دوسىمنىڭ قىزى

532

...ول ەكەۋمىز بالا كەزدەن بىرگە وستىك. ءۇيىمىزدىڭ اراسى دا ونشا قاشىق ەمەس ەدى. ءبىر مەكتەپتە وقىماساق تا، بوس ۋاقىتتا جۇبىمىز جازىلمايتىن. ەسەيە كەلە "قىزدى اۋىلدىڭ ءيتىن ۇرگىزىپ", بىرگە جۇرگەن كۇندەرىمىز قانداي شۋاقتى ەدى. ارمان قۋىپ الماتىعا اتتانعانىمدا، ول اۋىلدا قالدى. جۇرگىزۋشى بولىپ، قالا مەن اۋىلدىڭ اراسىنداعى جولدى ءبىراز توزدىرعانى بار. ءسويتىپ ءجۇرىپ الماتىنىڭ ءبىر ارۋىن اۋىلعا كەلىن عىپ تۇسىرگەندە ءبارىمىز دە قۋانعان ەدىك...كوپ ۇزاماي جايسىز حابار ەستىدىم. كەلىنشەگى توركىندەپ كەتىپ قايتىپ ورالماپتى. ءۇش ايلىق ءسابي بىرگە كەتىپتى. دوس ىشكىلىككە سالىنا باستاعان. توقسانىنشى جىلدار ەدى عوي. ول كەزدە كىم اراققا سالىنبادى دەيسىز! تالاي، تالاي اتپالداي ازاماتتارىمىز وسى ءبىر اجداھانىڭ اۋزىنا ءتۇسىپ، اجال قۇشىپ جاتتى ەمەس پە! دوس تا سولاردان الىسقا بارمادى. اۋىلدا سەندەلىپ ءجۇرىپ، ارتىنان الدەبىر قاڭعىباستاردىڭ جەتەگىندە كەتىپ، قالا ماڭىنداعى ساياجايلاردا ءوزى دە سولاردىڭ جولىنا ءتۇستى دەپ ەستىدىك. دوستارى قولدارىنان كەلگەنىن ىستەدى. ءتىپتى، الگى ازازىلدەن ەمدەيتىن اۋرۋحاناعا دا جاتقىزىپ كوردىك. بولمادى. از ۋاقىتتان سوڭ بۇرىنعى ادەتىنە قايتا باساتىن. سوڭعى رەت دوستاردىڭ ناۋرىزعا جايعان داستارحانىندا كەزدەسىپ ەدىك. اۋرۋحانادان شىققان كەزى بولسا كەرەك، تاتىپ المادى.وتىرىس قىزىپ جاتقان ءبىر تۇستا مەنى قاپسىرا قۇشاقتاپ قۇلاعىما سىبىرلادى.
-دوسىم-اۋ، مەنىڭ ءبىر ارمانىم بار! قىزىمدى كورگىم كەلەدى. قانداي بولىپ ءوستى ەكەن؟
-دەنساۋلىعىڭدى تۇزەپ الساڭ ءالى - اق كورەسىڭ. تەك جازىلىپ كەتشى،-دەگەنىم دە ەسىمدە. ۇلگەرمەدى. ارادا از ۋاقىت وتكەندە قارالى حابار ەستىدىك. ايدالادان ءولى دەنەسىن بىرەۋلەر تاۋىپ الىپتى. الگىنى كوپ ءىشىپ قويعان دەسەدى...
...كابينەتىمدە ادەتتەگىدەي جۇمىس ىزدەگەندەردىڭ رەزيۋمەلەرىن قاراپ وتىرعانمىن. قاسىمدا سپورت شولۋشىمىز
امانكەلدى سەيىتحان ارىپتەسىم دە بار ەدى. ءبىر كەزدە كەزەكتى ءبىر ءومىرباياندى وقي بەرىپ، جۇرەگىم ءدىر ەتە ءتۇستى. ءوز كوزىمە ءوزىم سەنبەي قايتا وقىدىم. سول عوي، سول! اكەسىنىڭ اتى- ءجونىن، ءوزىنىڭ كىشكەنتاي كەزىندە اناسىمەن اجىراسىپ كەتكەنىن جاسىرماي جازىپتى. قىز بالا ەكەن . تاعدىر دەگەندى قويسايشى! دوسىمنىڭ ءومىر بويى ساعىنىپ وتكەن قىزى مەنىڭ الدىما كەلەر دەپ كىم ويلاعان؟ ەرتەڭىنە ۇمىتكەرلەرمەن اڭگىمەلەسۋ بارىسىندا ءوزىن دە كوردىم-اۋ. قايران دوستىڭ اۋزىنان تۇسكەندەي بولىپ، مونتيىپ وتىر. بىراق، ەرتە ەسەيگەن، ءومىردىڭ ءوزى شيرىقتىرعان قىز ەكەنى بىردەن بايقالادى. قانداي ساۋالعا بولسا دا مۇدىرمەستەن جاۋاپ بەرەدى. جۇمىسقا قابىلداۋشىلارعا دا بىردەن ۇنادى.
...مەن ول قىزدى قازىر دە كورىپ قالامىن. قاشان كورسەم اعالاپ تۇرعانى. بىراق "مەن اكەڭنiڭ دوسىمىن" دەپ ايتا المادىم. ەشقاشاندا ايتا المايتىن دا شىعارمىن. "قايدا؟ " دەسە نە دەيمىن؟ اناۋ ءازازىلدىڭ قۇربانى بولدى دەپ قالاي ايتامىن؟ قيالىنداعى اكەنىڭ سول بيىك قالپىندا قالعانى دا دۇرىس شىعار. قايران دوس-اۋ، وسى ءبىر جاۋقازىنداي جايناعان قىزدىڭ ماڭدايىنان يىسكەپ، مىنا ءومىردىڭ راحاتىن كورىپ جۇرەتىن ءجونىڭ بار ەدى عوي. اتتەڭ-اي! اتتەڭ...

ارمان سقابىلۇلى،
2014 جىل.الماتى.

 

پىكىرلەر