فوتو: VCG
قىتاي مەن پاكىستان اراسىندا عارىش سالاسىنداعى ىنتىماقتاستىق جاڭا بەلەسكە شىقتى. پاكستاندىق ەكى استروناۆت مۇحامماد زيشان الي مەن حۋررام داۋد قىتايعا جەتىپ، پەكيندەگى عارىشكەرلەردى دايارلاۋ ورتالىعىندا عارىشقا ۇشۋ ءۇشىن دايىندىقتارىن باستادى.
بۇل وقيعا قىتايدىڭ پيلوتتى عارىش باعدارلاماسى ءۇشىن ەرەكشە كەزەڭ بولىپ سانالدى، ويتكەنى ەكى پاكىستاندىق عارىشكەر العاش رەت شەتەلدىك ۇمىتكەرلەر رەتىندە دايىندىققا الىنعان. ولاردىڭ ىرىكتەۋى ءساۋىر ايىنىڭ باسىندا اياقتالدى.
دايىندىق بارىسىندا عارىش ستانتسياسىنىڭ بورتتىق جۇيەلەرىمەن جۇمىس ىستەۋ، عىلىمي تاجىريبەلەر جۇرگىزۋ جانە توتەنشە جاعدايلارداعى ارەكەتتەردى ۇيرەنۋ قامتىلعان. باعدارلامانى اياقتاعاننان كەيىن ءبىر قاتىسۋشى تاڭدالىپ، ول پايدالى جۇكتىڭ مامانى رەتىندە ۇشىپ، ستانتسياداعى عىلىمي باعدارلامانى باسقارۋعا جاۋاپتى بولادى.
بۇل ۇشۋ قىتايدىڭ «تيانگۋن» عارىش ستانتسياسىندا شەتەلدىك استروناۆتتىڭ العاشقى قاتىسۋى بولادى.
دايىندىقتىڭ ەڭ ماڭىزدى بولىگى – «تيانگۋن» عارىش ستانتسياسىندا جۇمىس ىستەيتىن نەگىزگى بورتتىق جۇيەلەرمەن تانىسۋ جانە ولاردى ءتيىمدى پايدالانۋ. سونداي-اق، قاتىسۋشىلار ستانتسيادا عارىشتىق عىلىمي باعدارلامالاردى جۇرگىزۋ جانە زەرتتەۋلەر جاساۋ بويىنشا جۇمىستاردى ورىندايدى. عىلىمي باعدارلامانىڭ ىشىندە بيولوگيا، فيزيكا جانە عارىشتىق تەحنولوگيالار سالاسىنداعى كوپتەگەن تاجىريبەلەردى ورىنداۋ جوسپارلانعان.
