭىلدەۋ تۇسكەن سياقتى. ەشقايسىسى دا ءبىرىنشى اينالىمدا شارشى الاڭعا شىقپايدى. ءتىپتى بۇگىنگى تۇسكى جانە كەشكى سەسسيالاردا جۇدىرىقتاساتىن قىز-جىگىتتەر اراسىندا ءبىزدىڭ ەلدەن ەشكىم جوق. «ەندى قاشان شىعادى» دەپ جانكۇيەرلەرىمىزدىڭ دەلەبەسى قوزىپ وتىرعان شىعار، دەپ جازادى diamondring.kz.
ەندەشە باستايىق:
52 كەلى. ساكەن بيبوسىنوۆ اممان شارشى الاڭىنا ەكىنشى اينالىمدا، 7 ناۋرىز كۇنى شىعادى. قارسىلاسى تاناكا (جاپونيا) – ۋسەناليەۆ (قىرعىزستان) اراسىنداعى جەكپە-جەكتە جەڭىسكە جەتكەن بوكسشى بولادى. وتكەن جىلعى الەم چەمپيوناتىنىڭ كۇمىس جۇلدەگەرى، ءۇندى ءۇمىتى اميت پانگالمەن جارتىلاي فينالعا دەيىن، ال الەم چەمپيونى، وزبەك شاحوبيددين زويروۆپەن فينالعا شەيىن جولى تۇيىسپەيدى.
57 كەلى: سەرىك تەمىرجانوۆ تا توكيو وليمپياداسىنىڭ ىرىكتەۋ تۋرنيرىنە ەكىنشى اينالىمدا (7 ناۋرىز كۇنى) قوسىلادى. قارسىلاسى – يراك بوكسشىسى دجافار ال سۋداني. شيرەك فينالداعى قارسىلاسى پاپۋا جاڭا گۆينەيانىڭ بوكسشىسى چانگ بولۋى مۇمكىن. وسال ەمەس. ال جارتىلاي فينالدا 2019 جىلعى الەم چەمپيونى ميرازيزبەك ميرزاحاليلوۆپەن جۇدىرىق ءتۇيىستىرۋى ىقتيمال.
63 كەلى: زاكير سافيۋللين جىگىتتەردەن ەڭ ءبىرىنشى بولىپ، شارشى الاڭعا شىعادى. نەگىزى، ول دا ءبىرىنشى اينالىمدا رينگكە شىقپايدى. 5 ناۋرىز كۇنى حايدەر كاراۋي (يراك) جانە جۋن شان (قىتاي) جۇبىنىڭ جەڭىمپازىمەن كەزدەسەدى. جارتىلاي فينالدا ازيا چەمپيونى، تاجىك باحودير ۋسمونوۆپەن جولى ءتۇيىسۋى مۇمكىن. ال فينالعا شىقسا، ماڭعول چينزوريگ بااتارسۋحپەن، اۆستراليا ۇزدىگى حارريسون گارسيدپەن نەمەسە وزبەكستان قازاعى ەلنۇر ابدىرايىموۆپەن جولىعۋى كادىك.
69 كەلى. ابىلايحان ءجۇسىپوۆ 6 ناۋرىز كۇنى م.باتتۋمۋر (موڭعوليا) جانە ت.تسارۋمالينگام (كاتار) اراسىندا جەڭىسكە جەتكەن بوكسشىمەن كەزدەسەدى. جارتىلاي فينالداعى قارسىلاسى جەرگىلىكتى يوردانيا ءۇمىتى (Zeyad Eashash) بولىپ زالۋى بەك مۇمكىن. ال فينالعا دەيىن سۇرىنبەي جەتسە، بىلتىرعى الەم چەمپيوناتىندا (جەڭىس تۇعىرىنىڭ ءۇشىنشى ساتىسىندادا) وزىمەن قاتار تۇرعان وزبەك بوبوۋسمون باتۋروۆپەن نەمەسە ازيانىڭ كۇمىس جۇلدەگەرى، جاپون س.وكادزاۆامەن كەزدەسەتىن شىعار.
75 كەلى. ابىلحان امانقۇل 5 ناۋرىزدا ب.ميرزومۋحامماد (تاجىكستان) جانە ج.كيم (كورەيا) جۇبىنىڭ جەڭىمپازىمەن كەزدەسەدى. ودان كەيىن، 8 ناۋرىزدا وزبەك فانات كاحرامونوۆپەن نەمەسە جەرگىلىكتى و.م.ەلسيمرينمەن جولى ءتۇيىسۋى ىقتيمال. جارتىلاي فينالدا ازيا چەمپيوناتىنىڭ قولا جۇلدەگەرى، يران بوكسشىسى سەيەدشاحين مۋساۆيمەن كەزدەسۋى بەك مۇمكىن. ال فينالعا شىقسا، فيليپپين ساڭلاعى ەۋمير مارسيالدان بىلتىرعى الەم چەمپيوناتىنداعى تۇرسىنباي قۇلاحمەتتىڭ ەسەسىن قايتارۋ كەرەك بولادى.
81 كەلى. 2019 جىلعى الەم چەمپيونى بەكزات نۇرداۋلەتوۆ وسى سالماقتىڭ سەركەسى رەتىندە تىركەلگەن. شارشگى الاڭعا 5 ناۋرىز كۇنى شىعىپ، دجەرومە پامپەلونە (جاڭا زەلانديا) جانە رەن ۋتەمۋرا (جاپونيا) اراسىنداعى جەكپە-جەكتە جەڭىسكە جەتكەن بوكسشىنىڭ اۋسەلەسىن بايقاپ كورەدى. اممان رينگىندە ەكاتەرينبۋرگ فينالى قايتالانۋى مۇمكىن دە سياقتى. ويتكەنى وزبەك ديلشودبەك رۋزمەتوۆپەن وعان دەيىن جولى تۇيىسپەيدى...
91 كەلى. ۆاسيلي لەۆيت رينگكە 8 ناۋرىزدا شىعىپ، شيرەك فينالدا داۆلات بولتاەۆ (تاجىكيستان) جانە ەردەنەبايار سانداگسۋرەن (موڭعوليا) جۇبىنىڭ جەڭىمپازىنان ەمتيحان قابىلدايدى. ال بۇدان كەيىن، ياعني جارتىلاي فينالدا (10 ناۋرىزدا) بىلتىر بانگكوكتا وتكەن ازيا چەمپيوناتىندا ءوزىن ەكى رەت نوكداۋنعا تۇسىرگەن كورەيا تارلانى حەون گيۋ كيممەن كەزدەسىپ قالۋى ىقتيمال. بىراق وعان اۋەلى (6 ناۋرىزدا) يوردانيا ءۇمىتى حۋسەين يشايشپەن ايقاسۋ كەرەك بولادى. ول دا وسال ەمەس، ازيا چەمپيوناتىنىڭ قولا جۇلدەگەرى. فينالعا شىقسا، وزبەك سانجار تۇرسىنوۆپەن جولىعىپ قالار...
+91 كەلى. قامشىبەك قوڭقاباەۆ تا 8 ناۋرىزدا، شيرەك فينالدا ءبىر-اق شىعاتىن بولدى. ي.رامەزانپۋردەلاۆاري (يران) جانە م.ايحەمايتي (قىتاي) اراسىندا باعى جانعان الىپپەن كەزدەسەدى. باستى باسەكەلەسى، 2019 جىلعى الەم چەمپيونى، ازيانىڭ ەكى دۇركىن چەمپيونى، وزبەك بوحودير جالولوۆپەن تاعى دا فينالدا جولىعىپ قالار.
ايەلدەر:
51 كەلى. كورىكتى دە، سىمباتتى انگەلينا لۋكاس 7 ناۋرىز كۇنى تايلاند قىزى دجيتپونگ دجۋتاماسپەن كەزدەسەدى.
57 كەلى. سىر بويىنىڭ سۇلۋى، قازالىنىڭ قىزعالداعى دامەتكەن كەلىمبەت قازاق ەلى قىز-جىگىتتەرىنىڭ ىشىنەن العاش بولىپ، اممان شارشى الاڭىنا شىعادى. ول ەرتەڭ قىتاي قىزى دجۋنحۋا يۋنمەن جۇدىرىق تۇيىستىرەدى.
60 كەلى. تاجىريبەلى ريمما ۆولوسەنكو دا يوردانيا رينگىنىڭ كورىگىن ەرتەڭ قىزدىرادى. ول ۇندىستاندىق سيمراندجيتكاۋر بااتپەن كەزدەسىپ، باعىن سىناپ كورەدى.
69 كەلى. ۆالەنتينا حالزوۆا 6 ناۋرىز كۇنى وڭتۇستىك كورەيا ارۋى سيۋەون چويمەن كەزدەسىپ، شيرەك فينالعا شىعۋ قۇقىعىن ساراپقا سالادى.
75 كەلى. نادەجدا ريابەتس تە 6 ناۋرىزدا ءبىرىنشى جەكپە-جەگىن وتكىزەدى. باپكەرلەر سەنىم ارتىپ وتىرعان جاس قىزىمىز «قازاق – وزبەك باسەكەسىن» باستاپ، ناۆباكور حاميدوۆامەن كەزدەسەدى.
