فوتو: TASS
كەتي زاحاريا اق ءۇيدىڭ ءباسپاسوز حاتشىسى قىزمەتىنە تاعايىندالعاننان كەيىن ءبىر اپتاعا جەتپەي قىزمەتىنەن كەتكەن، دەپ حابارلايدى “ادىرنا”.
جەرگىلىكتى باق دەرەگىنشە، بۇعان زاحاريانىڭ العاشقى ءباسپاسوز ءماسليحاتى جانە ونىڭ زاڭگەرلىك بىلىكتىلىگىنە قاتىستى تۋىنداعان سۇراقتار سەبەپ بولعان.
العاشقى ءباسپاسوز ءماسليحاتى كەزىندە زاحاريا جۋرناليستەردىڭ ءۇش سۇراعىنا جاۋاپ بەرگەننەن كەيىن كەزدەسۋدى اياقتاعان. كەيىن ونىڭ ءوزىن ادۆوكات رەتىندە تانىستىرعانىنا قاراماستان، ادۆوكاتتىق ەمتيحاننان وتە الماعانى بەلگىلى بولعان.
اقش پرەزيدەنتى دونالد ترامپ جۋرناليستەرمەن اڭگىمەسىندە زاحارياعا بۇل قىزمەتتىڭ قاجەت-قاجەت ەمەستىگىن قايتا ويلاستىرۋدى ۇسىنعانىن ايتتى. سونىمەن قاتار ول زاحاريانىڭ اكىمشىلىكتە باسقا لاۋازىمعا تاعايىندالۋى مۇمكىن ەكەنىن جەتكىزدى.
ترامپ بۇل قىزمەتتى زاحارياعا وتكەن جۇمادا ۇسىنعان. Fox News ارناسىنىڭ كوممەنتاتورى بولعان زاحاريانىڭ كانديداتۋراسى اق ءۇي قىزمەتكەرلەرىنىڭ كوپشىلىگى ءۇشىن كۇتپەگەن شەشىم بولعان. الايدا زاحاريا پرەزيدەنتتىڭ جانىندا ءجيى جۇرەتىن كومەكشىسى ناتالي حارپتىڭ قولداۋىنا يە بولعان.
The New York Times باسىلىمىنىڭ جازۋىنشا، شەشىم تۋرالى اقپاراتتى باسىلىمعا ءۇش دەرەككوز ءانونيمدى تۇردە جەتكىزگەن. ولاردىڭ مالىمەتىنشە، بۇل شەشىم ازىرگە رەسمي تۇردە جاريالانباعان.
بۇعان دەيىن كەتي زاحاريانىڭ اق ءۇيدىڭ ءباسپاسوز حاتشىسى رەتىندەگى العاشقى ءباسپاسوز ءماسليحاتىن وتكىزگەنى حابارلانعان ەدى. سول كەزدە ول دونالد ترامپقا سەنىم بىلدىرگەنى ءۇشىن العىس ايتىپ، ونىڭ كومانداسىندا جۇمىس ىستەۋدى كوپتەن بەرى ارمانداعانىن جەتكىزگەن.
