پاۆلودار وبلىسىنىڭ اكىمى بولات باقاۋوۆتىڭ قاماۋعا الىنۋىندا قانداي قيسىن بار؟ ول ناق قىلمىسكەر مە، جوق الدە ناقاق قياناتتىڭ قۇربانى ما؟ ونى قاماۋ كىمگە قاجەت بولدى؟ "كنب" ونىڭ ۇستالۋ سەبەبىن نەگە ءبىر تاۋلىكتەن كەيىن حابارلادى؟ كاريم-اكانىڭ "كونتورى" باقاۋوۆتى قاماۋعا جەلەۋ بولعان جەمقورلىق فاكتىسىن نەگە قولمەن قويعانداي، ناقتى اتامايدى؟
البەتتە، باقاۋوۆتا بەس بەرەسى، التى الاسىمىز جوق. ونىڭ ۇستىنە، بولات مىرزانى "سۇتتەن - اق، سۋدان - تازا" دەي المايمىز. بۇگىندە بيلىكتە جۇرگەندەر بىلعانۋعا "مىندەتتى: تازا تۇلعا بيىكتەن تۇراق تاپپايدى. ماسەلەن، جۋىقتا پاۆلودارلىق "پرەزيدەنتتىڭ" پورترەتى الدەبىر "جابىق" اۋكتسيوندا 32 ملن تەڭگەگە (~$85 مىڭ) ساتىلۋى دا تەگىن ەمەس: تۇقيانىن تىنتەر بولساڭ، بۇنى پارانى استىرتىن بەرۋدىڭ ءبىر امالى دەۋگە بولادى. كەزىندە، نازارباەۆتىڭ سۆاروۆ تاسىنان جاسالعان پورترەتى ونىڭ 75 جاسقا تولۋ تويىندا $100 مىڭعا عانا ساتىلعانىن ەسكەرسەك، باقاۋوۆتىڭ باعاسى وي-وي بولعانى!
دەگەنمەن، وبلىستاعى ميني-پرەزيدەنت - "جەرباسىن" جەمقورلىق جەلەۋىمەن جاۋىپ تاستاۋ - بالانىڭ ويىنى ەمەس. بۇل - جوعارعى جاقتان نۇقىپ تۇرىپ، سانكتسيا بەرىلگەن قاماۋ. ال ونداي يشاراعا ىم قاققان - البەتتە نازارباەۆ. ءبىزدىڭ پايىمدا پرەزيدەنت توقاەۆتىڭ بۇعان ەشقانداي قاتىسى جوق. ءتىپتى ءدال وسى ارادا ونىڭ "كنب"-عا قارسى كەلەر قايلاسى دا از.
ەندەشە، ساياسي يستەبليشمەنتتەگى سوڭعى ءبىر اپتانىڭ سحەماسىنا قاراڭىز: سايلاۋدان كەيىنگى سەگىز ايدا پرەزيدەنت توقاەۆتىڭ ەسىگىن اشپاعان پرەمەر ءماميندى "باس كىتاپحاناشى" قابىلدايدى; بۇدان سوڭ، مامين نازارباەۆتىڭ "سامكاسىنداعى" (سامۇرىق-قازىنا) ديرەكتورلار كەڭەسىنىڭ توراعالىعىنان كەتەدى; پرەزيدەنتتىڭ وكىمىمەن كەڭەس مۇشەلىگىنە توقاەۆتىڭ كەڭەسشىسى قانات بوزىمباەۆ كىرەدى; ال كەشە بوزىمباەۆ "سامۇرىق-قازىنا" قورى ديرەكتورلار كەڭەسىنىڭ توراعاسى بولۋى مۇمكىن دەگەن ينسايدەرلىك اقپارات تارايدى (قازتاگ); ال بۇگىن كاريمنىڭ "كونتورى" باقاۋوۆتى قامايدى.
ەندى كەلەسى سحەماعا ءۇڭىلىڭىز: 2013 جىلدىڭ جەلتوقسانىندا بوزىمباەۆ پاۆلودار وبلىسىنىڭ اكىمى بولىپ تاعايىندالادى; ارادا اي وتپەي (2014), باقاۋوۆ اقسۋ اۋدانىنىڭ اكىمدىگىنەن پاۆلودار قالاسى اكىمىنىڭ كرەسلوسىنا اۋىسادى; 2016 جىلى بوزىمباەۆ ەنەرگومينگە مينيستر بوپ كەتەدى; وبلىس اكىمىنىڭ پوستىنا ول باقاۋوۆتى ۇسىنادى; نازارباەۆ ونى تاعايىندايدى.
ال ەندى مىناۋ سحەماعا زەيىن قويىڭىز: قازاقستان ەكونوميكاسىنداعى نەگىزگى اكتيۆتەرىنىڭ يەسى - نازارباەۆتىق "سامكا"; ۇكىمەتتىڭ ۇلەسى بار وندىرىستەردىڭ بارلىق اكتسياسى - "سامكا" قورىنىڭ قولىندا; قوردىڭ اتقارۋشى ورگانى - باسقارمانىڭ توراعاسى -احمەتجان ەسىموۆ; قور باسقارماسى ديرەكتورلار كەڭەسىنە (دك) باعىنىشتى; ال دك توراعاسى بولىپ، بوزىمباەۆ تاعايىندالۋى مۇمكىن; ونداي جاعدايدا ەسىموۆ ەسەپتى دك توراعاسى بوزىمباەۆقا بەرەدى; ونداي جاعدايدا، ەگەر توقاەۆ مۇددەلى بولسا، قازاقستاننىڭ اكتيۆتەرى مەن قارجىسىن سۋداي ساپىرعان "سامۇرىق-قازىنا" ۇلتتىق قورىنىڭ بىلىعى اشىلىپ قالۋى ىقتيمال; ال بۇل بىلىقتىڭ اۋتورلارى - پرەمەرلىكتىڭ "پايداسىن" ەكى مارتە، ون جىلعا جۋىق تاتقان كاريم-اكا ماسيموۆ پەن ارينە، ونىڭ كوكە-قوجايىنى نازارباەۆ.
ەندى وسى بىلىقتىڭ اشىلۋى بۇل ەكەۋىنە كەرەك پە؟ البەتتە - جوق!
ەندەشە، نە ەتپەك كەرەك؟ باقاۋوۆتى قاماپ، ونىڭ تەرگەۋگە بەرگەن (بەرگىزەدى) جاۋاپتارى ارقىلى بوزىمباەۆتى بىلعاۋ كەرەك. ارينە، قانات شىراق تا تاپ-تازا دەي المايمىز: باقاۋوۆتى تەرگەۋ كەزىندە «ۆنوۆ وتكرىۆشيەسيا وبستوياتەلستۆا» پايدا بولا قالۋى تاعى مۇمكىن...
قىسقاسى، اقوردا مەن "كىتاپحانا" اراسىنداعى الىستان اتىستىڭ ديستانتسياسى قىسقارىپ، ول قويان-قولتىق ايقاسقا ۇلاستى. ەندى كىم ەپتى - نايزالاسۋ شايقاسىن سول جەڭەدى. بۇل ارادا، ءسوز جوق، ينتيگانىڭ الەمدىك ليدەرى نازارباەۆقا توقاەۆ تەڭدەس بولا المايدى. ارامدىقتىڭ ايداھارى بۇعان دەيىنگى 30 جىلدا ەشكىمگە دەس بەرىپ كورمەگەن.
ال كىمنىڭ قولىندا قۇزىرەت - نەگىزى تۇبەگەيلى جەڭىس سونىڭ ۇلەسىندە بولۋى ءتيىس. ارينە بارلىق قۇزىرەت - توقاەۆتا. بىراق ول ءوز قۇزىرەتىن پايدالانا الا ما، ايداھاردى تۇيرەپ تۇسىرە مە - ول ەندى قاسەكەڭنىڭ قاسقىرلىعىنا قاتىستى ماسەلە. انىعى - ءدال قازىر قاسەكەڭنىڭ قاسقىر بولۋى حالىققا قاجەت-اق بولىپ تۇر.
مىنە، ءبىزدىڭ پايىمنىڭ پوشىمى وسىنداي. ءسىز نە دەيسىز - ءوز ەركىڭىز!
ەرمۇرات باپي
