Keshe Ammanda Azııa jáne Muhıt jaǵalaýlary elderiniń lıenzııalyq týrnıri bastalyp, eń áýeli jerebesi tartyldy. Bizdiń jigitterdiń jerebeleri jeńildeý túsken sııaqty. Eshqaısysy da birinshi aınalymda sharshy alańǵa shyqpaıdy. Tipti búgingi túski jáne keshki sessııalarda judyryqtasatyn qyz-jigitter arasynda bizdiń elden eshkim joq. «Endi qashan shyǵady» dep jankúıerlerimizdiń delebesi qozyp otyrǵan shyǵar, dep jazady diamondring.kz.
Endeshe bastaıyq:
52 keli. Sáken Bıbosynov Amman sharshy alańyna ekinshi aınalymda, 7 naýryz kúni shyǵady. Qarsylasy Tanaka (Japonııa) – Ýsenalıev (Qyrǵyzstan) arasyndaǵy jekpe-jekte jeńiske jetken boksshy bolady. Ótken jylǵy álem chempıonatynyń kúmis júldegeri, úndi úmiti Amıt Pangalmen jartylaı fınalǵa deıin, al álem chempıony, ózbek Shahobıddın Zoırovpen fınalǵa sheıin joly túıispeıdi.
57 keli: Serik Temirjanov ta Tokıo Olımpıadasynyń irikteý týrnırine ekinshi aınalymda (7 naýryz kúni) qosylady. Qarsylasy – Irak boksshysy Djafar Al Sýdanı. Shırek fınaldaǵy qarsylasy Papýa Jańa Gvıneıanyń boksshysy Chang bolýy múmkin. Osal emes. Al jartylaı fınalda 2019 jylǵy álem chempıony Mırazızbek Mırzahalılovpen judyryq túıistirýi yqtımal.
63 keli: Zakır Safıýllın jigitterden eń birinshi bolyp, sharshy alańǵa shyǵady. Negizi, ol da birinshi aınalymda rıngke shyqpaıdy. 5 naýryz kúni Haıder Karaýı (Irak) jáne Jýn Shan (Qytaı) jubynyń jeńimpazymen kezdesedi. Jartylaı fınalda Azııa chempıony, tájik Bahodır Ýsmonovpen joly túıisýi múmkin. Al fınalǵa shyqsa, mańǵol Chınzorıg Baatarsýhpen, Avstralııa úzdigi Harrıson Garsıdpen nemese Ózbekstan qazaǵy Elnur Ábdiraıymovpen jolyǵýy kádik.
69 keli. Abylaıhan Júsipov 6 naýryz kúni M.Battýmýr (Mońǵolııa) jáne T.Tsarýmalıngam (Katar) arasynda jeńiske jetken boksshymen kezdesedi. Jartylaı fınaldaǵy qarsylasy jergilikti Iordanııa úmiti (Zeyad Eashash) bolyp zalýy bek múmkin. Al fınalǵa deıin súrinbeı jetse, byltyrǵy álem chempıonatynda (jeńis tuǵyrynyń úshinshi satysyndada) ózimen qatar turǵan ózbek Boboýsmon Batýrovpen nemese Azııanyń kúmis júldegeri, japon S.Okadzavamen kezdesetin shyǵar.
75 keli. Ábilhan Amanqul 5 naýryzda B.Mırzomýhammad (Tájikstan) jáne J.Kım (Koreıa) jubynyń jeńimpazymen kezdesedi. Odan keıin, 8 naýryzda ózbek Fanat Kahramonovpen nemese jergilikti O.M.Elsımrınmen joly túıisýi yqtımal. Jartylaı fınalda Azııa chempıonatynyń qola júldegeri, Iran boksshysy Seıedshahın Mýsavımen kezdesýi bek múmkin. Al fınalǵa shyqsa, Fılıppın sańlaǵy Eýmır Marsıaldan byltyrǵy álem chempıonatyndaǵy Tursynbaı Qulahmettiń esesin qaıtarý kerek bolady.
81 keli. 2019 jylǵy álem chempıony Bekzat Nurdáýletov osy salmaqtyń serkesi retinde tirkelgen. Sharshgy alańǵa 5 naýryz kúni shyǵyp, Djerome Pampelone (Jańa Zelandııa) jáne Ren Ýtemýra (Japonııa) arasyndaǵy jekpe-jekte jeńiske jetken boksshynyń áýselesin baıqap kóredi. Amman rınginde Ekaterınbýrg fınaly qaıtalanýy múmkin de sııaqty. Óıtkeni ózbek Dılshodbek Rýzmetovpen oǵan deıin joly túıispeıdi...
91 keli. Vasılıı Levıt rıngke 8 naýryzda shyǵyp, shırek fınalda Davlat Boltaev (Tájikıstan) jáne Erdenebaıar Sandagsýren (Mońǵolııa) jubynyń jeńimpazynan emtıhan qabyldaıdy. Al budan keıin, ıaǵnı jartylaı fınalda (10 naýryzda) byltyr Bangkokta ótken Azııa chempıonatynda ózin eki ret nokdaýnǵa túsirgen Koreıa tarlany Heon Gıý Kımmen kezdesip qalýy yqtımal. Biraq oǵan áýeli (6 naýryzda) Iordanııa úmiti Hýseın Ishaıshpen aıqasý kerek bolady. Ol da osal emes, Azııa chempıonatynyń qola júldegeri. Fınalǵa shyqsa, ózbek Sanjar Tursynovpen jolyǵyp qalar...
+91 keli. Qamshybek Qońqabaev ta 8 naýryzda, shırek fınalda bir-aq shyǵatyn boldy. I.Ramezanpýrdelavarı (Iran) jáne M.Aıhemaıtı (Qytaı) arasynda baǵy janǵan alyppen kezdesedi. Basty básekelesi, 2019 jylǵy álem chempıony, Azııanyń eki dúrkin chempıony, ózbek Bohodır Jalolovpen taǵy da fınalda jolyǵyp qalar.
Áıelder:
51 keli. Kórikti de, symbatty Angelına Lýkas 7 naýryz kúni Taıland qyzy Djıtpong Djýtamaspen kezdesedi.
57 keli. Syr boıynyń sulýy, Qazalynyń qyzǵaldaǵy Dámetken Kelimbet Qazaq eli qyz-jigitteriniń ishinen alǵash bolyp, Amman sharshy alańyna shyǵady. Ol erteń Qytaı qyzy Djýnhýa Iýnmen judyryq túıistiredi.
60 keli. Tájirıbeli Rımma Volosenko da Iordanııa rınginiń kórigin erteń qyzdyrady. Ol úndistandyq Sımrandjıtkaýr Baatpen kezdesip, baǵyn synap kóredi.
69 keli. Valentına Halzova 6 naýryz kúni Ońtústik Koreıa arýy Sıýeon Choımen kezdesip, shırek fınalǵa shyǵý quqyǵyn sarapqa salady.
75 keli. Nadejda Rıabe te 6 naýryzda birinshi jekpe-jegin ótkizedi. Bapkerler senim artyp otyrǵan jas qyzymyz «Qazaq – Ózbek básekesin» bastap, Navbakor Hamıdovamen kezdesedi.
