Prokýrotýra: Dýlat Aǵadildiń denesinen eshqandaı jaraqat anyqtalǵan joq

5958
Adyrna.kz Telegram

Elordanyń ýaqytsha ustaý ızolıatorynda kóz jumǵan Dýlat Aǵadildiń denesinde zorlyq-zombylyq belgileri anyqtalǵan joq. Bul týraly búgin qalalyq prokýratýradan málimdedi dep habarlaıdy adyrna.kz.

«25 aqpan kúni Nur-Sultan qalasynyń Polıııa departamenti Aǵadildiń kóz jumý jaǵdaıy boıynsha sotqa deıingi tergeý amaldaryn bastady. Dál sol kúni barlyq mán-jaıdy zertteýdiń shynaıylyǵyn qamtamasyz etý maqsatynda qylmystyq is Nur-Sultan qalalyq prokýratýrasynyń arnaıy prokýrorlarynyń óndirisine qabyldandy», - dep habarlady.

Atap ótilgendeı, kóz jumǵan D.Aǵadildiń otbasynyń advokaty bergen ótinish boıynsha 26 aqpan kúni ózderi (otbasynyń) shaqyrǵan jeke sot sarapshylarynyń (A. Aqanbekov, R.Satybaldıev) qatysýymen marqumnyń denesine zertteý júrgizilgen. «Onyń nátıjesi boıynsha, jumyldyrylǵan mamandar Aǵadildiń ólimine júrek-qantamyrynyń ótkir jetkiliksizdigi sebep bolǵanyn anyqtady. Denesinde zorlyq-zombylyqtan bolatyn qandaı da bir jaraqattar anyqtalmady. Iske tartylǵan sarapshylar, sonymen qatar onyń baýyry men advokaty tarapynan eskertý nemese ótinish berilgen joq. Sot saraptamasynyń qorytyndysy laboratorııalyq zertteý nátıjesi boıynsha beriledi. Sotqa deıingi tergeý amaldary jalǵasýda», - dep habarlaıdy vedomstvodan.

 

Pikirler