ەلوردانىڭ ۋاقىتشا ۇستاۋ يزولياتورىندا كوز جۇمعان دۋلات اعادىلدىڭ دەنەسىندە زورلىق-زومبىلىق بەلگىلەرى انىقتالعان جوق. بۇل تۋرالى بۇگىن قالالىق پروكۋراتۋرادان مالىمدەدى دەپ حابارلايدى adyrna.kz.
«25 اقپان كۇنى نۇر-سۇلتان قالاسىنىڭ پوليتسيا دەپارتامەنتى اعادىلدىڭ كوز جۇمۋ جاعدايى بويىنشا سوتقا دەيىنگى تەرگەۋ امالدارىن باستادى. ءدال سول كۇنى بارلىق ءمان-جايدى زەرتتەۋدىڭ شىنايىلىعىن قامتاماسىز ەتۋ ماقساتىندا قىلمىستىق ءىس نۇر-سۇلتان قالالىق پروكۋراتۋراسىنىڭ ارنايى پروكۋرورلارىنىڭ وندىرىسىنە قابىلداندى»، - دەپ حابارلادى.
اتاپ وتىلگەندەي، كوز جۇمعان د.اعادىلدىڭ وتباسىنىڭ ادۆوكاتى بەرگەن ءوتىنىش بويىنشا 26 اقپان كۇنى وزدەرى (وتباسىنىڭ) شاقىرعان جەكە سوت ساراپشىلارىنىڭ (ا. اقانبەكوۆ، ر.ساتىبالديەۆ) قاتىسۋىمەن مارقۇمنىڭ دەنەسىنە زەرتتەۋ جۇرگىزىلگەن. «ونىڭ ناتيجەسى بويىنشا، جۇمىلدىرىلعان ماماندار اعادىلدىڭ ولىمىنە جۇرەك-قانتامىرىنىڭ وتكىر جەتكىلىكسىزدىگى سەبەپ بولعانىن انىقتادى. دەنەسىندە زورلىق-زومبىلىقتان بولاتىن قانداي دا ءبىر جاراقاتتار انىقتالمادى. ىسكە تارتىلعان ساراپشىلار، سونىمەن قاتار ونىڭ باۋىرى مەن ادۆوكاتى تاراپىنان ەسكەرتۋ نەمەسە ءوتىنىش بەرىلگەن جوق. سوت ساراپتاماسىنىڭ قورىتىندىسى لابوراتوريالىق زەرتتەۋ ناتيجەسى بويىنشا بەرىلەدى. سوتقا دەيىنگى تەرگەۋ امالدارى جالعاسۋدا»، - دەپ حابارلايدى ۆەدومستۆودان.
