جۇما كۇنى كەشقۇرىم جامبىل وبلىسىنىڭ قورداي اۋدانى، ماسانشى اۋىلى تۇرعىندارىنىڭ اراسىندا توپتىق توبەلەس ورىن الدى. قازاقتار مەن دۇڭگەندەر اراسىنداعى كەلىسپەۋشىلىكتىڭ سوڭى ۇلكەن جانجالعا ۇلاسقان. ماسانشىداعى قاقتىعىس تۋرالى ءتۇرلى بەينەتۇسىرىلىمدەر مەن اقپاراتتار سول كۇنى-اق كەشكە قاراي الەۋمەتتىك جەلىلەردە تاراپ كەتتى. ماسەلەنىڭ ءمانىسى ءالى دە انىقتالۋ ۇستىندە.
وقيعا ورنىنان «ادىرنا» ۇلتتىق پورتالىنىڭ ءتىلشىسى وڭعار قابدەن حابارلايدى.
«حالىق قازىر دۇڭگەندەردى كوشىرۋدى تالاپ ەتىپ وتىر. قازىر كەشەگى قاقتىعىس بولعان ماسانچي اۋىلىنىڭ جانىنداعى قاراكەمەر اۋىلىندا جەرگىلىكتى تۇرعىندار جولدى جاۋىپ تۇر. سونداي-اق جينالعان حالىق كەشە تۇندە قاقتىعىسقا قاتىستى بار دەپ ۇستالعان قاماۋعا الىنعان جىگىتتەردى بوساتۋدى تالاپ ەتۋدە»،-دەدى وڭعار قابدەن.
ءتىلشىمىزدىڭ ايتۋىنشا، حالىقتىڭ دۇڭگەندەردى كوشىرۋىن تالاپ ەتىپ وتىرعان سەبەبى: بۇل ءبىرىنشى مارتە بولعان جاعداي ەمەس. بۇعان دەيىن دە قازاق پەن دۇڭگەندەر اراسىندا تۇسىنىسپەۋشىلىك تالاي مارتە بولعان. جەرگىلىكتى حالىق اۋدانعا كىرگەن اسكەردىڭ كوپ بولسا ءبىر اي تۇراتىنىن، ەرتەڭ ولار كەتسە وزدەرىنىڭ قاۋىپسىزدىگى ءۇشىن الاڭدايتىندىقتارىن ايتقان. سوندىقتان كوپشىلىك «قاۋىپسىزدىگىمىزگە كەپىلدىك بولۋ ءۇشىن دۇڭگەندەر كوشسىن» دەپ تالاپ قويىپ وتىر.
"ادىرنا" ۇلتتىق پورتالى
