تەولوگيا عىلىمىنىڭ انىقتاۋىنشا جات اعىم وكىلدەرىنىڭ ادامداردى ارباۋى مىناداي ءۇش ساتىدان تۇرادى:
ءبىرىنشى، ەرىتىپ، بالقىتۋ;
ەكىنشى، ساناسىن وزگەرتىپ، وزدەرىنە بەيىمدەۋ. ءۇشىنشى، ءوز قالىپتارىنا سالىپ، قاتىرىپ تاستاۋ.
اۋەلى، جات اعىم وكىلدەرى نىساناعا العان ادامىنا ەرىتىپ، بالقىتاتىن ءتۇرلى ۋاعىز-ناسيحات ايتادى. ول ءۇشىن قۇران اياتتارىن، اللا ەلشىسىنىڭ (س.ع.س) وسيەتتەرىن، ساحابالاردىڭ ونەگەلەرىن، ودان كەيىنگى ءىرى عۇلامالاردىڭ تاعىلىمدارىن قۇرال رەتىندە پايدالانىپ باعادى. بالقىدى-اۋ دەگەندە ىڭعايىنا قاراي تارتىپ، وزدەرىنە بەيىمدەي باستايدى. مىسالى، يبن ءتايميانىڭ پوستۋلاتتارىن ساناسىنا قۇيىپ، ءوز يدەولوگيالارىن وتكىزۋگە بارىن سالادى. بەيىمدەلىپ بولدى-اۋ دەگەندە ءوز قالىپتارىنا سالىپ، يبن باز، ءال-فاۋزان، ءال-ۋسايمين، ءال-ءالبانيدىڭ شارحتارىمەن تۇزدىقتاپ، ءبىرجولاتا مۇز ەتىپ، قاتىرىپ تاستايدى.ال، سوسىن تەولوگتار جات اعىمنىڭ جەتەگىنە ەرگەن ادامنىڭ توڭ بولىپ قاتقان ساناسىن جىبىتۋمەن شۇعىلدانادى. شىركىن، ادامداردى جات اعىمنىڭ وكىلدەرى ەمەس، الدىمەن ءوز يمامدارىمىز ۋاعىز ايتىپ ەرىتىپ، بالقىتسا، تەولوگتار سان-ساپات جۇمىسقا جەگىلمەس ەدى-اۋ.
مۇحان يساحان،
ءدىنتانۋشى، PHD دوكتورى،
قمدب جانىنداعى عۇلامالار كەڭەسىنىڭ مۇشەسى،
شقو ءدىن ماسەلەلەرىن زەرتتەۋ ورتالىعىنىڭ تاپسىرىسى بويىنشا
