قىتاي ۇلتتىق دەنساۋلىق ساقتاۋ كوميسسياسى 11 اقپاندا ەلدە كوروناۆيرۋستان قازا بولعاندار سانى 1016 ادام بولعانىن مالىمدەدى. ۆيرۋس جۇقتىرعاندار سانى 42 638 ادامعا جەتكەنىن مالىمدەدى. قىتايدان بولەك الەمنىڭ 24 ەلىندە 319 كوروناۆيرۋس تىركەلگەن.
قىتاي بيلىگى ۆيرۋس وشاعى حۋبەي پروۆينتسياسىندا 11 اقپاندا 103 ادام ءولىپ، 2097 ادام ۆيرۋس جۇقتىرعانىن حابارلادى.
دۇنيەجۇزىلىك دەنساۋلىق ساقتاۋ ۇيىمى (ددسۇ) 11 اقپاندا قىتايدا تاراعان بۇل ۆيرۋسقا رەسمي اتاۋ بەرىپ، COVID-19 دەپ اتادى.
ۆۆس سايتىنىڭ جازۋىنشا، كوروناۆيرۋستان قازا بولعاندار سانى مىڭنان اسقان تۇستا پەكين «ۆيرۋستىڭ تارالۋىن توقتاتا المادى» دەپ بىرنەشە شەنەۋنىكتى قىزمەتىنەن العان. ولاردىڭ اراسىندا حۋبەي پروۆينتسياسىنداعى دەنساۋلىق ساقتاۋ بويىنشا پارتيا كوميسسياسىنىڭ حاتشىسى جانە كوميسسيا توراعاسى بار. بۇدان بولەك، جەرگىلىكتى قىزىل كرەست ۇيىمى باسشىسىنىڭ ورىنباسارى «مىندەتىن اتقارا المادى» دەپ ورنىنان الىندى. كوممۋنيستىك پارتيانىڭ حۋبەيدەگى وكىلدەرى دە قىزمەتتەن كەتكەن.
ددسۇ ۆيرۋستىڭ قىتايدا بولماعان ادامداردان دا تابىلۋى «جاعدايدى ۋشىقتىرىپ جىبەرۋى مۇمكىن» دەپ قاۋىپتەنەدى. ۇيىم «الەم ەلدەرى ەپيدەميانىڭ جاپپاي تارالىپ كەتۋىنە جول بەرمەۋى ءتيىس» دەپ سانايدى.
قازىر الەم ەلدەرى قىتايدا قالعان ازاماتتارىن جاپپاي شىعارىپ جاتىر. اقپاننىڭ 11-ىنە قاراعان ءتۇنى قازاقستاننىڭ 217 ازاماتى قىتايداعى كوروناۆيرۋسقا بايلانىستى سول ەلدەگى 36 قالادان پەكين ارقىلى ەلگە جەتكىزىلدى. سىرتقى ىستەر مينيسترلىگىنىڭ حابارلاۋىنشا، قىتايدان قازاقستاننىڭ تاعى 150 ازاماتىن ەلگە اكەلۋ جوسپارلانىپ وتىر. ال جۇزدەگەن قازاقستاندىقتىڭ ءوز ەركىمەن قىتايدا قالۋعا تىلەك بىلدىرگەنىن ايتتى.
- ولاردىڭ اراسىندا ديپلوماتيالىق قىزمەتشىلەر، ولاردىڭ وتباسى مۇشەلەرى، ستۋدەنتتەر مەن قىتايدا جۇمىس ىستەپ جاتقان وزگە دە ازاماتتارىمىز بار. قىتايدىڭ وزگە قالالارى كارانتينگە جابىلعان جوق، سوندىقتان ءبىزدىڭ ازاماتتار ءۇشىنشى ەل ارقىلى قازاقستانعا قايتا الادى، - دەپ مالىمدەدى مينيسترلىك وكىلى ايبەك سمادياروۆ.
سي ءتسزينپيننىڭ ايتقانى
جاپونيانىڭ يوكوگاما قالاسىنداعى پورتتا تۇرعان كەمەدە 135 ادام كوروناۆيرۋس جۇقتىرعانى ءمالىم بولدى. وسىدان ون شاقتى كۇن بۇرىن Diamond Princess كرۋيز كەمەسىندە ەكى ادامنىڭ كوروناۆيرۋس جۇقتىرعانى انىقتالعان. Diamond Princess سودان كەيىن كارانتينگە جابىلعان. كرۋيزدە ۆيرۋس جۇقتىرعانداردىڭ ەكەۋى - ۋكراينا ازاماتى. 25 جاستاعى ەر مەن 37 جاستاعى ايەل كەمەنىڭ اسحاناسىندا جۇمىس ىستەگەن. جالپى Diamond Princess ىشىندە ۋكراينانىڭ 25 ازاماتى بولعان.
سوڭعى كۇندەرى جۇرت الدىنا شىعۋدى ازايتقان قىتاي باسشىسى سي تسزينپين 10 اقپاندا پەكيندەگى كوروناۆيرۋس جۇقتىرعاندار جاتقان اۋرۋحاناعا باردى. ول كوروناۆيرۋستى «ەل ەكونوميكاسى مەن قىتايدىڭ بيلىك جۇيەسىنە سىناق» ءارى «وتە اۋىر جاعداي» دەدى. سي تسزينپين كوروناۆيرۋستىڭ تارالۋىن توقتاتۋ ءۇشىن «ناقتى قادامدار» جاساۋعا شاقىردى. قىتاي باسشىسىنىڭ اۋرۋحاناعا بارعان ءساتىن مەملەكەتتىك سسTV ارناسى كورسەتتى.
قىتايدىڭ مەملەكەتتىك باسىلىمدارى جۇرتتى سابىرعا شاقىرىپ جاتىر. 10 اقپاندا مەملەكەتتىك «People’s Daily» گازەتى حالىقتى ۆيرۋسپەن «كوتەرىڭكى كوڭىل كۇيمەن» كۇرەسۋگە شاقىردى.
10 اقپاندا پەكينگە كوروناۆيرۋستى زەرتتەۋ ءۇشىن ددسۇ ساراپشىلارى كەلدى. بۇل كومانداعا بريۋس ەيلۆارد (2014-2016 جىلى باتىس افريكادا تاراعان ەبولا دەرتى بويىنشا كوميسسيانى باسقارعان) جەتەكشىلىك ەتەدى.
ددسۇ قازىر الەمدە كوروناۆيرۋستى انىقتايتىن 168 زەرتحانا بارىن مالىمدەدى.
ۆيرۋس 2019 جىلدىڭ سوڭىندا ۋحانداعى تەڭىز ونىمدەرى بازارىنان تاراعان. كەيبىر اقپارات قۇرالدارىنىڭ جازۋىنشا، بازار 1 قاڭتاردا جابىلعانعا دەيىن وندا تەڭىز ونىمدەرى عانا ەمەس، جارقانات، تاۋىق، قويان مەن جىلان زاڭسىز ساۋدالانىپ كەلگەن. 22 قاڭتار كۇنى «مەديتسينالىق ۆيرۋسولوگيا» جۋرنالىندا زەرتتەۋ جاريالاعان عالىمدار «ۆيرۋستىڭ جىلاننان تاراعانىن» جازدى. مۇنى راستايتىن نە جوققا شىعاراتىن زەرتتەۋلەر ءالى جاريالانبادى.
30 قاڭتاردا ددسۇ كوروناۆيرۋسقا بايلانىستى حالىقارالىق دەڭگەيدە توتەنشە جاعداي جاريالاعان.
"ازاتتىق" راديوسى
