جامبىل وبلىسىنداعى گۆاردەيسك گارنيزونىندا ورنالاسقان اسكەري بولىمدەردىڭ بىرىندە اسكەري قىزمەتكەر جاراقات الدى. باس اسكەري پوليتسيا باسقارماسى كۇش قولدانۋ فاكتىسى بويىنشا قىلمىستىق ءىس قوزعادى، دەپ حابارلايدى «ادىرنا» ءتىلشىسى.
سارباز الماتى قالاسىنداعى اسكەري-كلينيكالىق گوسپيتالعا جاتقىزىلعان.
«اتالعان فاكت بويىنشا ماتەريالدار سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە تىركەلدى. قازىرگى ۋاقىتتا جان-جاقتى تەكسەرۋ جۇرگىزىلۋدە. تەرگەۋ بارىسىندا وقيعاعا قاتىسى بار تۇلعالاردىڭ، سونداي-اق جارعىعا قايشى ءوزارا قاتىناس فاكتىسى تۋرالى جوعارى تۇرعان قولباسشىلىققا دەر كەزىندە بايانداماعان جانە مەديتسينالىق كومەكتى ۇيىمداستىرۋدا كەمشىلىك جىبەرگەن لاۋازىمدى تۇلعالاردىڭ ارەكەتتەرىنە قۇقىقتىق باعا بەرىلەدى. تەرگەۋ قورىتىندىسى بويىنشا كىنالى تۇلعالار قازاقستان رەسپۋبليكاسىنىڭ زاڭناماسىنا سايكەس قاتاڭ جاۋاپقا تارتىلادى. وقيعا قارۋلى كۇشتەر باسشىلىعىنىڭ ەرەكشە باقىلاۋىندا»، — دەلىنگەن حابارلامادا.
تەرگەۋ كەزىندە اسكەري بولىمدەگى بىرقاتار وفيتسەر قىزمەتىنەن ۋاقىتشا شەتتەتىلگەن.
