ۇكىمەتتىڭ جۇمىس ساپاسىن ارتتىرۋ ءۇشىن مەملەكەتتىك اپپاراتتى رەفورمالاۋ قاجەت – ساراپشى

190

قر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى الماتى قالاسىنداعى وكىلدىگىنىڭ باسشىسى، ەكونوميكا عىلىمدارىنىڭ Ph.D دوكتورى اسەل ابەن قر ۇكىمەتىنىڭ كەڭەيتىلگەن وتىرىسىنداعى باستامالار تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

جيىندا مەملەكەت باسشىسى قاسىم-جومارت توقاەۆ ەكونوميكالىق رەفورمالاردىڭ جاڭا باعىتى قاجەتتىگىن اتاپ وتكەن.

«پرەزيدەنت قاسىم-جومارت توقاەۆ رەفورمالاۋدىڭ ناقتى باعىتتارىن بەلگىلەدى، ولار – لايىقتى ەڭبەكاقى تولەنەتىن جۇمىس ورىندارىن قۇرۋ، ادام كاپيتالىنىڭ ساپاسىن ارتتىرۋ، ايقىن جانە پراگماتيكالىق سالىق-بيۋدجەت ساياساتى، جەكە كاسىپكەرلىك پەن باسەكەلەستىكتى دامىتۋ. ەكونوميكانىڭ ساپالى وسىمىنە قول جەتكىزۋ ءۇشىن مەملەكەت باسشىسى قاجەتتى شارتتاردى ناقتى بەلگىلەدى: «ايقىن ماقساتتار، تۇسىنىكتى مىندەتتەر جانە ولاردىڭ تولىق ورىندالۋى»، - دەدى سپيكەر قازاقپارات تىلشىسىنە بەرگەن سۇحباتىندا.

ونىڭ ايتۋىنشا، كوپ جاعدايدا ورىن العان ماسەلەلەر ءتيىمسىز باسقارۋمەن، مەملەكەتتىك اپپاراتتىڭ كەمشىلىگىمەن جانە ستراتەگيالىق باعدارلامالاردىڭ ىسكە اسىرىلۋىن تومەن باقىلاۋمەن بايلانىستى. «جالپى، كەمشىلىكتەردىڭ بولۋىنا قاراماستان، مەملەكەت باسشىسى ۇكىمەت قۇرامىنا سەنىم ارتىپ وتىر. الايدا، ۇكىمەتتەن جۇمىس ساپاسىن ارتتىرۋ، ۇلكەن يكەمدىلىك، تاباندىلىق، تيىمدىلىكتى ارتتىرۋ تالاپ ەتىلەدى. بۇعان مەملەكەتتىك اپپاراتتى رەفورمالاۋ جانە مەملەكەتتىك باسقارۋ جۇيەسىن قايتا قۇرۋ ارقىلى قول جەتكىزۋگە بولادى»، - دەدى اسەل ابەن. ايتا كەتەيىك، قر ۇكىمەتىنىڭ كەڭەيتىلگەن وتىرىسىندا قاسىم-جومارت توقاەۆ ۇكىمەت مۇشەلەرىنە بەرىلگەن مىندەتتەردى ورىنداۋ ءۇشىن كوكتەمگە دەيىن ۋاقىت بەرگەن ەدى.

 

پىكىرلەر