قازاقستان مۇسىلماندارى ءدىني باسقارماسى الەم بويىنشا كوروناۆيرۋستىڭ تارالۋىنا بايلانىستى قازاقستاندىقتارعا ۇندەۋ جاسادى دەپ حابارلايدى KAZ.NUR.KZ.
مالىمدەمە باسقارمانىڭ رەسمي سايتىندا جاريالاندى.
قازاقستان مۇسىلماندارى ءدىني باسقارماسى بۇگىندە بۇكىل الەم حالقىنا كوروناۆيرۋس قاۋپى ۇرەي سەۋىپ، دەرتتىڭ وزىنەن گورى كۇننەن-كۇنگە ورشەلەنە تۇسكەن داقپىرتى مەن دابىلى دۇنيە ءجۇزىن دۇرلىكتىرىپ جاتقانىن اتاپ ءوتتى. اتالعان دەرتتىڭ ءبىزدىڭ ەلىمىزدە بەلگىلەرى جوق بولعانىمەن، ءدىني باسقارما ازاماتتاردى ساقتانىپ جۇرۋگە شاقىردى.
"ساقتانساڭ – ساقتايمىن" دەمەكشى، تورتكۇل الەمگە تۇگەل قاۋىپ توندىرگەن دەرتكە نەمقۇرايلىق تانىتىپ، نەمكەتتى قاراۋ – ءوزىمىز ءۇشىن عانا ەمەس، جانىمىزداعى جانداردىڭ ومىرىنە دە اسەرىن تيگىزەرى بەك مۇمكىن. وسى ورايدا، قازاقستان مۇسىلماندارى ءدىني باسقارماسى ەلىمىزدىڭ ءاربىر ازاماتىن قوعامدىق ورىنداردا تازالىق ەرەجەلەرىن ساقتاپ، ءوز دەنساۋلىقتارىنا اسقان مۇقياتتىلىقپەن ءمان بەرىپ، ساقتانىپ جۇرۋگە شاقىرادى.
اللا تاعالا قاسيەتتى قۇراندا ادامزات بالاسىنا: «وزدەرىڭدى ءوز قولدارىڭمەن قاۋىپ-قاتەرگە سالماڭدار»، – دەپ ەسكەرتۋ جاساعان. اللا بەرگەن امانات – ءوز ءومىرىمىز بەن دەنساۋلىعىمىزعا دۇرىس كۇتىم جاساماي، قاۋىپ-قاتەرگە كوزسىز ۇرىنار بولساق، تۇبىندە وپىق جەيتىنىمىز ءسوزسىز", – دەلىنگەن ۆەدومستۆونىڭ مالىمدەمەسىندە.
بۇل تۋرالى اللا ەلشىسى (وعان اللانىڭ سالاۋاتى مەن سالەمى بولسىن) ءوزىنىڭ ءبىر وسيەتىندە: "كىمدە-كىم ەسىنەسە قولىمەن اۋزىن جاپسىن، ويتكەنى زياندى نارسەلەر اۋزىنا كىرەدى", – دەپ بۇيىرعان.
سونداي-اق، شاريعاتتا جۇقپالى اۋرۋلاردىڭ جاي كوزگە كورىنبەيتىن زياندى كۇشى بارىن، بىلىنبەي تارايتىنىن جانە اۋرۋدىڭ ەتەك الۋىن توقتاتۋدا كارانتين قاجەت ەكەنى اتاپ ايتىلعان. ويتكەنى، پايعامبارىمىز (وعان اللانىڭ سالاۋاتى مەن سالەمى بولسىن) ادام بالاسىنىڭ وزىنە دە، وزگەگە دە زيان كەلتۋرۋىنە قاتاڭ تۇردە تىيىم سالعان.
سونىمەن قاتار، ءدىني باسقارما اۋرۋدىڭ بەلگىلەرى پايدا بولعان جاعدايدا قوعامدىق ورىندارعا بارماۋعا كەڭەس بەرەدى.
"قۇرمەتتى، وتانداستار! سىزدە جوتەل پايدا بولىپ، بويىڭىزدا دەنە قىزۋىنىڭ جوعارىلاۋى بايقالسا نەمەسە تىنىس الۋ قيىنعا سوققان جاعدايدا، دەر كەزىندە دارىگەرگە جۇگىنۋگە، سونداي-اق قوعامدىق ورىندارعا، ءتىپتى مەشىتكە كەلۋدى توقتاتىپ، قۇلشىلىقتارىڭىزدى ۇيلەرىڭىزدە ورىنداۋعا كەڭەس بەرەمىز!", – دەلىنگەن حابارلامادا.
ايتا كەتەيىك، كوروناۆيرۋس سالدارىنان ازىربايجانعا اۋە رەيستەرى قىسقارتىلعانىن جازعانبىز.
دۇنيەجۇزىلىك دەنساۋلىق ساقتاۋ ۇيىمىنىڭ سوڭعى مالىمەتىنە سايكەس، كوروناۆيرۋستىڭ سالدارىنان قىتايدان وزگە ەلدەردە 7169 ادام زارداپ شەكتى.
