الدىمەن بولىپ جاتقان جاعدايدى تارازىلاپ كورەلىك:
- بۇل جاعداي ءبىر اي ەمەس، ءبىر جىل ەمەس، 4-5 جىل دامىدى. وسى ۋاقىت ىشىندە 170 مىڭ ادام «ارزان» كولىكتەردى ەلگە الىپ كەلۋ مۇمكىندىگىن پايدالاندى. ال بۇل ۋاقىت ارالىعىندا ءتيىستى ورگاندار قايدا قارادى؟ حالىققا ءتۇسىندىرۋ جۇمىستارى نەگە جۇرگىزىلمەدى؟
- بۇل كولىكتەردى كەدەندىك راسىمدەۋدىڭ ءوزى ءبىر اۆتوكولىكتىڭ قۇنى تۇراتىنىن ەسكەرسەك، ەندى ۇكىمەت ءبىر جىل ىشىندە وسى اۆتوكولىكتەردى ەكىنشى رەت - مەملەكەتتەن ساتىپ الۋدى ۇسىنىپ وتىر.
- كەدەندىك باج نەگىزىنەن رەسەيدىڭ بيۋدجەتىنە كەتەدى، ال ءبىزدىڭ بيۋدجەتكە 7 پايىزعا جۋىعى عانا قالادى. بۇل ءاۋ باستان كەدەن وداعى قۇرىلعان كەزدە ويلاستىرىلعان بولاتىن. بۇل ارەكەتىمەن ءبىزدىڭ بيلىك رەسەيلىك اۆتو ونەركاسىپتى عانا ەمەس، رەسەيلىك بيۋدجەتتى دە قولداعىسى كەلدى.
- كولىكتەردى كادەگە جاراتۋ ءۇشىن ءبىزدىڭ ۇكىمەت مىندەتتەپ وتىرعان تولەم دە ءبىزدىڭ بيۋدجەتكە ەمەس، «روپ» جشس جەكە شوتىنا تۇسەدى. بۇكىل ەل بويىنشا تولەمدى تەك ءوسىبىر جەكە فيرما جينايدى. تولەمدى ۇكىمەت مىندەتتەيدى، ال قارجى جەكە فيرمانىڭ قالتاسىنا تۇسەدى.
ال ەندى وسى تۇيتكىلدى قالاي شەشەمىز؟
- قازاقستاندا سوڭعى 20 جىلدا كۇماندى مۇلىك پەن كولەڭكەلى قاراجات ءبىر ەمەس، ءۇش مارتە زاڭداستىرىلدى. بۇعان دەيىن ءبىزدىڭ ەلدە «10 پايىز تولە دە، تازا ءجۇر» دەگەن ۇرانمەن ءبىراز دۇنيەلەر زاڭداستىرىلدى ەمەس پە؟! مىنە، ارميان كولىكتەرىنە قاتىستى دا وسى باعىتتى ۇستانۋ كەرەك.
- 2010 جىلعا دەيىن قولدانىستا بولعان قازاقستان رەسپۋبليكاسىنىڭ ەشكىمگە تاۋەلسىز ەگەمەندى كەدەن كودەكسىنىڭ «اۆتوموبيلدەردى اكەلۋ تۋرالى» ەرەجەسىن قايتارۋ كەرەك.
- مونوپولياعا قارسى زاڭناماعا سايكەس كەلمەيتىندىكتەن «روپ» جشس تۋرالى ۇكىمەت قاۋلىسىنىڭ كۇشى جويىلىپ، بارلىق مەملەكەتتىك الىمدار ەلدىڭ مەملەكەتتىك بيۋدجەتىنە ءوتۋى ءتيىس.
- ەاەو-دان شىعۋعا دايىندالۋ كەرەك. بۇل پروتسەسس ءبىرشاما ۋاقىتتا الادى. بىرنەشە جىلدار كەتۋى دە مۇمكىن. بىراق ەكونوميكالىق ءال-اۋقاتىمىزدى كوتەرگىمىز كەلسە، بۇعان بارۋىمىز كەرەك. باسقا جول جوق. ايتپەسە، ءبىز ودان ءارى وسى قۇلدىق پەن كەدەيشىلىكتەن شىعا الماي قالامىز.
مۇحتار تايجان
