Juma kúni keshqurym Jambyl oblysynyń Qordaı aýdany, Masanshy aýyly turǵyndarynyń arasynda toptyq tóbeles oryn aldy. Qazaqtar men dúńgender arasyndaǵy kelispeýshiliktiń sońy úlken janjalǵa ulasqan. Masanshydaǵy qaqtyǵys týraly túrli beınetúsirilimder men aqparattar sol kúni-aq keshke qaraı áleýmettik jelilerde tarap ketti. Máseleniń mánisi áli de anyqtalý ústinde.
Oqıǵa ornynan «Adyrna» ulttyq portalynyń tilshisi Ońǵar Qabden habarlaıdy.
«Halyq qazir dúńgenderdi kóshirýdi talap etip otyr. Qazir keshegi qaqtyǵys bolǵan Masanchı aýylynyń janyndaǵy Qarakemer aýylynda jergilikti turǵyndar joldy jaýyp tur. Sondaı-aq jınalǵan halyq keshe túnde qaqtyǵysqa qatysty bar dep ustalǵan qamaýǵa alynǵan jigitterdi bosatýdy talap etýde»,-dedi Ońǵar Qabden.
Tilshimizdiń aıtýynsha, halyqtyń dúńgenderdi kóshirýin talap etip otyrǵan sebebi: bul birinshi márte bolǵan jaǵdaı emes. Buǵan deıin de qazaq pen dúńgender arasynda túsinispeýshilik talaı márte bolǵan. Jergilikti halyq aýdanǵa kirgen áskerdiń kóp bolsa bir aı turatynyn, erteń olar ketse ózderiniń qaýipsizdigi úshin alańdaıtyndyqtaryn aıtqan. Sondyqtan kópshilik «qaýipsizdigimizge kepildik bolý úshin dúńgender kóshsin» dep talap qoıyp otyr.
"Adyrna" ulttyq portaly
