ماسەلەنىڭ ءمانى
ماماندار اۋە كومپانياسىنىڭ قولدانىستاعى پايدالانۋشى سەرتيفيكاتىن مۇقيات تەكسەرۋ بارىسىندا ۇشۋ جارامدىلىعىنا قاتىستى بىرقاتار تالاپتاردىڭ بۇزىلعانىن انىقتاعان.
بىرىنشىدەن، اۋە كومپانياسى ۇشاقتاردىڭ ۇشۋعا جارامدىلىعىن باقىلاۋدى تولىق جانە ءتيىستى ەسەپكە الماعان. بولشەكتەردى ءبىر ۇشاقتان ەكىنشىسىنە اۋىستىرۋ كەزىندەگى كورسەتكىشتەر تەحنيكالىق جۋرنالدارداعى مالىمەتتەرگە سايكەس كەلمەيدى. بۇل Bek Air كومپانياسىندا ءبىر ۇشاقتىڭ قۇرامداس بولشەگىن الىپ، ونى باسقا ۇشاققا ورناتۋ ۇنەمى قولدانىلاتىنىن كورسەتەدى.
تيىسىنشە، اۋە كومپانياسىنىڭ قارجىنىڭ جەتكىلىكسىزدىگىنەن قوسالقى بولشەكتەر الۋعا مۇمكىندىگى جوق ەكەنى بەلگىلى بولعان.
"ۇشاقتىڭ قوزعالتقىشىنان ساعات پەن تسيكلداردى باقىلاۋعا مۇمكىندىك بەرەتىن سەريالىق نومىرلەردەگى اقپاراتتى كورسەتەتىن دەرەكتەر كەستەلەرى الىنىپ تاستالعان. بۇل قوزعالتقىشتاردىڭ سايكەستەندىرىلۋى مەن ناقتى قانشا ساعات جۇمىس ىستەگەنىن تەكسەرۋگە مۇمكىندىك بەرمەيدى", – دەپ حابارلادى ازاماتتىق اۆياتسيا كوميتەتىنىڭ ءباسپاسوز قىزمەتى.
تاعى قانداي اقاۋلار انىقتالدى
تەكسەرۋ بارىسىندا اۋە كومپانياسىنىڭ بىرنەشە ۇشاعىندا پروبلەمالى قوزعالتقىش تابىلعان. بۇل Bek Air ۇشاقتارى قوزعالتقىشتارىنىڭ ساپاسىنا كۇمان تۋدىرادى. سونىمەن قاتار، Fokker-100 ۇشاقتارىنىڭ قوزعالتقىشتارىن ءوندىرۋشى Rolls Royce كومپانياسى وسى ۇشاقتار قازاقستاندا قولدانىسقا بەرىلگەننەن باستاپ، ولارعا اتالعان قوزعالتقىشتاردى كۇردەلى جوندەۋدەن وتكىزۋ تۋرالى ەشقانداي ءوتىنىش تۇسپەگەنىن حابارلاعان.
بۇعان قوسا، Rolls Royce "قازاقستاننىڭ اۆياتسيالىق اكىمشىلىگى" اق-عا دەرەكتەر كەستەلەرىن الۋدى تالاپ ەتەتىن راسىمدەر جوق ەكەنىن جانە قولدانىستاعى ۇشاقتاردىڭ قوزعالتقىشىنا بۇل ارەكەتتى جاساۋعا رۇقسات بەرمەيتىنىن مالىمدەگەن.
ۇكىمەتتىك كوميسسيا: Bek Air ۇشاعىنا مۇز قاتۋى – ونىڭ اپاتقا ۇشىراۋىنىڭ نەگىزگى نۇسقاسى
"الماتى اۋەجايىنداعى بەينەباقىلاۋ كامەرالارىندا جازبالاردى زەرتتەۋ بارىسىندا Bek Air اۋە كەمەسىنىڭ ۇشاقتارىن ۇشۋعا دايىندايتىن ەكيپاجدىڭ، ادەتتە، اۋە كەمەسىن پايدالانۋ نۇسقاۋلىعىندا تالاپ ەتىلگەندەي، ۇشاق قاناتىن اينالا تەكسەرمەيتىنى انىقتالدى" – دەلىنگەن حابارلامادا.
Fokker-100 ۇشاعىن پايدالانۋ جونىندەگى نۇسقاۋلىقتا ۇشاقتىڭ قاناتى ءاربىر ۇشۋدىڭ الدىندا تەكسەرىلۋى ءتيىس.
تەكسەرۋ اياقتالعاسىن نە بولادى.
قازىرگى ۋاقىتتا Bek Air اۋە كومپانياسىن تەكسەرۋ جۇمىستارى جالعاسۋدا. ول اياقتالعاننان كەيىن كومپانيا 10 كۇن ىشىندە بارلىق بۇزۋشىلىقتاردى جويۋ ءۇشىن "قازاقستان اۆياتسيالىق اكىمشىلىگى" اق-نا جوسپارىن ۇسىنۋى ءتيىس. ەگەر بۇزۋشىلىقتار 6 اي ىشىندە جويىلماسا، پايدالانۋشى سەرتيفيكاتى مەن ۇشۋ جارامدىلىعى سەرتيفيكاتتارى كەرى قايتارىلىپ الىنادى.
ازىرگە سەرتيفيكاتتاردىڭ قولدانىلۋى بەلگىسىز مەرزىمگە توقتاتىلعان.
informburo.kz
