Qazaqstan Respublikasy Ūlttyq muzeiınde «Jyr keruenı» atty leksiia-konsert öttı, dep habarlaidy kazmuseum.kz tılşısı. Is-şarany Qazaqstan Respublikasy Ūlttyq muzeiı janyndaǧy «Halyq qazynasy» ǧylymi-zertteu instituty ūiymdastyrdy.
Leksiia-konserttı QR eŋbek sıŋırgen qairatkerı, Qazaq Ūlttyq öner universitetınıŋ professory, «Parasat» ordenınıŋ iegerı, jyrau Almas Almatov jürgızdı. Keşke Qazaq Ūlttyq öner universitetınıŋ «Jyrşylyq öner» kafedrasynyŋ studentterı men öner adamdary qatysty.
Şaranyŋ maŋyzy turaly «Halyq qazynasy» ǧylymi-zertteu institutynyŋ direktory Aqan Oŋǧar atap öttı.
«Bügıngıdei jahandanu däuırınde ūlttyq mūrany saqtap, ony keiıngı buynǧa jetkızıp otyru är adamnyŋ azammattyq boryşy dep tüsıngen abzal. Qazaqstan Respublikasynyŋ Ūlttyq muzeiı tek qana jädıgerlerdı saqtauşy oryn emes. Ol halyqtyq mūranyŋ kez-kelgen türıne qamqorşy bola otyryp, ruhani orta qalyptastyrudy basty maqsat retınde ūstanyp otyrǧan oryn. Sondyqtan da bügın tarihtyŋ sonau köne däuırınen tamyr alatyn jyraulyq dästürdı ūlyqtap, arnaiy leksiia-konsert ūiymdastyryp otyrmyz», – dedı Aqan Oŋǧar.
Şäkırtterı arasynan 10 jas jyraudy erte kelgen A.Almatov qazır jyraulyq mekteptıŋ qaita jaŋǧyryp, damyǧanyn, jastardyŋ arasynda 10 myŋ joldyq dastandardy jatqa aitatyn jyraulardyŋ ösıp kele jatqanyna toqtaldy.
«Eldıŋ tarihy men ruhaniiaty – jüz jyldyq mädeniet, myŋ jyldyq örkenietpen bızge jetken, mol qazyna. Bügıngı «Jyr keruenı» konsertı sonau köne zamannan berı halyqtyŋ aqyl men parasatynyŋ jiyntyǧyn bızge jetkızgen jyr önerıne degen qūrmettıŋ belgısı» – dedı A.Almatov.
Jyraulyq dästürdıŋ tarihy Kültegın, Tonykök, Orhon Enisei jazularynan, Estemıs-Būmyn qaǧandarǧa arnalǧan madaq jyrlardan bastalady. Sol jerdegı söz tırkesterı de, ondaǧy madaq jyrlar da jyraulardyŋ auzynan şyqqan deuge tolyq negız bar. Odan keiıngı kezeŋderde Qorqyt ata, Sypyra jyrau, Ketbūǧa, Asan qaiǧy, Şalkiız, Dospambet, Qaztuǧan, Ümbetei, Būqar jyraulardyŋ tızbegı jalǧasady. Jyraular sözınde biık ruh pen erekşe küş quat bar. Jyraular eldıŋ mūŋ-şerın, arman-maqsatyn eş bükpesız aşyq aitqan. Olardyŋ azatkerlık ruhy däuırdıŋ qyspaǧyna boi bermedı, bastary noqtaǧa syimady. Bügıngı taŋda ūlttyŋ tarihi sanasyn oiatu üşın aty atalǧan jyraulardyŋ mūralaryn qalyŋ köpşılıkke nasihattau qajet.
«Halyq qazynasy» ǧylymi-zertteu institutynyŋ negızgı mındetterınıŋ bırı qazaq halqynyŋ dästürlı önerın nasihattau bolǧandyqtan, jahandanu zamanynda baǧa jetpes qūndylyqtarymyzdy būqaraǧa jetkıze bılu üşın arnaiy leksiia-konserttıŋ ötuıne bastamaşy bolyp otyr.
