قازاقستان رەسپۋبليكاسى ۇلتتىق مۋزەيىندە «جىر كەرۋەنى» اتتى لەكتسيا-كونتسەرت ءوتتى، دەپ حابارلايدى kazmuseum.kz ءتىلشىسى.ء ىس-شارانى قازاقستان رەسپۋبليكاسى ۇلتتىق مۋزەيى جانىنداعى «حالىق قازىناسى» عىلىمي-زەرتتەۋ ينستيتۋتى ۇيىمداستىردى.
لەكتسيا-كونتسەرتتى قر ەڭبەك سىڭىرگەن قايراتكەرى، قازاق ۇلتتىق ونەر ۋنيۆەرسيتەتىنىڭ پروفەسسورى، «پاراسات» وردەنىنىڭ يەگەرى، جىراۋ الماس الماتوۆ جۇرگىزدى. كەشكە قازاق ۇلتتىق ونەر ۋنيۆەرسيتەتىنىڭ «جىرشىلىق ونەر» كافەدراسىنىڭ ستۋدەنتتەرى مەن ونەر ادامدارى قاتىستى.
شارانىڭ ماڭىزى تۋرالى «حالىق قازىناسى» عىلىمي-زەرتتەۋ ينستيتۋتىنىڭ ديرەكتورى اقان وڭعار اتاپ ءوتتى.
«بۇگىنگىدەي جاھاندانۋ داۋىرىندە ۇلتتىق مۇرانى ساقتاپ، ونى كەيىنگى بۋىنعا جەتكىزىپ وتىرۋ ءار ادامنىڭ ازامماتتىق بورىشى دەپ تۇسىنگەن ابزال. قازاقستان رەسپۋبليكاسىنىڭ ۇلتتىق مۋزەيى تەك قانا جادىگەرلەردى ساقتاۋشى ورىن ەمەس. ول حالىقتىق مۇرانىڭ كەز-كەلگەن تۇرىنە قامقورشى بولا وتىرىپ، رۋحاني ورتا قالىپتاستىرۋدى باستى ماقسات رەتىندە ۇستانىپ وتىرعان ورىن. سوندىقتان دا بۇگىن تاريحتىڭ سوناۋ كونە داۋىرىنەن تامىر الاتىن جىراۋلىق ءداستۇردى ۇلىقتاپ، ارنايى لەكتسيا-كونتسەرت ۇيىمداستىرىپ وتىرمىز»، – دەدى اقان وڭعار.
شاكىرتتەرى اراسىنان 10 جاس جىراۋدى ەرتە كەلگەن ا.الماتوۆ قازىر جىراۋلىق مەكتەپتىڭ قايتا جاڭعىرىپ، دامىعانىن، جاستاردىڭ اراسىندا 10 مىڭ جولدىق داستانداردى جاتقا ايتاتىن جىراۋلاردىڭ ءوسىپ كەلە جاتقانىنا توقتالدى.
«ەلدىڭ تاريحى مەن رۋحانياتى – ءجۇز جىلدىق مادەنيەت، مىڭ جىلدىق وركەنيەتپەن بىزگە جەتكەن، مول قازىنا. بۇگىنگى «جىر كەرۋەنى» كونتسەرتى سوناۋ كونە زاماننان بەرى حالىقتىڭ اقىل مەن پاراساتىنىڭ جيىنتىعىن بىزگە جەتكىزگەن جىر ونەرىنە دەگەن قۇرمەتتىڭ بەلگىسى» – دەدى ا.الماتوۆ.
جىراۋلىق ءداستۇردىڭ تاريحى كۇلتەگىن، تونىكوك، ورحون ەنيسەي جازۋلارىنان، ەستەمىس-بۇمىن قاعاندارعا ارنالعان ماداق جىرلاردان باستالادى. سول جەردەگى ءسوز تىركەستەرى دە، ونداعى ماداق جىرلار دا جىراۋلاردىڭ اۋزىنان شىققان دەۋگە تولىق نەگىز بار. ودان كەيىنگى كەزەڭدەردە قورقىت اتا، سىپىرا جىراۋ، كەتبۇعا، اسان قايعى، شالكيىز، دوسپامبەت، قازتۋعان، ۇمبەتەي، بۇقار جىراۋلاردىڭ تىزبەگى جالعاسادى. جىراۋلار سوزىندە بيىك رۋح پەن ەرەكشە كۇش قۋات بار. جىراۋلار ەلدىڭ مۇڭ-شەرىن، ارمان-ماقساتىن ەش بۇكپەسىز اشىق ايتقان. ولاردىڭ ازاتكەرلىك رۋحى ءداۋىردىڭ قىسپاعىنا بوي بەرمەدى، باستارى نوقتاعا سىيمادى. بۇگىنگى تاڭدا ۇلتتىڭ تاريحي ساناسىن وياتۋ ءۇشىن اتى اتالعان جىراۋلاردىڭ مۇرالارىن قالىڭ كوپشىلىككە ناسيحاتتاۋ قاجەت.
«حالىق قازىناسى» عىلىمي-زەرتتەۋ ينستيتۋتىنىڭ نەگىزگى مىندەتتەرىنىڭ ءبىرى قازاق حالقىنىڭ ءداستۇرلى ونەرىن ناسيحاتتاۋ بولعاندىقتان، جاھاندانۋ زامانىندا باعا جەتپەس قۇندىلىقتارىمىزدى بۇقاراعا جەتكىزە ءبىلۋ ءۇشىن ارنايى لەكتسيا-كونتسەرتتىڭ وتۋىنە باستاماشى بولىپ وتىر.
