اقش پرەزيدەنتى مارقۇم سەناتور ليندسي گرەم ۇسىنعان زاڭدا كوزدەلگەن سانكتسيا مەن باج سالىعىن قولدانۋدى توقتاتۋ تۋرالى جارلىققا قول قويدى، دەپ حابارلايدى “ادىرنا”.
ربك-ۋكراينا دەرەگىنشە، اتالعان زاڭ رەسەيدىڭ ۋكرايناعا قارسى سوعىسىنا بايلانىستى ماسكەۋگە قىسىمدى كۇشەيتۋدى كوزدەگەن. قۇجاتتا، اتاپ ايتقاندا، رەسەيدىڭ ەنەرگەتيكالىق رەسۋرستارىن ساتىپ الاتىن ەلدەرگە باج سالىعىن ەنگىزۋ قاراستىرىلعان.
ترامپ جارلىعىندا بۇل شارالاردى قازىرگى ۋاقىتتا قولدانباۋ اقش-تىڭ ۇلتتىق مۇددەسىنە ساي كەلەتىنىن كونگرەسكە جەتكىزگەنىن حابارلاعان. قۇجات باج سالىعىن ەنگىزۋ مۇمكىندىگىن ساقتاي وتىرىپ، ونىڭ قولدانىلۋىن ۋاقىتشا توقتاتادى. ياعني، اقش پرەزيدەنتى قاجەت دەپ تاپسا، بۇل شارالاردى كەيىن قايتا ىسكە قوسا الادى.
زاڭ جوباسى اق ءۇي باسشىسىنا رەسەي مۇنايىن ەڭ كوپ ساتىپ الاتىن بەس ەلدىڭ تاۋارلارىنا 100 پايىزدىق باج سالىعىن ەنگىزۋ ءۇشىن 30 كۇن مەرزىم بەرگەن. سونىمەن قاتار، رەسەيدىڭ بىرقاتار كاسىپورنىنا سانكتسيا سالۋ جانە اقش-قا يمپورتتالاتىن رەسەيدىڭ ەنەرگەتيكالىق ونىمدەرىنە 500 پايىزدىق باج سالىعىن ەنگىزۋ كوزدەلگەن. بەلگىلەنگەن مەرزىم 18 قازاندا اياقتالۋى ءتيىس ەدى.
اقش بۇقارالىق اقپارات قۇرالدارىنىڭ حابارلاۋىنشا، باج سالىعىن قولدانۋدى توقتاتۋ كونگرەستەگى، سونىڭ ىشىندە رەسپۋبليكالىق پارتيا وكىلدەرىنىڭ اراسىندا سىن تۋدىرۋى مۇمكىن. ولاردىڭ ءبىر بولىگى ترامپتىڭ رەسەي ديزەل وتىنىن الەمدىك نارىققا جەتكىزۋگە مۇمكىندىك بەرگەن شەشىمىنە نارازى.
وسى اپتادا ەكى پارتيانىڭ سەناتورلارى ترامپتان رەسەي پرەزيدەنتى ۆلاديمير پۋتينمەن جاسالعان ديزەل وتىنىنا قاتىستى كەلىسىمدى توقتاتۋدى جانە گرەم زاڭىنداعى تالاپتاردىڭ ورىندالۋىن قامتاماسىز ەتۋدى سۇراپ، حات جولداعان.
سانكتسيالار مەن باج سالىعىن ۋاقىتشا توقتاتۋ اقش-تىڭ رەسەي ەنەرگەتيكالىق رەسۋرستارىن ءىرى كولەمدە ساتىپ الاتىن قىتاي، ءۇندىستان جانە تۇركيامەن ىقتيمال كەلىسپەۋشىلىكتەرىنىڭ الدىن الۋعا دا مۇمكىندىك بەرەدى.
