كەشە، 25 اقپاندا قوعام بەلسەندىسى دۋلات اقادىل تەرگەۋ اباقتىسىندا قازا تاپتى. ىشكى ىستەر مينيسترلىگى وكىلدەرى بۇل قايعىلى وقيعانى "جۇرەك تالماسىنان قايتىس بولدى" دەپ مالىمدەدى.
ال دۋلات اقادىلدى جارتى تاۋلىكتەي ۋاقىت قانا بۇرىن، ياعني 24 اقپاندا تۇنگى ساعات 20:30-21:00 شاماسىندا ۇيىنە باسا-كوكتەپ كىرىپ، زورلىقپەن الىپ كەتكەندە ساپ-ساۋ بولعانىن الەۋمەتتىك جەلىدەگى تاراپ كەتكەن ۆيدەودان ايقىن كورۋگە بولادى.
وسى ۆيدەوعا قاراساڭىز، شوشيسىز... ىشكى ىستەر ءمينيسترى تۇرعىمباەۆتى قايدام، ولارعا ۇيرەنشىكتى جاعداي شىعار، قاراپايىم ەل شوشيتىنى انىق. ويتكەنى، قاس قارايا جەتىپ كەلىپ، بىرەۋدىڭ جەكەمەنشىك ۇيىنە باسا-كوكتەپ كىرگەندەردىڭ توسەگىندە شەشىنىپ الاڭسىز ۇيىقتاپ جاتقان دۋلاتقا اپاي-توپاي باس سالۋىنا قاراساڭ، اقمولا وبلىسى تسەلينوگراد اۋدانى ىشكى ىستەر ءبولىمى پوليتسەيلەرى ەمەس، قاسكوي قاراقشىلار سياقتى...
پوليتسەيلەر ەشقانداي فورماسىز، الدارىنا مەديتسينالىق "جەدەل جاردەم" كولىگىن سالىپ الىپ، وزدەرى جەكە ماشينەمەن جەتىپ كەلگەن. "جەدەل جاردەمدى" دۋلاتتىڭ دەنساۋلىعىنا جانى اشىپ الىپ كەلمەگەن، "بالا اۋىرىپ قالىپ، "جەدەل جاردەم" شاقىردى" دەپ، ءۇيدىڭ ەسىگىن الداپ اشۋ ءۇشىن الىپ كەلگەن. دۋلاتتىڭ ۇلى جانبولاتتىڭ ء"بىز "جەدەل جاردەم" شاقىرعان جوقپىز، كورشى ءۇي بولۋى مۇمكىن" دەپ ەسىكتى جاۋىپ العانىنا قاراماي، ەسىكتى جۇلىپ اشىپ، باس كيىمدەرىن باسا كيىپ، بەتتەرىن بۇركەمەلەپ العان، قىزمەت كۋالىگىن كورسەتپەگەن بوتەن ادامداردى ۇيگە كىرگىزگىسى كەلمەگەن ءجاسوسپىرىم جانبولاتقا كۇش كورسەتىپ، كۋرتكاسىن جىرتىپ، ۇيگە باسىپ كىرەدى. توسەگىندە دەمالىپ جاتقان دۋلاتقا كۇش قولدانىپ، ءىش كيىمىمەن جالاڭاش ەسىككە سۇيرەپ الىپ شىعادى. "كيىم كيگىزبەيسىڭدەر مە؟" دەگەن ايقاي-شۋدان سوڭ عانا كيىمىن كيگىزۋگە ءماجبۇر بولادى...
دۋلات اقادىلدىڭ قازاسىنا بايلانىستى ەلوردادا ىشكى ىستەر مينيسترلىگى عيماراتىنا جينالعان جۇرتقا تۇسىنىك بەرگەن ىشكى ىستەر ۆيتسە-ءمينيسترى، پوليتسيا پولكوۆنيگى ارىستانعاني زاپاروۆ "ازاتتىق" راديوسى ءتىلشىسىنىڭ: "پوليتسيا نەگە فورماسىز بارعان؟" دەگەن سۇراعىنا: "جەدەل ۋاكىلدەر فورماسىز جۇرە بەرۋىنە بولادى. بىراق قىزمەت كولىگىن كورسەتۋى كەرەك جانە قىزمەت كولىگىمەن بارۋى ءتيىس" دەپ جاۋاپ بەردى. ال تسەلينوگراد اۋداندىق ىشكى ىستەر ءبولىمى تەرگەۋشىسى ساعاديەۆ تە فورماسىز بارعان جانە جەدەل ۋاكىلدەر ابباسوۆ پەن عاپپاروۆ تا فورماسىز بارعانى بىلاي تۇرسىن، بۇل ۇشەۋى دە بىرىنشىدەن، ەشقانداي قىزمەتتىك كۋالىكتەرىن كورسەتپەگەن. ەكىنشىدەن قىزمەت كولىگىمەن ەمەس، جەكە كولىكپەن بارىپ الىپ كەتكەن.
ۇشىنشىدەن، بۇلار سوت قاۋلىسىن ورىنداۋ ءۇشىن بارعان بولسا دا، بىرەۋدىڭ ۇيىنە ءتۇن جارىمدا باسىپ كىرىپ، توسەگىندە جاتقان وتاعاسىن وتباسىنىڭ كوزىنشە جالاڭاش سۇيرەپ شىعۋى بارىپ تۇرعان ادام قۇقىن قورلاۋ عوي! ەرتەڭىنە تاڭەرتەڭگى جۇمىس ۋاقىتىندا زاڭدى فورمالارىمەن، قىزمەت كولىگىمەن بارسا، دۋلات شەتەلگە قاشىپ كەتەر مە ەدى؟!. حالىق الدىندا جۇرتتىڭ ءسوزىن سويلەپ، ۇلتتىڭ مۇڭىن ايتىپ، ەل مەن جەر تاعدىرىن قوزعاپ جۇرگەن اتپال ازاماتتى جۇبايى مەن التى بالاسىنىڭ كوزىنشە بۇلاي قورلاۋعا ولارعا كىم قۇقىق بەردى مينيستر تۇرعىمباەۆ مىرزا؟!. ءبىزدىڭ پوليتسيا ءبىزدى قورعاي ما، قورلاي ما؟
بۇل ماسقارا كورىنىسكە قاراپ وتىرىپ، ءبىزدىڭ پوليتسيادا، جالپى ىشكى ىستەر سالاسىندا زاڭ بار ما ءوزى دەپ ويلاۋعا تۋرا كەلەدى...
تاعى ءبىر كوڭىلگە كۇمان تۋدىراتىن تۇيتكىلدى ماسەلە - "دۋلات اقادىلدى الىپ كەتكەندە
ونىڭ ورتا دارەجەلى الكوگول ىشكەنى مەديتسينالىق ساراپتامامەن انىقتالدى" دەگەن سەنىمسىز ءسوز. ال دۋلاتتى جاقسى ءبىلىپ، تىعىز ارالاساتىن جاقىن دوستارى مەن تانىستارى جانە وتباسى مەن تۋعان-تۋىستارى ونىڭ ىشپەيتىنىن، تەمەكى دە تارتپايتىنىن ايتىپ، "بۇل ونى قارالاۋ" دەپ ۆيدەو تاراتتى.
قازىرگى كەزدە، قوعام قىزۋى ونسىز دا كوتەرىلىپ تۇرعاندا، ايدىڭ-كۇننىڭ امانىندا قوعام بەلسەندىسىن، ارىستاي ازاماتتى تۇندە بارىپ ۇيىنەن زورلاپ الىپ كەتىپ، تاڭەرتەڭ "ول ءولدى" دەپ سۋىق حابار ەستىرتۋ دۋلاتتىڭ وتباسى مەن تۋعان-تۋىسى تۇگىلى بۇكىل ەلدىڭ ىزاسىن بۇرق ەتكىزدى. سوندىقتان دا كەشە نۇر-سۇلتان قالاسىندا ىشكى ىستەر مينيسترلىگىنە جينالعان ەل ەشكىم جاۋاپ بەرۋگە دەر كەزىندە شىعا قويماعاسىن، تاۋەلسىزدىك داڭعىلىن جاۋىپ، ولاردى پوليتسيا ءتورت اۆتوبۋسپەن الىپ كەتىپ، حالىق نارازىلىعى بىرازعا سوزىلدى. الماتى مەن شىمكەنتتە جانە تب قالالاردا دا ەل ىشكى ىستەر دەپارتامەنتى الدىنا جينالىپ، قاتتى نارازىلىق تانىتتى. بۇل ونسىز دا ەل الدىندا بەدەلدەن جۇرداي (الماتىداعى سالافيت كۇلىكباەۆتىڭ قاندى جورىعى، قورداي قانتوگىسىندە پوليتسيانىڭ دۇنگەندەردەن تاياق جەۋى، اقتوبەدە ءبىر قىتايدىڭ ءۇش پوليتسەيگە باعىنباي بالاعاتتاپ كەتۋى تب) ىشكى ىستەر مينيسترلىگىنە ءىشى قازانداي قايناعان حالىقتىڭ اشۋ-ىزاسىن تۋدىرۋدا.
ەندى تەك ىشكى ىستەر مينيسترلىگى مەن باس پروكۋراتۋرا بۇل قايعىلى قازانىڭ سەبەبىن ءادىل تەكسەرىپ، كوپشىلىكتە كۇمان قالماۋى ءۇشىن كوميسسياعا دۋلاتتىڭ تۋىستارى مەن قوعام بەلسەندىلەرىن قاتىستىرۋى ءتيىس.
بۇل جەرگە "قارعا قارعانىڭ كوزىن شۇقىمايدى" دەگەن قاساڭ قاعيدا جۇرمەيدى، ول ءىستى ودان سايىن اسقىندىراتىنىن ۇمىتپاۋ كەرەك.
ارتىندا اسىل جارى مەن التىن اسىقتاي التى بالاسى اڭىراپ قالعان ازامات، قوعام قايراتكەرى، الەۋمەتتىك ادىلدىك ءۇشىن كۇرەسكەن قايسار قازاق دۋلات اقادىلدىڭ الدى پەيىش، ارتى كەنىش بولعاي! وتباسىنا، تۋعان-تۋىستارىنا قايعىرىپ، كوڭىل ايتامىز. ۇرپاقتارىنا اللا ۇزاق عۇمىر بەرگەي.
يمانى سالامات بولسىن.
قازىبەك يسا،
قر پرەزيدەنتى جانىنداعى ۇلتتىق كەڭەس مۇشەسى
