فوتو: Forword Seamen's Union of India
ورمۋز بۇعازى مەن وعان جاقىن اۋماقتاردا كەمەلەرگە جاسالعان شابۋىلدار سانى رەكوردتىق دەڭگەيگە جەتتى. BBC Verify تالداعان ۇلىبريتانيانىڭ تەڭىز ساۋدا وپەراتسيالارى باسقارماسىنىڭ (UKMTO) دەرەكتەرىنە سايكەس، 5–11 قازان ارالىعىندا 12 كەمەگە شابۋىل جاسالعان. الدىڭعى اپتادا بۇل كورسەتكىش 10 بولعان، دەپ حابارلايدى “ادىرنا”.
UKMTO مالىمەتىنشە، وتكەن جەكسەنبىدە ءبىر كۇندە التى كەمەگە شابۋىل جاسالىپ، تاۋلىكتىك رەكورد تىركەلدى. شابۋىلدار سالدارىنان نيكاراگۋا تۋىمەن جۇزگەن Petro Dolphin تانكەرى ورتەنىپ كەتكەن.
تەڭىزدەگى بارلاۋ قىزمەتتەرىن كورسەتەتىن Vanguard كومپانياسىنىڭ مالىمەتىنشە، تانكەر وماننىڭ سۋحار پورتىنا جاقىن جەردە درون شابۋىلىنا ۇشىراعان. بۇل ورىن ورمۋز بۇعازىنان 250 شاقىرىمنان استام قاشىقتىقتا ورنالاسقان.
ۇندىستاندىق 11 ەكيپاج مۇشەسى قۇتقارىلعان. الايدا تاعى ەكى ادام حابار-وشارسىز كەتكەندەر قاتارىندا. بۇل تۋرالى ءۇندىستان تەڭىزشىلەرىنىڭ Forward Seamen's Union of India كاسىپوداعى حابارلادى.
سونداي-اق GFS Pride كونتەينەر كەمەسى بۇعازدا سۋعا باتىپ، ونىڭ 21 ەكيپاج مۇشەسى ەۆاكۋاتسيالاندى.
يران يسلام رەۆوليۋتسياسى ساقشىلار كورپۋسى (كسير) بۇل كەمەنىڭ سۋعا باتىپ بارا جاتقانىن كورسەتەتىن بەينەجازبانى جاريالادى. كورپۋس وكىلدەرىنىڭ مالىمدەۋىنشە، كەمەدە «كونتراباندالىق تاۋارلار تيەلگەن 2 500 كونتەينەر» بولعان جانە ول «رۇقسات ەتىلمەگەن باعىتپەن» جۇرگەن.
Kpler كومپانياسىنىڭ مالىمەتىنشە، 13 قازاندا ورمۋز بۇعازى ارقىلى تاۋلىگىنە 12,6 ملن باررەل مۇناي تاسىمالدانعان. بۇل قىركۇيەك سوڭىنداعى 15 ملن باررەلدەن جانە قاقتىعىسقا دەيىنگى 17 ملن باررەلدەن از.
اقش اسكەري-تەڭىز كۇشتەرىنىڭ مالىمەتىنشە، قازاننىڭ العاشقى 10 كۇنىندە ورمۋز بۇعازى ارقىلى ءوتۋ كەزىندە كومەك العان كەمەلەر سانى تامىزدىڭ سايكەس كەزەڭىمەن سالىستىرعاندا 85%-عا ارتقان.
ساراپشىلاردىڭ پىكىرىنشە، يران بۇعازداعى باقىلاۋىن كۇشەيتۋ ءۇشىن شابۋىلداردى جيىلەتىپ، ولاردى ومان شىعاناعى مەن پارسى شىعاناعى ەلدەرىنىڭ جاعالاۋلارىنا دەيىن كەڭەيتىپ وتىر. ال اقش كۇشتەرى مەن ايماقتىق سەرىكتەستەر كوممەرتسيالىق كەمەلەردىڭ قاۋىپسىز وتۋىنە كومەكتەسۋدە.
مامانداردىڭ باعالاۋىنشا، شابۋىلداردىڭ كوبەيۋى مۇناي تاسىمالىنا قاۋىپ ءتوندىرىپ، الەمدىك ەنەرگەتيكالىق نارىققا اسەر ەتۋى مۇمكىن.
