قىتاي باسشىسى سي تسزينپين قىتايلىق جاڭا جىل مەرەكەسىنە قاتىستى وتكەن ۇكىمەتتىڭ ارنايى جينالىسىنان كەيىن جاڭا ىندەتتى اۋىزدىقتاۋ قيىنعا ءتۇسىپ جاتقانىن مالىمدەدى. بۇل تۋرالى nege.kz حابارلادى.
سي تسزينپين ۇكىمەت مۇشەلەرىنە ەلدىڭ «اۋىر جاعدايدا قالعانىن» ايتقان. جاڭا جىل قارساڭىندا ۋحان قالاسىنان تاراي باستاعان جاڭا ىندەتكە شالدىققاندار قاتارى كۇن سايىن كوبەيۋدە. قازىر قىتايدىڭ بىرقاتار قالاسىنا كىرىپ-شىعۋعا شەكتەۋ قويىلعان. جەكسەنبىدەن باستاپ ۋحان قالاسىنىڭ ورتالىعىندا جەكە كولىكتەردىڭ جۇرۋىنە تىيىم سالىنادى.
قىتاي بيلىگى بىرنەشە اپتا ىشىندە وسى قالادا كوروناۆيرۋس ىندەتىن جۇقتىرعاندارعا ارنالعان 1 300 ورىندىق جاڭا اۋرۋحانا سالىپ بىتىرمەك. ودان كەيىن ءبىر-ەكى اپتادان سوڭ تاعى وسىنداي ەكىنشى جاڭا اۋرۋحانا پايدالانۋعا بەرىلەدى. قىتايدىڭ كوپ قالاسىندا سەنبى كۇنى باستالعان قىتايلىق جاڭا جىلعا بايلانىستى جوسپارلانعان شارالاردى وتكىزۋگە تىيىم سالىنعان.
جاڭا كوروناۆيرۋستىڭ بەلگىلەرى قانداي؟
جاڭا ۆيرۋس اۋا ارقىلى جۇعاتىن اۋىر جۇقپا تۇرىنە جاتادى. العاشىندا ادامنىڭ قىزۋى كوتەرىلىپ، جوتەلە باستايدى. ءبىر اپتادان سوڭ ادامنىڭ تىنىس الۋى قيىنداپ كەتەدى. دارىگەرلەر بۇل ىندەتتەن كوز جۇمعانداردىڭ دەنى بۇرىننان دەنساۋلىعى ناشار، جۇرەك-قان تامىرلارى دەرتىنە شالدىققاندار ەكەنىن ايتادى.
ۆيرۋس قانشالىقتى تەز تارايدى؟
ۇلىبريتانياداعى جۇقپالى اۋرۋلاردى ساراپتاۋ ورتالىعىنىڭ عالىمدارى قىتايداعى ىندەتتى الەمگە تاراتپاي اۋىزدىقتاۋ قولدان كەلمەيدى دەپ بولجاۋدا. ولاردىڭ ايتۋىنشا، ادامنان ادامعا جۇعاتىن كوروناۆيرۋس ىندەتىنىڭ اۋقىمى وتە ۇلكەن بولادى. مامانداردىڭ ەسەبىنشە، اۋرۋ جۇقتىرعان ءار ادام ورتاشا 2,5 ادامعا تاراتادى. ورتالىق وكىلدەرى ىندەتتى توقتاتۋ ءۇشىن ۆيرۋستىڭ جايىلۋ دەڭگەيىن كەمىندە 60%-عا تومەندەتۋ كەرەكتىگىن ايتادى.
