ايماق باسشىسىنىڭ اقجارداعى تارباعاتايلىقتارمەن كەزدەسۋى ادەتتەگىدەن وزگەشە تارتىستى جاعدايعا ءوتتى. حالىقتى ساباسىنا ءتۇسىرىپ، بىردەن تىزگىندى قولعا العان ايماق باسشىسى ناقتى جاۋاپ بەردى، دەپ حابارلايدى التاينيۋس ءتىلشىسى.
مۇنداعى تۇرعىنداردىڭ نەگىزگى تالابى اقجاردى قايتادان اۋدان ورتالىعى ەتىپ، شەكارا ماڭىنداعى ۇدەرە كوشكەن حالىقتىڭ كوشىن توقتاتۋ بولدى.
وبلىس اكىمى دانيال احمەتوۆ بۇل ماسەلەلەردەن حاباردار ەكەنىن، ونى شەشۋ ءۇشىن ۇكىمەتپەن كەڭەسەتىنىن جەتكىزدى. مۇنىڭ ءوزى اقجارلىقتارعا ۇلكەن ءۇمىت سىيلاپ، ولار ريزاشىلىقتارىن قول سوعۋمەن ءبىلدىردى.
حالىق جيىندا جول، دەنساۋلىق ساقتاۋ، تۇرعىن ءۇي، اۋىلشارۋاشىلىعى، سپورت سالاسىنا قاتىستى قوردالانعان ماسەلەلەردى اشىپ ايتتى جانە ساۋالدارىنا سول جەردە تۇششىمدى جاۋاپ الدى.
جيىندا جەرگىلىكتى جومارت كاسىپكەرلەر باسپانا سۇراپ كەلگەن، كوپ جىل ءۇيسىز-كۇيسىز جۇرگەن ءۇش اناعا سول جەردە پاتەر الىپ بەرەتىنىن ايتىپ قۋانتتى.
ال بەلگىلى باپكەر سەرجان وماربەكوۆ اۋىل بالالارىن سپورتقا تارتۋ ماسەلەسىن كوتەردى. سپورت عيماراتتارىنىڭ جەتىسپەيتىنىن ايتتى. دانيال احمەتوۆ بۇل ماسەلەنى بىردەن شەشىپ، قارجى بولەتىنىن جەتكىزدى.
جيىننان سوڭ جۇرت جەكە ماسەلەلەرى بويىنشا دا وبلىس اكىمىمەن جانە باسقارما باسشىلارىمەن جۇزدەستى.
ءوڭىر باسشىسى بەرىلگەن تاپسىرمالاردى ءوزى باقىلاۋعا الىپ، اقجارعا تاعى دا اينالىپ سوعاتىنىن ايتتى.
التاينيۋس
