Qazaqstan musylmandary dinı basqarmasy álem boıynsha koronavırýstyń taralýyna baılanysty qazaqstandyqtarǵa úndeý jasady dep habarlaıdy KAZ.NUR.KZ.
Málimdeme basqarmanyń resmı saıtynda jarııalandy.
Qazaqstan musylmandary dinı basqarmasy búginde búkil álem halqyna koronavırýs qaýpi úreı seýip, derttiń ózinen góri kúnnen-kúnge órshelene túsken daqpyrty men dabyly dúnıe júzin dúrliktirip jatqanyn atap ótti. Atalǵan derttiń bizdiń elimizde belgileri joq bolǵanymen, dinı basqarma azamattardy saqtanyp júrýge shaqyrdy.
"Saqtansań – saqtaımyn" demekshi, tórtkúl álemge túgel qaýip tóndirgen dertke nemquraılyq tanytyp, nemketti qaraý – ózimiz úshin ǵana emes, janymyzdaǵy jandardyń ómirine de áserin tıgizeri bek múmkin. Osy oraıda, Qazaqstan musylmandary dinı basqarmasy elimizdiń árbir azamatyn qoǵamdyq oryndarda tazalyq erejelerin saqtap, óz densaýlyqtaryna asqan muqııattylyqpen mán berip, saqtanyp júrýge shaqyrady.
Alla Taǵala qasıetti Quranda adamzat balasyna: «Ózderińdi óz qoldaryńmen qaýip-qaterge salmańdar», – dep eskertý jasaǵan. Alla bergen amanat – óz ómirimiz ben densaýlyǵymyzǵa durys kútim jasamaı, qaýip-qaterge kózsiz urynar bolsaq, túbinde opyq jeıtinimiz sózsiz", – delingen vedomstvonyń málimdemesinde.
Bul týraly Alla elshisi (oǵan Allanyń salaýaty men sálemi bolsyn) óziniń bir ósıetinde: "Kimde-kim esinese qolymen aýzyn japsyn, óıtkeni zııandy nárseler aýzyna kiredi", – dep buıyrǵan.
Sondaı-aq, sharıǵatta juqpaly aýrýlardyń jaı kózge kórinbeıtin zııandy kúshi baryn, bilinbeı taraıtynyn jáne aýrýdyń etek alýyn toqtatýda karantın qajet ekeni atap aıtylǵan. Óıtkeni, Paıǵambarymyz (oǵan Allanyń salaýaty men sálemi bolsyn) adam balasynyń ózine de, ózgege de zııan keltýrýine qatań túrde tyıym salǵan.
Sonymen qatar, dinı basqarma aýrýdyń belgileri paıda bolǵan jaǵdaıda qoǵamdyq oryndarǵa barmaýǵa keńes beredi.
"Qurmetti, otandastar! Sizde jótel paıda bolyp, boıyńyzda dene qyzýynyń joǵarylaýy baıqalsa nemese tynys alý qıynǵa soqqan jaǵdaıda, der kezinde dárigerge júginýge, sondaı-aq qoǵamdyq oryndarǵa, tipti meshitke kelýdi toqtatyp, qulshylyqtaryńyzdy úılerińizde oryndaýǵa keńes beremiz!", – delingen habarlamada.
Aıta keteıik, koronavırýs saldarynan Ázirbaıjanǵa áýe reısteri qysqartylǵanyn jazǵanbyz.
Dúnıejúzilik densaýlyq saqtaý uıymynyń sońǵy málimetine sáıkes, koronavırýstyń saldarynan Qytaıdan ózge elderde 7169 adam zardap shekti.
