الماتى تۇبىندە اپاتقا ۇشىراعان ۇشاق قۇيرىعىمەن التى رەت، شاسسيمەن ءتورت رەت جانە قاناتىمەن ءبىر رەت ۇشۋ جولاعىنا سوعىلعان
نۇر-سۇلتان، 10 قاڭتار – Sputnik. Fokker 100 ۇشاعىنىڭ اپاتقا ۇشىراۋىنا بايلانىستى قۇرىلعان ۇكىمەتتىك كوميسسيا ۇشقىشتاردىڭ اڭگىمەسىن زەرتتەپ شىقتى. وسى جانە باسقا دا پارامەترلىك كورسەتكىشتەردىڭ نەگىزىندە اپاتتىڭ حرونولوگياسى جاسالدى، دەپ حابارلايدى Sputnik قازاقستان ءتىلشىسى.
حرونولوگيا
- 7:20:02 - ۇشاق جولاققا شىعادى;
- 7:20:41 - ەكيپاج الدىڭعى ءشاسسيدى كوتەرۋدى باستايدى;
- 7:20:45 - ۇشاق ماكسيمالدى جىلدامدىقپەن جەردەن كوتەرىلەدى;
يندۋستريا جانە ينفراقۇرلىمدىق دامۋ ءمينيسترى رومان سكلياردىڭ ايتۋىنشا، ۇشاق جەردەن كوتەرىلگەن بويدا الدىمەن سول جاققا، ودان كەيىن وڭ جاققا قيسايا باستايدى. ەكيپاج ۇشۋ تراەكتورياسىن ۇستاپ قالۋعا تىرىستى. وسىدان كەيىن نەگىزگى شاسسي جانە ۇشاقتىڭ سول جاق قاناتى جەرگە تيەدى.
7:20:53 – ۇشاق وڭعا قاراي قيسايادى. وسى كەزدە كوماندير: "نە بولىپ قالدى؟", - دەپ سۇرايدى.
7:20:54 – ەكىنشى پيلوتتىڭ جاۋابى: "نە بولعانىن بىلمەيمىن. ستابيليزاتور... توقتا... مەن بۇل جەرگە تۇسەمىن (ارى قاراي بوقاۋىز سوزدەر كەتەدى)".
"وسى كەزدە ەكىنشى ۇشقىش قوزعالتقىشتاردىڭ جۇمىسىن باياۋلاتىپ، ۇشۋدى توقتاتۋعا ارەكەت جاساعان سەكىلدى. الايدا بىرنەشە سەكۋندتان كەيىن قوزعالتقىشتاردىڭ جۇمىسى تاعى 93-95 پروتسەنتكە ارتىپ، اۋە كەمەسى ۇشۋدى جالعاستىرادى", - دەيدى سكليار.
7:20:57 – كوماندير ەكىنشى ۇشقىشقا: "كەرەك ەمەس. نە ىستەپ جاتىرسىڭ؟", - دەپ ايتادى. ءسويتىپ، جىلدامدىقتى ارتتىرىپ، "كەتتىك! كەتتىك!" دەيدى.
7:21:04 – كوماندير ءشاسسيدى الىپ تاستاۋعا بۇيرىق بەرەدى;
"وسىدان كەيىن ۇشاق بىرنەشە رەت جەردى سىزىپ ءوتتى. قۇيرىعىمەن التى رەت، شاسسيمەن ءتورت رەت جانە قاناتىمەن ءبىر رەت ۇشۋ جولاعىنا سوعىلىپ، سول جاق قاۋىپسىزدىك جولاعىنا سىرعاناپ كەتكەن. وسى كەزدە ۇشۋ جولاعىنىڭ 38 شامى قيرادى", - دەپ اتاپ كورسەتتى سكليار.
7:21:15 – بەس مەتر بيىكتىكتە ءشاسسيدى الىپ تاستاعان، ارتىنان ۇشاق فيۋزەلياجبەن جەرگە جاتىپ، ۇشۋ الاڭىنىڭ سىرتىنا شىعىپ كەتكەن،
اپاتتىڭ نەگىزگى سەبەبى
بۇگىن ۇكىمەتتىك كوميسسيا الماتى تۇبىندەگى Bek Air اۋە كومپانياسى ۇشاعىنىڭ اپاتقا ۇشىراۋ سەبەبىنىڭ الدىن الا بولجامىن جاريالادى.
"ۇشاق سىرتىنا مۇزدىڭ قاتىپ قالۋى – نەگىزگى سەبەپ. اۋە كەمەسى تۇراقتا ەكى تاۋلىك تۇرعان", - دەپ ءمالىم ەتتى پرەمەر-ءمينيستردىڭ ورىنباسارى، يندۋستريا جانە ينفراقۇرلىمدىق دامۋ ءمينيسترى رومان سكليار.
كوميسسيا ۇشاقتىڭ سىرتىنداعى قاتىپ قالعان مۇزدى ەرىتۋ جۇمىستارى جارتىلاي عانا جاسالعانىن انىقتاعان.
"ۇشاق كومانديرى ارنايى سۇيىقتىقپەن تەك ستابيليزاتوردى عانا وڭدەۋگە شەشىم قابىلداعان. ۇشاقتىڭ قاناتتارى وڭدەلگەن جوق. ول كۇنى اتىراۋعا ۇشقان تۋرا سونداي ۇشاقتىڭ دا سىرتى سۇيىقتىقپەن وڭدەلمەگەنى انىقتالدى", - دەدى سكليار.
الماتى تۇبىندەگى ۇشاق اپاتى
ۇشاق اپاتى 27 جەلتوقسان تاڭعى ساعات جەتىدە بولدى. Bek Air اۋە كومپانياسىنىڭ "الماتى – نۇر-سۇلتان" باعىتىنداعى Fokker 100 ۇشاعى الماتى ماڭىنا قۇلادى.
ۇشاقتا 93 جولاۋشى مەن 5 ەكيپاج مۇشەسى بولعان. اپات 12 ادامنىڭ ءومىرىن قيدى، قازا بولعانداردىڭ ىشىندە ۇشاق كومانديرى بار. ەكىنشى ۇشقىش جانساقتاۋ بولىمىنە ءتۇستى. قازىر ول ەسىن جيدى.
ىشكى ىستەر مينيسترلىگى اۋە اپاتىنا سەبەپ بولعان ءۇش جاعدايدى اتادى. ولار: ەكيپاج قاتەلىگى، تەحنيكالىق اقاۋ جانە ناۆيگاتسيالىق قىزمەت جۇمىسى.
ۇشاقتىڭ قارا جاشىگى ماسكەۋدەگى مەملەكەتارالىق اۆياتسيا كوميتەتىنە تاپسىرىلدى. تەرگەۋدىڭ الدىن الا قورىتىندىسى 10 قاڭتارعا دەيىن جاريالانادى دەگەن جوسپار بولعان.
پرەزيدەنت تاپسىرماسىمەن پرەمەر-مينيستر جەتەكشىلىك ەتەتىن كوميسسيا قۇرىلدى. توقاەۆ اپاتتىڭ سەبەبىن انىقتاپ، كىنالىلەردى قاتاڭ جازالاۋدى تاپسىردى. 28 جەلتوقسان ەلىمىزدە جالپىۇلتتىق ازا تۇتۋ كۇنى بولىپ جاريالانعان بولاتىن.
دەرەككوزى: سپۋتنيك.كز
