ءىىم قازاقستاندىقتارعا ارميان، قىرعىز جانە رەسەي كولىكتەرىنە بايلانىستى ۇندەۋ جاسادى. قر ىشكى ىستەر مينيسترلىگى شەتەلدىك ەسەپتە تۇرعان كولىكتى تىركەۋگە شاقىرادى، - دەپ حابارلايدى تengrinews.kz ءتىلشىسى.
ۆەدومستۆونىڭ مالىمەتىنشە، بۇگىنگى تاڭدا ەلگە ارمەنيا، قىرعىزستان، بەلارۋس جانە رەسەيدە تىركەلگەن 170 مىڭنان استام كولىك قۇرالى جەتكىزىلگەن. ارمەنيا جانە قىرعىزستان اۆتوموبيلدەرىنە قاتىستى ەاەو-عا مۇشە باسقا مەملەكەتتەردىڭ اۋماعىندا ولاردى پايدالانۋ بويىنشا قاتاڭ شەكتەۋلەر بار.
"ارمەنيا مەن قىرعىزستاندا تىركەلگەن اۆتوموبيلدەر 2014 جىلدان 2020 جىلدىڭ 1 قاڭتارىنا دەيىن قازاقستانعا كەدەندىك باج سالىعى مەن سالىقتاردى تولەمەي ۋاقىتشا كىرۋگە مۇمكىندىك بولعان. قازاقستاندىقتار ءۇشىن وسى كەزەڭدە قىرعىزستان مەن ارمەنيادا تىركەلگەن اۆتوكولىكتى اكەلۋگە جانە پايدالانۋعا تەك قانا اۆتوكولىكتى كەدەندىك دەكلاراتسيالاۋ، باج سالىعى مەن سالىقتاردى تولەۋ، سونداي-اق ودان ءارى قازاقستاندا اۆتوكولىكتى تىركەۋ كەزىندە جول بەرىلەدى", - دەپ حابارلادى ءىىم ءباسپاسوز قىزمەتى.
ەگەر قازاقستاندىق ءوز اتىنا ەل اۋماعىنان تىس جەردە كولىكتى تىركەگەن بولسا، وندا مۇنداي اۆتوموبيل قازاقستاندا ساتىپ العاننان كەيىن 10 جۇمىس كۇنى ىشىندە بارلىق قاجەتتى الىم مەن باج سالىعىن تولەپ تىركەلۋى ءتيىس. وسىلايشا، شەت مەملەكەتتەردە تىركەلگەن كولىك قۇرالدارىن قازاقستاندا پايدالانۋدىڭ بارلىق ىقتيمال جاعدايى مەن نىسانى زاڭدا رەتتەلگەن.
"بەلگىلەنگەن تارتىپتە تىركەلمەگەن ءاۆتوموبيلدى جۇرگىزگەنى ءۇشىن 10 اەك كولەمىندە ايىپپۇل سالىنىپ، ۇستاۋ سەبەبىن جويعانعا دەيىن ايىپپۇل سالۋ قاراستىرىلعان. تىركەلمەگەندىكتەن جۇرگىزۋشىلەردىڭ جازاسىز قالامىن دەگەن ويىنىڭ كەسىرىنەن 1854 جول-كولىك وقيعاسى بولىپ، 132 ادام قازا تاۋىپ، 500-دەن استام جاراقات الدى", - دەپ تولىقتىردى ۆەدومستۆوداعىلار.
سونىمەن قاتار، 2019 جىلى كامەرالار ارقىلى 90 مىڭنان استام ەرەجەبۇزۋشىلىق انىقتالدى، جالپى قۇنى - 1,1 ميلليارد تەڭگە. ايىپپۇلدار جىلدامدىق رەجيمىن ارتتىرۋعا، بەلگىلەر مەن تاڭبالاردىڭ تالاپتارىن ساقتاماۋعا جانە تاعى دا باسقاعا قاتىستى.
"مۇنداي اۆتوكولىكتى پايدالانۋ فاكتىلەرىنىڭ جولىن كەسۋ ءۇشىن پوليتسيا كەدەندىك جانە سالىق ورگاندارىمەن بىرلەسىپ رەيد شارالارىن وتكىزەدى. ءىىم باسقا مەملەكەتتەردىڭ اۋماعىندا اۆتوكولىك ساتىپ العان قازاقستاندىقتاردى ونى تىركەۋگە جانە كەدەندىك رەتتەۋ جانە جول قوزعالىسى سالاسىنداعى زاڭنامانىڭ بۇزىلۋىن ءوز ەركىمەن جويۋعا شاقىرادى", - دەپ قورىتىندىلادى ءباسپاسوز قىزمەتى.
بۇعان دەيىن قازاقستاندا جۇرگەنىنە ءبىر جىلدان اسقان ارميان، قىرعىز جانە رەسەي كولىكتەرى زاڭسىز بولاتىنى حابارلانعان. جاقىن ارادا پوليتسەيلەر ەلدەن "بوتەن" نومىرلەرى بار اۆتوكولىكتەردى شىعارا باستايدى. وعان "جول ءجۇرىسى تۋرالى" زاڭدا جازىلعان شەكتەۋلەر نەگىز بولاتىنى ايتىلادى.
