Qytaı basshysy Sı zınpın qytaılyq jańa jyl merekesine qatysty ótken úkimettiń arnaıy jınalysynan keıin jańa indetti aýyzdyqtaý qıynǵa túsip jatqanyn málimdedi. Bul týraly nege.kz habarlady.
Sı zınpın úkimet múshelerine eldiń «aýyr jaǵdaıda qalǵanyn» aıtqan. Jańa jyl qarsańynda Ýhan qalasynan taraı bastaǵan jańa indetke shaldyqqandar qatary kún saıyn kóbeıýde. Qazir Qytaıdyń birqatar qalasyna kirip-shyǵýǵa shekteý qoıylǵan. Jeksenbiden bastap Ýhan qalasynyń ortalyǵynda jeke kólikterdiń júrýine tyıym salynady.
Qytaı bıligi birneshe apta ishinde osy qalada koronavırýs indetin juqtyrǵandarǵa arnalǵan 1 300 oryndyq jańa aýrýhana salyp bitirmek. Odan keıin bir-eki aptadan soń taǵy osyndaı ekinshi jańa aýrýhana paıdalanýǵa beriledi. Qytaıdyń kóp qalasynda senbi kúni bastalǵan qytaılyq jańa jylǵa baılanysty josparlanǵan sharalardy ótkizýge tyıym salynǵan.
Jańa koronavırýstyń belgileri qandaı?
Jańa vırýs aýa arqyly juǵatyn aýyr juqpa túrine jatady. Alǵashynda adamnyń qyzýy kóterilip, jótele bastaıdy. Bir aptadan soń adamnyń tynys alýy qıyndap ketedi. Dárigerler bul indetten kóz jumǵandardyń deni burynnan densaýlyǵy nashar, júrek-qan tamyrlary dertine shaldyqqandar ekenin aıtady.
Vırýs qanshalyqty tez taraıdy?
Ulybrıtanııadaǵy juqpaly aýrýlardy saraptaý Ortalyǵynyń ǵalymdary Qytaıdaǵy indetti álemge taratpaı aýyzdyqtaý qoldan kelmeıdi dep boljaýda. Olardyń aıtýynsha, adamnan adamǵa juǵatyn koronavırýs indetiniń aýqymy óte úlken bolady. Mamandardyń esebinshe, aýrý juqtyrǵan ár adam ortasha 2,5 adamǵa taratady. Ortalyq ókilderi indetti toqtatý úshin vırýstyń jaıylý deńgeıin keminde 60%-ǵa tómendetý kerektigin aıtady.
