تۇركىستان وبلىسى اكىمىنىڭ ەسەبىنە بارعان جۋرناليست ءوزىن پوليتسيانىڭ ۇستاپ اكەتكەنىن حابارلادى

758
تۇركىستان وبلىسىنىڭ اكىمى ومىرزاق شۇكەەۆتىڭ حالىققا ەسەپ بەرۋ جيىنى. تۇركىستان، 14 اقپان 2020 جىل.

امانگەلدى باتىربەكوۆتىڭ ازاتتىققا ايتۋىنشا، ەسەپ ءوتىپ جاتقان زالعا كىرەيىن دەپ جاتقاندا سارىاعاش اۋداندىق پوليتسيا باسقارماسىنىڭ قىزمەتكەرلەرى بەلگىسىز سەبەپپەن كۇش قولدانىپ، پوليتسيا اۆتوبۋسىنا سالىپ الىپ كەتكەن. پوليتسيا وزىنەن بولەك تاعى بىرنەشە ادامدى ۇستاعان.

ءجۋرناليستىڭ ءوزى بىرنەشە رەت Facebook-تا تىكەلەي ەفيرگە شىعىپ، بىرىندە ءوزىن پوليتسيانىڭ اۆتوبۋستان شىعارماي وتىرعانىن، تاعى بىرىندە كولىكپەن بەلگىسىز جاققا اپارا جاتقانىن حابارلادى.

"قۇرمەتتى توقاەۆ مىرزا! بۇل قانداي مەملەكەت؟ بۇل نە دەگەن ادام قۇقىعىن تاپتاۋ؟ مىنا تىرلىكتى قولعا الۋ كەرەكسىز. بۇل وبلىس اكىمىنىڭ ارنايى تاپسىرماسىمەن ىستەلگەن دۇنيە مە؟ الدە مۇنى پوليتسيا ىستەپ وتىر ما؟ بۇنى قالاي تۇسىنۋگە بولادى؟ ءبىز تۇتقىنبىز ما؟" دەدى جۋرناليست ۆيدەوجازبالارىنىڭ بىرىندە.

14 اقپاندا ءتۇس كەزىندە ازاتتىق ءتىلشىسى سارىاعاش اۋداندىق پوليتسيا ءبولىمىنىڭ باسشىسى اسەت يبراگيموۆكە حابارلاسىپ، ءجۋرناليستىڭ ۇستالۋىنا بايلانىستى تۇسىنىكتەمە سۇراعان ەدى. ول وقيعادان حابارسىز ەكەنىن، "جينالىستا وتىرعانىن" ايتتى. ال تۇركىستان قالالىق پوليتسياسى ازىرگە جاۋاپ بەرمەدى.

تۇسكى بىرلەر شاماسىندا پوليتسيانىڭ باتىربەكوۆتى شىمكەنتكە اپارا جاتقانى بەلگىلى بولدى. ونىڭ نە ءۇشىن ۇستالعانى بەلگىسىز.

امانگەلدى باتىربەكوۆ - "جالا جابۋ" جانە "قورلاۋ" باپتارى بويىنشا ءىستى بولىپ، جاقىندا اقتالعان تاۋەلسىز جۋرناليست. ول ايماقتاعى جەمقورلىق سياقتى قوعامدىق ماڭىزدى ماسەلەلەردى كوتەرىپ، ماقالا جازادى. قازىر تۇركىستان وبلىستىق سوتىندا ءجۋرناليستىڭ Facebook-تەگى جازباسىنا بايلانىستى "قورلاۋ" بابى بويىنشا تاعى ءبىر سوت جالعاسىپ جاتىر.

رەسمي باق-تىڭ حابارلاۋىنشا، اكىمنىڭ ەسەپ بەرۋ جيىنىنا 700 تۇرعىن قاتىسقان.

"ازاتتىق" راديوسى

پىكىرلەر